صوڭره اللّٰهڭ وظيفهسنه مداخله ايتمك اولان دينسز دشمن گلير؛ همّتڭ يوزينى طوقاتلار، گوزينى كور ايدر. سز ده (اِسْتَقِمْ كَمَا اُمِرْتَ ۞ وَلَا تَتَاَمَّرْ عَلٰى سَيِّدِكَ) اولان كارآشنا و وظيفهشناس اولان حقيقتى گوندريڭز. تا اونڭ حدّينى بيلديرسين.
صوڭره عموم مشقّتڭ آناسى و عموم رذالتڭ يوواسى اولان ميل الراحت گلييور. همّتى قيد ايدر، زندانِ سفالته آتار. سز ده (لَيْسَ لِلْاِنْسَانِ اِلَّا مَا سَعى) اولان مجاهدِ عالىجنابى او جلاّدِ سحّاره گوندريڭز. أوت سزه مشقّتده بيوك راحت وار. زيرا فطرتى متهيّج اولان إنسانڭ راحتى، يالڭز سعى و جدالدهدر.
﴿اِنَّ لَكُمْ فِى الْمَشَقَّةِ الرَّاحَةَ اِنَّ الْاِنْسَانَ الْمُتَهَيِّجَةَ فِطْرَتُهُ رَاحَتُهُ فِى السَّعْىِ وَالْجِدَالِ﴾
❊ ❊ ❊