١ - سياست عالمندهكى صفحهيى مقدّمۀِ مشروطيتده إستانبوله بر طلبهسنڭ گلمهسيله حربِ عمومينڭ نهايتنه قدر اولان دورهده عينًا گورويورز.
٢ - ديانت عالمندهكى توافق ايسه، ائتلاف دولتلرينڭ إستانبولى إشغالى هنگامنده و أڭ مغرور دورهلرنده او شاكردڭ (خطواتِ ستّه) أثريله او مغرور غالبلرڭ حياسز يوزلرينه، تهلكه يوزده يوز اولديغى حالده توكوروب معنًا طوقاتلاماسى اوزرينه، او زمانكى آنقره حكومتى رسالۀِ نورڭ او شاكردينى آنقرهيه دعوت ايتمشدى. اوراده دهشتلى بر شخصده بشنجى شعاعده بيان ايديلن إشارتلرى گورهرك بتون بتون سياستى و دنيايى ترك ايدهرك وانده بر مغارهده حياتِ مباركلرينى عبادته حصر ايتدكلرى دورهيه عينًا إنطباق و توافق ايتمكدهدر.
٣ - سلطنت عالمندهكى وظيفهيه گلنجه: مشهور شيخ سعيد حادثهسندن صوڭره غربه منفايه گوندريلهرك رحمتِ إلٰهى ايله رسالۀِ نورڭ تأليفنه زمين حاضرلايوب رسالۀِ نور كمالِ حشمتله أنوارينى روىِ زمينه يايمغه باشلاديغى زماندر كه، حقائقِ ايمانيهنڭ و قرآنڭ گورولمهمش بر صورتده تعرّضه اوغراديغى بر دورهده رسالۀِ نور حيرتده قالمش، يوللرينى شاشيرمش، ايمانلرى تزلزله اوغرامش مسلمانلر ايچون بر آبِ حيات مثاليله خضر گبى اونلرڭ إمدادلرينه يتيشمش، اونلرى حيرتدن قورتارمش، دهشتدن سروره چيقارمش و رسالۀِ نور يوز بيڭلر و ميليونلر گوڭلده «استادم! استادم!» دينيلهرك ميليونلر قلبلرده قورولان معنوى تخته اوطورمش و بويلهجه رسالۀِ نور قلبلرڭ بر سلطانى اولمشدر. ايشته بو صفحه ده اوچنجى وظيفهيه عينًا توافق ايدهرك او حقيقتى إمضالامقدهدرلر.
..........
قيمتدار بر مظروفڭ ظرفنڭ ده قيمتلى اولماسى مظروفنه عائد اولمقله برابر، ناصلكه محتشم منقّش مزيَّن بر سرايڭ إحتشامى، نقشلرينڭ گوزللگى، تزييناتنڭ