يدى مثنوى قدر أهلِ حقيقته باقى بر رهبر و بر مرشد اولاجغنى مژده ايدر. إن شاء اللّٰه نورڭ عربى مثنويسى بو دعوايى تام تصديق ايدهجك.
اون بشنجى نكته:
حفيظِ ذو الجلالڭ حفظ و حمايتيله رسالۀِ نورڭ رسالهلرينه موافق اولارق موقوف بولونان يوز يگرمى كسور نور طلبهلرينڭ محرم أوراقلرنده، داخلى و أجنبى مخالف قوميتهلره إنتساب ايله مدارِ إتهام اولاجق موجود بر أوراق بولونمامسى غايت ظاهر بر حمايۀِ ربّانيه و بر محافظۀِ إلٰهيه و إمامِ على و غوثِ أعظم رضى اللّٰه عنهما گبى ذاتلرڭ رسالۀِ نوره عائد كرامتِ غيبيهلرينى جدًّا تأييد ايدن بر صيانتِ رحمانيه اولديغنى و بو بيوك نعمته قارشى تحديثِ نعمت يرنده حقيقت يولنه حياتمزى فدا و وقف ايتمهمز لازم گلديگنى بيان ايدن و هر شيده رحمتڭ ايزينى، يوزينى، ئوزينى گورمگه چاليشمغه تشويق ايدن بليغ بر نكتهدر.
اون آلتنجى نكته:
رسالۀِ نور طلبهلرينڭ حپسخانه صيقنتيسندن طولايى بربرلرينڭ غليظ سوزلرينه تحمّلى توصيه ايدر.
اون يدنجى نكته:
﴿فَلَمَّا نَسُوا مَا ذُكِّرُوا... اَخَذْنَاهُمْ﴾
آيتى أهلِ عصيان حقّنده نازل اولديغى حالده، بر إشارتله ده رسالۀِ نور شاكردلرى متعدّد و مؤثّر و قوّتلى ويريلن درسِ إخلاصده نسيان ايدوب آيرى آيرى خطالرده بولونمهلرندن (اَخَذْنَاهُمْ) ڭ جفرى تاريخيله بيڭ اوچ يوز أللى ايكيده عين تاريخده طوتديريلمالرى و ينه لِلّٰه الحمد عمومڭ ألمنه إشتراك ايدوب مادّى و معنوى مدافعه و يارديم ايدن رسالۀِ نورڭ قدسى شخصِ معنويسى ايله و صارصيلماز دهاسيله بو قضاءِ إلٰهيدن خارقه بر صورتده قورتولمالرينه إشارت ايدر.
اون سكزنجى نكته:
هر باشه گلن شيئڭ ايكى يوزى اولوب، برى قدرِ إلٰهىيه، ديگرى إنسانڭ كسبنه باقديغنى و إنسانڭ كسبى ظاهر بر پرده اولوب قدرِ