بڭا ديدى كه:
«اوتوز قرق سنه بو تضييقاتمده، حقوق اللّٰه معناسنده اولان حقوقِ عامّه نامندهكى وظيفهلرله موظّف اولان صاوجيلر أكثر حپسلرمده، نفيمده شدّتلرينى گورديگم حالده اونلره قارشى بر حدّت، بر كوسمك بڭا گلمييوردى.
صوڭره گورويوردم: اونلرڭ ظاهرى شدّتنه سبب اولان قصورلرى كنديلرنده گورمييوردم. فقط چوق دفعه بر زمان صوڭره، قدرِ إلٰهينڭ باشقه قصوراتمه بناءً شفقت طوقادينڭ اويله صاوجيلرڭ أليله گلديگنى گوردم. قدر عدالت ياپديغى ايچون، او شفقت طوقاتنى روح و قلبمله قبول ايتدم. ظاهرى سببه بناءً صاوجيلرڭ شدّتنى حلال ايدييورم.
شيمدى جنابِ حقّه شكر، او مدّعى عموميلرڭ بر قسمى، وظيفهلرى اولان حقوقِ عموميهنڭ مدافعهسى حقوق اللّٰه نوعندن اولديغى جهتله، بڭا قارشى شدّت دگل، بِالعكس حقيقى عدالت نقطهسنده، عموم إسلاميته و بلكه إنسانيته ده منفعتى اولان رسالۀِ نورڭ خدمتِ ايمانيهسى جهتيله شدّتى بيراقوب قدرِ إلٰهينڭ شفقت طوقاتنه باقار گبى ظاهرى تعذيب، حقيقةً يارديم حكمنه گچديگى ايچون، بن ده بو سرِّ عظيم مناسبتيله، بتون بويله مدّعى عموميلره قارشى بر دوستلق و دعا ايتمك وضعيتنى آلدم. ظاهرًا بڭا قارشى شدّتِ حكم گورونن حالات، او خدمتِ ايمانيهيه بر إعلاننامه حكمنه گچدى.