(وَاللّٰهُ مُحٖيطٌ بِالْكَافِرٖينَ) بو جملهده بولونان كلمهلرڭ بربرلريله مناسبتلرى و إفاده ايتدكلرى نكتهلر:
أوت (و) آرالرنده مناسبت بولونان ايكى شيئى بربرينه عطف ايدن بر آلَتدر. بوراده ماقبليله مابعدى آراسنده بر مناسبت گورونميور. يالڭز برنجى تمثيل ايله ايكنجى تمثيلڭ آراسندهكى مناسبته باقهرق، شويله سلسلهلى بر قاچ جملهيى إخطار ايدييور:
اونلر شنلكلى يرلردن فرار، شهرليلكدن نفرت، گيجهنڭ إستراحت زمانى اولديغنه دائر قانونه مخالفت ايتدكلرى گبى، نصيحتلره إطاعت ايتميهرك، صانكه نجاتلرى چوللرده ايمش گبى صحرالره دوشديلر. النهايه خيبت و خسرانه اوغرايهرق اللّٰهڭ بلاسنه محاط و معروض قالديلر.
(اللّٰه) بو كلمۀِ مباركه، اونلرڭ صوڭ اُميد و رجالرينڭ كسيلمهسنه إشارتدر. چونكه مصيبتزده اولان بر آدم، أوّل و آخر اللّٰهڭ مرحمتنه إلتجا ايتمكله متسلّى اولور. بناءً عليه اللّٰهڭ قهر و غضبنه مستحق اولانڭ، ألبته و ألبته نجاتندن اُميد و رجاسى كسيلير.
(مُحٖيطٌ) كلمهسى اونلرى آبلوقه ايدن مصيبتلرڭ، اللّٰهڭ آثارِ عظمتى اولديغنه إشارتدر. يعنى گوكلرڭ، بولوطلرڭ، ياغمورلرڭ، گيجهلرڭ اونلره جهاتِ ستّهدن هجوم ايتدكلرى گبى؛ اللّٰهڭ ده غضب و بليّاتى هر طرفدن اونلرى إحاطه ايتمشدر. و كذا اللّٰهڭ بتون كائناتى إحاطه ايدن علم و قدرتى و بتون ذرّاته شامل اولان أمرلرى گوز ئوڭنه گتريليرسه (مُحٖيطٌ) كلمهسندن شويله بر إخطار فيشقيرمغه باشلار: