بدبخت !... قطعيًا بيل كه: دينسزلك جهتيله سنڭ بو قوجه دنياڭ؛ بو ساعتدن أوّل و بو دقيقهدن صوڭره، بِالعموم سنڭ بو كائناتڭ و ماضى و مستقبلڭ و گچمش نوعڭ و جنسڭ و گلهجك مخلوقلر و نسللر و گيتمش دنيالر و ملّتلر و گلن إنسانلر و طائفهلر تمامًا معدوم و ئولودرلر. ايشته إنسانيت و عقل جهتيله علاقهدار اولديغڭ بتون او سيّار دنيالر و سيّال كائناتلر، متماديًا سنڭ ضلالتڭ صورتيله، سنڭ باشڭه دنيا طولوسى دهشتلى و حدسز ئولوملرڭ شدّتلى ألملرينى ياغديرييور. سنڭ شعورڭ وارسه، قلبڭى ياقييور. روحڭ وارسه، يانديرييور. عقلڭ سونمهمش ايسه، غملر ايچنده بوغويور. أگر بر ساعتجك سرخوشجه سفاهتڭ و پيس لذّتڭ بو نهايتسز غملره، حزنلره، ألملره مقابل گلهبيليرسه او سفاهتده قال... يوقسه، عقلڭى باشڭه آل ! او معنوى جهنّمدن قورتولمق و ايمانڭ بو دنياده دخى تأمين ايتديگى بر معنوى جنّته گيرمك و سعادتِ حياتيه يى طاتمق ايچون، قرآنڭ درسنى ديڭله. جزئى،