س - آتش ياقانلر بر جماعت ايكن، مفرد إشارتى اولان (اَلَّذٖى) ايله إشارت ياپيلديغى نهيه بناءًدر؟
ج - فردڭ ياپاجغى بر ايشه جماعتڭ إشتراكيله بر زياده، نقصانلق حاصل اولماديغى تقديرده؛ فرد، نوع، جزء، كلّ بر اولور. مع هذا (اَلَّذِى) نڭ إفرادى، اونلردن هر بر فردڭ دهشتى تمثّل و قباحتى تصوير ايتمكده مستقل اولديغنه إشارتدر. مع هذا (اَلَّذٖى) نڭ (اَلَّذٖينَ) دن إختصار ايديلديگى إحتمالى واردر. (اِسْتَوْقَدَ) دهكى (س) آتش ياقمالرينڭ كلفت و آراشديرمقله حصوله گلديگنه إشارتدر. (اِسْتَوْقَدَ) نڭ إفراد صيغهسيله (نُورِهِمْ) دهكى جمع ضميرى بر جماعت ايچون بر فردڭ آتش ياقمهسى عادت اولديغنه إشارتدر. لامبه و سائره آلاتِ تنويريه آراسندن (نَارٌ) ڭ إنتخاب ايديلمسى، تكليفڭ پك شدّتلى بر نور اولديغنه و اونلرڭ إظهار ايتدكلرى ظاهرى نور آلتنده فتنه آتشنى ياقدقلرينه إشارتدر.
إخطار: نكره اولارق (نَارٌ) كلمهسنڭ ذكرى، اونلرڭ شدّتِ لزومندن طولايى هر هانگى و ناصل بر آتش اولورسه همان ياقمق إحتياجنده اولدقلرينه إشارتدر.
(فَلَمَّا اَضَٓاءَتْ مَا حَوْلَهُ ذَهَبَ اللّٰهُ بِنُورِهِمْ) تعقيبى إفاده ايدن (فَلَمَّا) دهكى (ف) اونلرڭ يأسدن صوڭره اُميد و رجا زمانلرى گلديگنه إشارتدر. (لَمَّا) ايسه قياسِ إستثنائى ايله آڭيلان داخل اولديغى جملهلردن برنجى جملهنڭ تحقّق و وجوده گلديگنه دلالت ايتمكله، ايكنجى جملهنڭ ده