اون ايكنجى نكته:
ايكى كوچك مسئلهدر:
برنجيسى: رسالۀِ نور طلبهلرينڭ محاكمه و إستنطاق دائرهسنده بر قسمى هوا و وهم يوزندن دشمنه قارشى سپره گيرمك لازم دييه ياڭليش تأويللريله مبارك خدمتلرينى إنكاره گيدهرك خطا ايدوب دينسز دشمنلرينى داها زياده شبههيه، تحرّىيه سوق ايتدكلرندن هم كنديلرى فضله أزيلدكلرينى، هم استادلرينى شاهدسز يالڭز بيراقدقلرندن زحمت ويردكلرينى بيان ايله، عقلى باشنده اولانه تنقيد دگل تنبيه و إستقامتى و إعتدالى توصيه ايدييور.
ايكنجى مسئله: سجيۀِ عاليۀِ صحابهيى و مشربِ نورانئِ پيغمبرىيى بيان ايدن رسالۀِ نور دائرهسندهكى فيضه قناعت ايتمهيوب بر قسم قارداشلريمزڭ طريقت هوسيله، فائدهسز، ضررلى باشقه بر صحبتده بولوندقلرندن، بدايتده سببِ إتهام إسپارطهده بويله بر كوستريشڭ دخلى وار اولديغى تحقق ايدوب، مسلكِ حقيقتله مسلكِ طريقت شاكردلرينڭ مقاملرينى گوسترن بر درسِ ايقاظِ حقيقتدر.
اون اوچنجى نكته:
رسالۀِ نور طلبهلرندن بش قارداشمزدن اوچينڭ إحتياطسزلغى و ايكيسنڭ شخصلرينه باشقهلرڭ غرض ايتمهلريله، رسالۀِ نوره دشمنلرينڭ هجوم ايتدكلرندن هركس مدافعهدن چكيلسه، بو بش قارداشمزڭ چكيلمهمسى لازم گلديگنى بيان ايدن كوچك بر فقرهدر.
اون دردنجى نكته:
ناصلكه مثنوئِ شريف شمسِ قرآندن تظاهر ايدن يدى حقيقتدن بر حقيقتنڭ آيينهسى اولمش، قدسى بر شرف آلمش. مولويلردن باشقه داها چوق أهلِ قلبڭ لا يموت بر مرشدى اولمش. اويله ده رسالۀِ نور شمسِ قرآنڭ ضياسندهكى ألوانِ سبعهيى و او گونشدهكى رنك رنك و چشيد چشيد يدى نورى بردن آيينهسنده تمثّل ايتديرديگندن إن شاء اللّٰه يدى جهتله شريف و قدسى