فتنۀِ آخر زمانڭ ماهيتى بڭا گوروندى كه؛ او فتنه‌نڭ أڭ دهشتليسى و جاذبه‌دارى، قادينلرڭ يوزسز يوزندن چيقييور. إختيارى سلب ايدوب، پروانه گبى سفاهت آتشنه آتييور. و بر دقيقه حياتِ دنيويه يى، سنه‌لرله حياتِ باقيه يه ترجيح ايتديرييور.
بن بر گون سوقاغه باقاركن، او فتنه‌نڭ تأثيرلى بر نمونه‌سنى حسّ ايتدم. گنجلره چوق آجيدم. ديدم: «بو بيچاره‌لر كنديلرينى، بو مقناطيس گبى جذب ايديجى فتنه‌نڭ آتشندن قورتاره‌مزلر.» دييه دوشونوركن؛ بردن، او فتنه يى آتشلنديرن و تعليم ايدن إرتدادكار بر شخصِ معنوى اوڭمده تجسّم ايتدى. بن ده اوڭا و اوندن درس آلان ملحدلره ديدم:
أى جهنّم حوريلرى ايله ذوقلنمك يولنده ديننى فدا ايدن و سفيهانه ضلالتى سَوه‌رك إرتكاب ايدن و هوساتِ نفسيه لذّتى يولنده دينسزلگى و إلحادى قبول ايدن و حياتى پرستش ايدوب ئولومدن شدّتلى قورقان و قبرى خاطرينه گتيرمك ايسته‌مه ين و إرتداده يوز طوتان