تكاثفدن قطرهلره إنقلاب ايدر. صوڭره قانونلر ممثّلى، نظامات معكسلرى دينيلن، (او قطرهلره مناسب ياراديلان) ملائكه واسطهسيله او قطرهلر مزاحمتسز، مصادمهسز نزول ايدر، يره دوشرلر. لٰكن جوِّ هواده موازنهنڭ محافظهسى ايچون ياغان قطرهلردن بوش قالان يرلر، دڭزلردن، يرلردن قالقان بخارلر ايله طولديريلير.
إخطار: سماده بيوك بر دڭزڭ بولونديغنه ايديلن ذهاب، مجازى حقيقت ظن ايديلديگندن ايلرى گلمشدر. أوت جوِّ هوا، دڭزڭ رنگينى آڭديرر. و كُرۀِ هوائيهده منتشر بحرِ محيطدن فضله صو واردر. بناءً عليه جوِّ هوايى دڭزه تشبيه ايتمك بعيد دگلدر. فقط معناىِ حقيقى ايله باقيليرسه خطادر.
س - (وَيُنَزِّلُ مِنَ السَّمَٓاءِ مِنْ جِبَالٍ فٖيهَا مِنْ بَرَدٍ) آيتِ كريمهنڭ ظاهرينه گوره ياغمورڭ نزولى، طولودن متشكّل سماده بولونان طاغلردندر. بونڭ ايضاحى؟
ج - بر كلامڭ نه بلاغته اويغون و نه عقله موافق و نه منطقه مطابق معناىِ ظاهريسنه ياپيشوب، ظاهرندن آيريلمامق بر جمود و بر سونوكلكدر. زيرا جنّتڭ يمك قابلرينڭ وصفلرى حقّنده (قَوَارٖيرَ مِنْ فِضَّةٍ) جملهسى بر إستعارۀِ بديعيهيى تضمّن ايتديگى گبى، (مِنْ جِبَالٍ فٖيهَا مِنْ بَرَدٍ) دخى بر إستعارۀِ بديعيهيى إحتوا ايتمكدهدر. شويله كه: جنّتڭ قابلرى نه شيشهدن و نه گوموشدن اولمادقلرندن بو جملهنڭ معناىِ ظاهريسنه حملى جائز دگلدر. چونكه او قابلره گوموشدن ياپيلمش شيشهلردر دينيلهمز. زيرا هر ايكى عنصر آراسنده مطابقت يوقدر. آنجق (قَوَارٖيرَ مِنْ فِضَّةٍ) دن معناىِ مجازيله شيشهنڭ شفّافيتى، گوموشڭ بياضلغى قصد ايديلمشدر. يعنى، او قابلر شيشهلر گبى شفّاف، گوموش گبى بياضدرلر.