مستثنا اولوشى بِالذّات معمارينڭ و اوستهسنڭ مهارتِ صنعتنى، لياقتنى، إقتدارينى، ذوقِ سليمنى إرائه ايدهرك لسانِ بليغانه ايله هشيار اولانلره گوسترديگى گبى، عينًا اويله ده: رسالۀِ نورڭ مِثلسز حكيمانه، نظيرسز بليغانه، گورولمهمش أديبانه قرآنِ معجز البيانڭ إعجازكار حقائقنى، لطائفِ أسرارينى، قرآنڭ إعجازينه تام موافق بر صورتده توصيفاتِ شاهانه و اُسلوبِ ممتازانهسى ايله أڭ بيوك اُدباىِ حكمايى حيران و شعراىِ بنامى حدّ الغايه إستحسان ايله حضورِ معنويسنده سرفرو ايتديرهرك أڭ معنّد دينسزلرى، زنديق فيلسوفلرى إسكات ايله ديزه گتيرمهسى، تسليمه مجبور ايتمهسى، رسالۀِ نورڭ شخصِ معنويسنڭ درجۀِ كمالنڭ أڭ قوى و مستثنا دليليدر.
سلسلۀِ توافقاتڭ حلقۀِ نورانيسندن اولارق، منتظر اولونان گلهجك او ذاتِ أكملڭ بدايتِ حالنده سفيانيلر ألنده أسارتنى سلف كشفًا بيان ايتمكدهدرلر كه، رسالۀِ نور ترجماننڭ اوتوز كسور سنهلك أسارت حياتنى عينًا گوسترمكدهدر. ديمك ترجمانِ نور، ايلريده گلهجك او ذاتڭ بر مژدهجيسى، بر طلبهسيدر.
أهلِ قلبڭ لطيف كشفلرندن بريسى ده: «او بكلهنيلن ذات بر كتاب يازاجق، گچمشده هيچ كيمسه اوڭا بڭزر بر كتاب يازمامش اولاجق.» دينيلمكدهدر. الحقّ رسالۀِ نور، بونڭ گونش گبى دليليدر. أوت اونڭ شاكردلرى قطعيًا ايمان ايدييورلر كه، شيمدىيه قدر بويله أثر گورولمهمشدر و تا بَقيامت يازيلميهجقدر.
أهلِ كشف، او نورڭ ترجمانى اولان ذاتِ نورانى مسجون النساء يعنى متأهّل اولميهجق، إختيار ياشنده اولاجق دييه بحث ايدييورلر. بو توافقڭ هر حالده باشقه وجهله ايضاح و تأويلنه لزوم يوقدر. ماضيدن يعنى بولوندقلرى زماندن إستقباله نظر