تنكير و مجهوليتى إفاده ايدن (ظُلُمَاتٌ) دهكى تنوين، يولجيلرجه حقيقتلرى مجهول بر طاقم ظلمتلر اولديغنه إشارتدر. ديمك او تنوين، يولجيلرڭ علمنه پرده اولارق بر ظلمتى داها علاوه ايتمشدر. او حالده بو تنوين، يولجيلرڭ گوزلرينه پرده اولان ظلماته بر تأكيددر.
(وَرَعْدٌ وَبَرْقٌ) يعنى، گوك گورولتيسيله شمشك، جنابِ حقّڭ عظمتنه، قدرتنه دلالت ايدن پك آشكار ايكى آيتدر كه؛ عالمِ غيبدن، بولوطلرڭ إداره و تدويرلرينه مؤكّل و نظام، إنتظام قانونلرينڭ ممثّللرى و مأمورلرى اولان مَلكلرڭ يدِ صلاحيتلرينه ويرلمشدر.
صوڭره مسبّباتڭ أسبابله ظاهرده باغلى اولديغنه بناءً هواده منتشر اولان بخارِ مائيدن بولوطلر تشكّل ايدرلر. بو بولوطلرڭ حكمتِ ربّانيله بر قسمى منفى ألكتريقى حاملدر. بر قسمى ده مثبت ألكتريقه حاملهدر. بو قسملر بربرينه ياقلاشوب، آرالرنده تصادم اولديغنده إرادۀِ خالقله برق تولّد ايدر. بر قسمى هجوم، بر قسمى ده فرار ايتدكلرى زمان آرالرنده هواسز قالان يرلرى طولديرمق ايچون أمرِ ربّانيله طبقاتِ هوائيه حركت و هيجانه گلديگنده رعد صداسى، يعنى گوك گورولتيسى ميدانه گلير. فقط بو حاللرڭ جريانى بر نظام، بر قانون آلتنده اولور كه، او نظامى، او قانونى تمثيل ايدن رعد و برق مَلكلريدر.
س - رعد و برقڭ ظلمات كلمهسنه عطفلرندن آڭلاشيلير كه، بونلرڭ ظرفى ياغموردر. حالبوكه ظرفلرى بولوطدر. ياغمور دگلدر؟
ج - دهشتندن باييلمش اولان سامعجه، او ياغمورڭ هر شيئى إحاطه ايتمش اولديغى ظن ايديلديگنه گوره، رعد و برق ده ياغمورڭ ايچنه آلديغى شيلره داخلدرلر.