﴿بِاسْمِهٖ سُبْحَانَهُ﴾
آنقرهيه بو دفعه گلديگمڭ مهمّ بر سببى، إسلاميته جدّى طرفدار داخليه وكيلى نامق گديكى گورمك و إسلاميتڭ قهرمانى اولان عدنان بگه و توفيق ايلرى گبى مهمّ ذاتلره بر حقيقتى سويلهمكدر كه:
هم دموقراته أذانِ محمّدى گبى چوق قوّت ويرمك و رسالۀِ نورڭ نشرينه مساعدهسى گبى چوق طرفدار اولمق و عالمِ إسلامى، حتّى بر قسم خرستيان دولتلرينى ده ممنون ايتمك ايچون، آياصوفيايى مزخرفاتدن تميزلهيوب عبادت محلّى ياپمقدر. بن ايسه؛ بو مسئله ايچون اوتوز سنه سياستى ترك ايتديگم حالده، بو نقطه خاطرى ايچون نامق گديكى گورمك ايستدم و گلدم. عدنان بك، نامق گديك و توفيق ايلرى گبى ذاتلرڭ خاطرى ايچون باشقه يره گيتمهدم.
هم رسالۀِ نور، قرآنڭ قانونِ أساسيسيله بتون آناطولى و ولاياتِ شرقيهده آسايشى تأمين ايدن رسالۀِ نورڭ بشيوز بيڭ نسخهسى قومونيستلگى صوصديرديغى گبى، آسايشى تأمين ايتديگنه بر دليلى بودر كه: اون كسور سنه أوّل آفيون مدّعى عموميسى «آلتى يوز بيڭ فداكار طلبهسى وار. بش يوز بيڭ نسخه رسالۀِ نوردن نشر ايتمش، بلكه آسايشه ضرر گلير.» ديدى. اوڭا قارشى سعيد ديمش كه: مادام آلتى يوز بيڭ فداكار طلبهسى وار. بو اون بش سنهدر بڭا بو قدر ظلم ايديلييور. بر تك وقوعاتى هيچ بر ضابطه و محكمه گوسترهمدى.
هم ديدم: أى مدّعى عمومى! أگر بيڭ مدّعى عمومى، بيڭ أمنيت مديرى قدر آسايشڭ تأميننه رسالۀِ نور خدمت ايتمهمش ايسه، اللّٰه بنى قهر ايتسين. سز ده بڭا نه جزا ويررسهڭز ويرڭ ديدم. او بو سوزيمه قارشى هيچ بر چاره بولامادى.