كذالك (مِنْ جِبَالٍ فٖيهَا مِنْ بَرَدٍ) جملهسى ده، ايكى إستعارهيى تضمّن ايتمشدر. بو إستعارهلر سامعڭ شاعرانه بر خيالنه مؤسّسدر. بو خيال ده عالمِ سفلى ايله عالمِ علوى آراسنده بر نوع مشابهت و مماثلتى ملاحظه ايتمگه مبنيدر. يعنى، عالمِ سفلى دينيلن أرض مواسمِ أربعهده بِالخاصّه بهار موسمنده ناصل درلو درلو شكللره گيرر و أنواعًا زينتلى، نقشلى ألبسهلرى گيهر، آيرى آيرى منظرهلرى گوسترر. عالمِ علوى اولان سماوات دخى بِالخاصّه بولوطلريله پك غريب، عجيب كيفيتلره، صورتلره، رنكلره گيرر چيقار. عادتا هر ايكى عالم بربرينه رقابت ايدييورلر. بو ايكى عالم آراسنده شويلهجه بر مشابهت و مماثلتڭ دوشونولمسى ده، آرالرنده بر مسابقه و رقابتى تخيّل ايتمكدن نشئت ايدر. شويله كه: أرض، سما گوزللك مسابقهسنه گيرمك ايچون لازم گلن تواليتلرى ياپوب حاضرلقلرده بولوندقلرى زمان أرض قيش موسمنده قاردن معمول بياض ألبسهلرينى گيهر. بهار موسمنده زمرد گبى يشيل خاليلرى صحرالرينه سرهر. يشيل كورْكلرى طاغلرينه گيديرر. باشلرينه بياض صاريقلرى باغلار. و بو گوزل إنقلاب و منظرهلريله قدرتِ إلٰهيهنڭ معجزهلرينى، حكمتِ إلٰهيهنڭ نظرينه عرض ايدر.
بوڭا قارشى جوِّ سما دخى عظمتِ إلٰهيهيى إظهار ايتمك ايچون قوجهمان طاغلرى، تپهلرى، درهلرى و سائره غريب، عجيب شيلرڭ شكللرينى و بياض، سياه، قيرمزى گبى بويالر ايله بويالانمش پاموق ييغنلرينى آڭديران بولوط قافلهلرينى ايلرىيه سورهرك نظرِ حكمته تقديم ايدر. ايشته بو ايكى عالم آراسندهكى خيالى مشابهتدن طولايى بِالخاصّه ياز موسمندهكى بولوطلرى، عربلر طرفندن طاغلره، گميلره، بوستانلره، درهلره، دوهلرڭ قافلهلرينه ياپيلان تشبيهلر، اُسلوبلر نظرِ بلاغتده پك گوزل گورونور.