ايدن و بو زمانِ حالى ترصّد ايدن أهلِ كشفڭ كشفه مستند داها چوق بيانلرى واردر. قيصه كسهرك، سوزى اونلره بيراقييورز.
ايشته رسالۀِ نورى يالڭز بن مدح ايتمييورم؛ اونى حضرتِ قرآن مدح ايدييور، حضرتِ على (رضى اللّٰه عنه) مدح ايدييور، غوثِ أعظم (رضى اللّٰه عنه) مدح ايدييور. حضرتِ مرتضى (رضى اللّٰه عنه) جلجلوتيهسنده رسالۀِ نوره بديع دييور. شو حالده ألبته كه او بديع الزّماندر، فخر الدَوراندر.
رسالۀِ نورڭ بتون حقيقتلرى، رسالۀِ نورڭ ترجمانِ پاكنڭ بتون حياتلرى بوينجه عادتا بر پروغرام حكمنده، بتون او أساساتِ قرآنيهيه تام بر إنطباق ايله مشربِ پاكِ محمّد صلّى اللّٰه عليه وسلّمڭ نمونه و تجسّم ايتمش مثالى حالنده او نور ترجمانى خاص نور شاكردلريله سننِ پيغمبرىيى (عصم) گورولمهمش ظلمكار بر عصرڭ أشدِّ ظلمنه و إشكنجهسنه معروض قالارق
﴿تَخَلَّقُوا بِاَخْلَاقِ رَسُولِ اللّٰهِ﴾
حديثنڭ مظهرِ أكملى حالنده رونما اولمش و ترشّحاتِ قرآنيه اولان تأليفاتله و گركسه أفعال و حركاتلريله أشدِّ كفره قارشى تام مقابله و مجاهده ايدهرك جلادتِ حيدرانهلريله و خارقه شجاعتلريله أللرنده قرآنِ معجز البيانڭ ألماس قلنجى اولان رسالۀِ نور ايله كفرِ مطلقى هر يرده تعقيب ايتمشلر و مدهش بر جمعيتڭ ايمان و قرآنه اولان آزغينجه تجاوزاتنى اوڭلهمشلر و ميليونلر إنسانلرڭ رسالۀِ نورله ايمانلرينڭ تقويهسنه عمرلرينى وقف ايتمشلردر.
برنجى شعاع حقيقتلرنده بيان ايديلن آياتِ قرآنيهنڭ بر قسم رمزلرى و بعض إشاراتِ رسولُ اللّٰهڭ (عليه الصلاة والسلام) رسالۀِ نور اوزرنده طوپلانماسى، حضرتِ علىنڭ (رضى اللّٰه عنه) و غوثِ أعظمڭ (رضى اللّٰه عنه) صراحتلى و