قضا و قدرِ إلٰهى يه تسليم اولوب دشمننى عفو ايدر و بِالخاصّه مادام رسالۀِ نور درسنى ديڭله‌مشلر، ألبته مابيْنلرنده بولونان بتون كوسمكلرى بيراقمغه هم مصلحت و إستراحتِ شخصيه و عموميه، هم نور دائره‌سنده‌كى اخوّت إقتضا ايدييور.

ناصلكه دڭزلى حپسنده بربرينه دشمن بتون محبوسلر، نورلر درسيله بربرلرينه قارداش اولديلر و بزم برائتمزه بر سبب اولوب، حتّى دينسزلره، سرسريلره ده او محبوسلر حقّنده «ما شاء اللّٰه ، بارك اللّٰه» ديديرتديلر و او محبوسلر تام تنفّس ايتديلر. بن بوراده گوردم كه: بر تك آدمڭ يوزندن يوز آدم صيقنتى چكوب برابر تنفّسه چيقمييورلر. اونلره ظلم اولور. مرد و وجدانلى بر مؤمن، كوچك و جزئى بر خطا ويا منفعتله يوزر ضررى أهلِ ايمانه ويرمز. أگر خطا ايتسه ويرسه، چابوق توبه ايتمك لازمدر.

❊ ❊ ❊