ييلديزلرينى تماشا ايدن بختيارلر اونڭ خدمتِ پاكنده، دائرۀِ قدسيسنده مطيع، صادق، فداكار بر پيك حيثيتيله بتون موجوديتلرينى اوڭا فدا ايدييورلر.
فهمِ قاصرانهم و إدراكِ عاجزانهمله رسالۀِ نورڭ مدحنى ياپاجق قدرتده اولماديغمى مُدْرِكم. ناصل ياپابيليرم كه؟ اونڭ حقيقتلرينى مدح ايدن قرآنِ معجز البياندر، حيدرِ كرّار شاهِ جهاندر، حضرتِ باز الأشهب غوث الثقلينِ آسماندر.
أى نور! سڭا جانان ايله جانم ده فدادر
فردوسِ معلاّ دييه آڭساق ده سزادر.
أى لطفِ خدا! زمزمۀِ برقِ گزينڭ
شاكرديڭه بر نور، كافره بر سيفِ خدادر.
رسالۀِ نور مادام كه قرآنِ معجز البيانڭ إعجازِ معنويسندن سوزولدى. ألبته سماويدر. اويله ايسه ديرز: أى إلهامِ قدسى! گونش مجلاّ جسملرده معكس بولور. اويله ايسه نزولگاهڭ اولان قلبلر ده سنڭ گبى أشسزدر. ألبته سن وراثتِ نبويهنڭ آيينهدارلغنه مظهر بر آيينۀِ مجلاّدن إنعكاس ايتدڭ.
عالمِ إسلامڭ عصرلردر بكلهديگى، إن شاء اللّٰه أللى سنه صوڭره گلهجك اولان مهدئِ منتظرڭ دگل، بلكه مجدّدِ أكبرڭ بر إرتسامنى سنڭ سطحِ مجلاّڭده گورويورز. سن اويله بر مقامِ منوّردن نوعِ بشره و آفاقِ إسلاميته طلوع ايتدڭ كه، أى تحفۀِ إلٰهى! سنڭ گوزل قوقولرڭ، يتيشديگڭ حديقهنڭ مثلسزلگنه شاهددر. رايحۀِ طيّبهنڭ خاصيتى، عائد اولديغى چيچگى إشمام ايدر. معنا إشارتيله پارمغنى اوڭا اوزاتير. ايشته سن ده يتيشديگڭ بر قلب باغچهسنى، سنى گورنلره تماشا ايتدرييورسڭ كه؛ شو دهشتلى عصرده أى رسالۀِ نور! بر وارثِ پيغمبريسڭ، بر دلاّلِ قرآنسڭ، بر خادمِ ايمانسڭ، بر وكيلِ نبىِّ ذىشانسڭ.