بشارتلى خبرلرينڭ إجتماعى أربابِ قلب و عقولده قطعيًا شبهه بيراقمييور كه؛ اُمّتڭ إنتظار ايتديگى ذات گلديگى زمان بر عصر أوّل يازيلان بو رسالۀِ نورى كندينه پروغرام و ناشرِ أفكار ياپاجق.
هم رسالۀِ نورڭ بو عصرده إحسانى، رحمتِ إلٰهينڭ أزلى تجلّياتنڭ بر نتيجهسيدر. هر عقلى اولان و قلبى تفسّخ ايتمهمش اولان آڭلار كه؛ او أثرده بو قدر خارقهلرڭ إجتماعى تصادفى اولمايوب، آنجق دنيايى قاپلايان و علم و فندن گلن گورولمهمش متجاوز بر كفرِ مطلقڭ و ضلالتڭ تخريباتنى اوڭلهمك ايچوندر كه، او أثر بو عصرده إحسان ايديلمشدر. تاريخ و إجتماعيات علملرينه آشنا اولانلر بيليرلر كه، كُرۀِ زمين بويله دهشتلى بر عصر ياشامامشدر. مادام كه تخريبات چوق دهشتليدر. شو حالده او تخريباتى اوڭليهجك بر نورڭ گوندريلمهسى ده رحمتِ إلٰهينڭ مقتضاسيدر كه، اونڭله او مدهش كفر و ضلالت سَيْلى سد اولونهبيلسين.
الحقّ رسالۀِ نور تأسيس ايتديگى إستحكاماتِ قرآنيه ايله اويله بر سدِّ نورانى وجوده گتيرمشدر كه، زمان و زمين بوينجه بشرڭ بتون مادّى و معنوى إحتياجاتنه كافى و وافيدر.
بو ايضاحات ايله آڭلاشيلير كه: بو قدر أهمّيتلى وظائفِ قدسيه آنجق او آخر زمانده بكلهنيلن ذاتڭ گلمهسنه بر زمين حاضرلامق ايچون رسالۀِ نور او ذاتدن بر عصر أوّل گلمش اولان بر مژدهجى، بر ليسته، بر قدسى پروغرام، بر تعليمات مجموعهسيدر.