سنّتِ سنيه دائرهسندهكنى گوسترديگى گبى، إنسانڭ أڭ مهمّ بر سرمايهسى اولان عمرينڭ تزييدينه و مهمّ بر غايهسى اولان رزقنڭ بركتنه يارديم ايدن وقتلرينى درس ويرمكله؛ أحسنِ تقويمده ياراديلان إنسانى يوكسك أخلاقِ حسنهيه چيقاروب عطالتدن، بطائتدن قورتارير.
اوننجى نكته:
نوعِ بشرڭ آغلاناجق گولمهلرينه عائد أنديشۀِ إستقبال و عاقبتبينلك عدسهسيله و
﴿كُلُّ اٰتٍ قَرٖيبٌ﴾
سرّيله، حق و حقيقت موازنهسيله گورولن بر وضعيتِ مأيوسانه ايله، شعشعهلى بر بايرام گيجهسنده حپسخانه پنجرهسندن باقاركن او گولنلرڭ حالى آغلاناجق بر حال اولديغنى و أبدپرست و بقايه عاشق إنسانلرڭ قلب و روحنى گولديرهجك و سَوينديرهجك مشروع دائرهسنده متشكّرانه، حضوركارانه، غفلتسز أگلنجهلر و ثواب جهتيله باقى قالان سَوينجلر اولديغنى إخطار ايدن عبرتنما بر فقرهدر.
اون برنجى نكته:
رسالۀِ نور طلبهلرينه مهمّ بر دستوردر كه، بيڭ اوچ يوز سنهدر إشاراتِ قرآنيه و ثناءِ نبويه ايله بكلهنيلن (حاشيه) و بو عصرڭ قراڭلقلى پچهسنى قالديروب دنيايى تنوير ايدن و صحابهنڭ سرِّ وراثتِ نبوّت مشربنى مسلك طوتان و بتون عالمِ إسلام نامنه دينسزلكله مجاهده ايدن رسالۀِ نورڭ خارجنده اونڭ طلبهلرى اونى بيراقوب باشقه يرده نور آراماملى و آرانماز. أگر آراسه نور يرينه ظلمت و تجارت يرينه خسارته اوغرايهجغنى إخطار ايدن مجرّب و محقّق الوقوع حادثاتى گورولن بر فقرهدر.
___
(حاشيه): شهيد مرحوم حافظ علىنڭ بو گبى مقاملرده بياناتى گرچه رسالۀِ نوره خدمتيله سائر قارداشلريمه و بڭا ده حدّمدن چوق فضله حصّه ويرييور. فقط اونڭ خاطرى ايچون سكوت ايدرم.