يالڭز بر ايكى سنه صوڭره نورڭ بر كوچك طلبهسى رسالۀِ نوره ضرر گلهجك ظنّيله كندينى إنتحار ايدهجكدى كه، طبع ايتديگى بر كوچك رسالهيه ضرر گلمهسين. صوڭره استادى اونى منع ايتدى و كوچوجك بر حادثه اولدى و ايكيسى ده باريشديريلدى.
حالبوكه بر استادڭ اون دانه فداكار طلبهسى بولونسه (حتّى برى سلام ايتمش طوقات وورولمش، برى ألنى اوپمش تحقير ايديلمش) هيچ بر فداكارى، آسايشه ايليشمهمك ايچون سكوت ايتمشلر. سعيددن ايشيتمشلر كه: بنم يوز روحم اولسه، آسايشه فدا ايدييورم. اونڭ ايچون (وَلَا تَزِرُ وَازِرَةٌ وِزْرَ اُخْرٰى) قانونِ أساسيسيله؛ بش جانى يوزندن طقسان معصومه ضرر گلمهمك، بر جانى يوزندن اون معصوم چولوق چوجق، پدر و والدهلرينه ظلم ايتمهمك ايچون، رسالۀِ نور ايمان خدمتيله برابر آسايشى تماميله تأمين ايدوب هركسڭ قلبنده فنالغه قارشى بر ياساقجى بيراقييور. بن ده بيڭ روحم اولسه، قرآنڭ بو قانونِ أساسيسنه فدا ايتديگمى تاريخچۀِ حيات إثبات ايدييور و ميداندهدر. و محكمهلر ده قبول ايتمشلر.
حتّى تظاهره بر رياكارلق، بر خودفروشلق، بر أنانيت معناسنى ويروب خلقلرله گوروشمگى ده ترك ايتديگى و رحمتِ إلٰهيهنڭ إحسانى ايله سسى ده كسيلمش كه، دوستلرله گورشمگه مجبور اولماسين و خاطرلرى ده قيريلماسين.
سعيد النورسى
* * *