آلمان قدر ثروتى و قوّتى اولسه و عقلى ده وارسه، يالڭز او دعوايى قزانمق ايچون بتوننى صرف ايدهجك. ألبته او دعوايى قزانمادن أوّل باشقه شيلره أهمّيت ويرن، ديوانهدر. حتّى او دعوا او درجه تهلكه يه دوشمش كه، بر أهلِ كشفڭ مشاهدهسيله، بر يرده أجل ألندن ترخيص تذكرهسى آلان قرق آدمدن بر آدم قزانهبيلمش، اوتوز طوقوزى غيب ايتمش.
ايشته بو أهمّيتلى، عظيم دعوايى قزانديرهجق و يگرمى سنهدر تجربهلرله اونده سكزينه او دعوايى قزانديران بر دعوا وكيلى بولونسه؛ ألبته عقلى باشنده هر آدم، او دعوايى قزانديرهجق اويله بر دعوا وكيلنى وظيفه يه سَوق ايدهجك بر خدمته هر حادثهنڭ فوقنده أهمّيت ويرمگه مكلّفدر. ايشته او دعوا وكيلنڭ بريسى بلكه برنجيسى، قرآنِ معجز البيانڭ إعجازِ معنويسندن سوزولن و چيقان و تولّد ايدن رسالۀِ نور اولديغنه، بيڭلر اونڭله او دعوايى قزانانلر شاهددر.