مادام كه آخر زماندهكى او بكلهنيلن ذاتڭ اوچ وظيفهسندن أڭ مهمّ، أڭ قدسى، أڭ عظمتلى وظيفهسى ايمانى قورتارمقدر. او وظيفه ايسه، رسالۀِ نور ايله تمامًا ياپيلمشدر. بو دعوانڭ شاهدلرى ميليونلردر.
گونش حرارتيله، ضياسيله، ألوانِ سبعهسيله گونشدر. بز بو گونشى گوردك، گوندوزه ايردك. اويله ايسه او ايلريده گلهجك ذاتڭ او ايكى وظيفهسى گونشڭ بولونديغمز أرض مداريمزه گليشيله اولاجقدر. گچمش عصرلردهكى مجدّدلر ده بو أڭ مهمّ وظيفه ايله مستخدم اولمقله برابر، اونلر ايمانڭ و معرفتڭ نتيجهلرندن، ميوهلرندن و فيضلرندن بحث ايدهرك ايمانى قوّتلنديرمگه اوغراشمشلردى. فقط اونلرڭ زماننده ايمانڭ أساساتنه و كوكلرينه هجوم يوقدى و أركانِ ايمانيه صارصيلمييوردى.
شيمدى ايسه ايمانڭ كوكلرينه و أركاننه شدّتلى و جماعتلى بر صورتده تعرّض وار. بو كلّى تخريباتى قرآنِ معجز البيانڭ معجزۀِ معنويهسندن ترشّح ايدن رسالۀِ نور تماميله اوڭلهديگندن و حقائقِ ايمانيهنڭ أساسلرينى قلبلره يرلشديرديگندن، او بكلهنيلن ذاتڭ او مهمّ وظيفهسنڭ ياپيلمش اولديغنى كورلر بيله گورمكدهدرلر. او إنتظار ايديلن ذاتڭ ناشرِ أفكارى رسالۀِ نور اولاجق.
توافقاتِ لطيفه رسالۀِ نورڭ سلسلۀِ كراماتندن اولديغى جهتله، بشنجى شعاعڭ اون طوقوزنجى مسئلهسنده او آلِ بيتدن اولان سيّد ذاتِ منتظرڭ جملۀِ وظائفندن اولارق ١ - سياست عالمنده ٢ - ديانت عالمنده ٣ - سلطنت عالمنده ٤ - جهاد عالمنده اولمق اوزره إجرا ايتديگى وظيفه دائرهلرى، رسالۀِ نورڭ تاريخچۀِ حياتيله تام مشابهتى و إلتباسسز توافقاتى چوق أهمّيتليدر. ديمك نور رسالهلرى او گلهجك ذاتڭ بر مژدهجيسى، بر طلبهسيدر، چابوق گلن بر نفريدر. بز ده او حياتِ مباركڭ درت آيرى صفحاتنده عينًا بو دائرهلرى مشاهده ايدييورز: