بر زمان أسكيشهر حپسخانه‌سنڭ
پنجره‌سنده اوطورمشدم
قارشيسنده بولونان ليسه مكتبنڭ بيوك قيزلرى اونڭ آولوسنده گوله‌رك رقص ايدركن، اونلرى، او دنيا جنّتنده جهنّم حوريلرى حكمنده گوردم. فقط بردن أللى سنه صوڭره‌كى وضعيتلرى بڭا گوروندى. اونلرڭ گولمه‌لرى أليم آغلامالرى صورتنى آلدى. اوندن بو گلن حقيقت إنكشاف ايتدى. يعنى، أللى سنه صوڭره‌كى حاللرينى معنوى و خيالى بر سينه‌ما ايله گوردم كه: او گولن آلتمش قيزدن ألليسى؛ قبرده عذاب چكييورلر، طوپراق اولمشلر. و اون دانه‌سى، يتمش ياشنده چركينلشمش، هركسڭ نظرِ نفرتنى جلب ايدييورلر. بن ده اونلره آغلادم.