صوڭره ده، مدنىِ بالطَّبع اولديغندن أبناىِ جنسنڭ حقوقنى محافظه‌يه و حقّنى اونلر ايچنده آرامغه مكلّف اولان إنسانڭ آمالنى طاغيدان فكرِ إنفرادى و تصوّرِ شخصى قارشى چيقار. سز ده، (خَيْرُ النَّاسِ اَنْفَعُهُمْ لِلنَّاسِ) اولان مجاهدِ عالى همّتى مبارزه‌سنه چيقاريڭز.

صوڭره باشقه‌سنڭ تكاسلندن گوره‌نه‌ك فرصت بولوب، هجوم ايدوب بلنى قيرار. سز ده (عَلَى اللّٰهِ لَا غَيْرِهٖ فَلْيَتَوَكَّلِ الْمُتَوَكِّلُونَ) اولان حصنِ حصينى همّته ملجأ ايديڭز.

صوڭره ده عجز و نفسڭ إعتمادسزلغندن نشئت ايدن تفويض و ايشى بربرينه بيراقمق اولان دشمنِ غدّار گلييور. همّتڭ ألنى طوتوب اوطورتديرر. سز ده (لَا يَضُرُّكُمْ مَنْ ضَلَّ اِذَا اهْتَدَيْتُمْ) اولان حقيقتِ شاهقه اوزرينه چيقاريڭز. تا او دشمنڭ ألى او همّتڭ دامننه يتيشمه‌سين.