وجوده گلديگنى إنتاج ايتديگنه و اونلرڭ تسلّى و اميدلرينڭ تماميله كسيلمش اولديغنه إشارتدر.
(اَضَٓاءَتْ) كلمهسى، اونلرڭ ايصينمغه دگل، آيدينلانمغه إحتياجلرى اولديغنه إشارتدر كه، أطرافنده بولونان ضررلى شيلرى گوروب، اونلردن تحفّظ ايتسينلر.
(مَاحَوْلَهُ) دهشتڭ هر درت طرفدن إحاطه ايديلديگنه و ضيا ايله جهاتِ ستّهدن هجوم ايدن ضررلردن تحفّظ ايتمك لزومنه إشارتدر.
(ذَهَبَ) بونڭ ايله (اَضَٓاءَتْ) آراسندهكى لزوم مسئلهسى گچمشدر. اورايه باقيلسين.
(ذَهَبَ اللّٰهُ) ذهابڭ اللّٰهه إسنادى، ايكى جهتدن رجا و اميدلرينڭ كسيك اولديغنه إشارتدر. برنجيسى: آفت، سماوى اولديغندن دفعى ممكن دگلدر. ايكنجيسى: او آفت، قصورلرينڭ جزاسى اولديغندن جنابِ حقدن مرحمت ده رجا ايديلهمز. چونكه إبطالِ حق ايچون چاليشان آدم، حقدن يارديم، مرحمت طلب ايدهمز.
(بِنُورِهِمْ) دهكى حرفِ جر اولان (ب) نور و ضيانڭ بر داها عودت ايتمهمسنه إشارتدر. چونكه (ذَهَبَ اللّٰهُ بِنُورِهِمْ) معناسى؛ اللّٰه، اونلرڭ نورلرينى گوتورمشدر. معلوم يا، اللّٰهڭ آلديغى بر شيئى كيمسه ردّ ايدهمز.
(نُورٌ) عنوانى ايسه صراط اوستندهكى حاللرينى آڭديرر. إختصاصى و حصرى إفاده ايدن (نُورٌ) ڭ (هُمْ) ضميرينه اولان إضافهسى، اونلرڭ