فائدهسى قدر، اون بش هفته رسالۀِ نور فائده ويرمش.» بونى حپسدهكى رهبرى يازانه سويلهمشلر. مؤلّفى ده ديمش: يوز اوتوز كتابدن عبارت اولان رسالۀِ نور و اونڭ كوچك بر پارچهسى اولان رهبرى، تماميله اولماسه ده اوقويان آدم، ألبته اون بش سنه حپسدهكى جزادن، مدرسهده درس اوقومق قدر إستفاده ايدر، إصلاحِ حال ايدر، فنالقلردن توبه ايدر. عجبا بويله بر تمنّى، بر تشويق و بنى حپسه صوقانلر ده تصديق ايتدكلرى حالده، صوچ اولابيلير مى؟
اوچنجيسى: «تستّر و تربيۀِ إسلاميه طرفداريدر» دييه صوچ گوسترمش.
بو ايسه هم أسكيشهر، هم دڭزلى، هم آفيونده، هم آفيونڭ محكمهسنڭ قرارنامهسنده ده نشر ايديلديگى گبى؛ اون بش سنه أوّل أسكيشهرده تستّر طرفدارلغم ايچون محكمه بڭا ايليشمش. بن ده هم محكمهيه، هم محكمۀِ تمييزه بو جوابى ويرمشم:
بيڭ اوچ يوز أللى سنهده و هر عصرده اوچ يوز أللى ميليون مسلمانلرڭ قدسى بر دستورِ حياتِ إجتماعيسى و اوچ يوز أللى بيڭ تفسيرڭ معنالرينڭ إتّفاقلرينه إقتداءً و بيڭ اوچ يوز أللى سنهده گچمش أجدادلريمزڭ إعتقادلرينه إتّباعًا تستّر حقّندهكى بر آيتِ كريمهيى تفسير ايدن بر آدمى إتهام ايدن، ألبته زمين يوزنده عدالت وارسه، بو إتهامى شدّتله ردّ ايدر و او إتهامه گوره حكم ويريلسه نقض و ردّ ايدهجك.
بو آيتِ كريمهنڭ تستّر أمرى قادينلره بيوك بر مرحمت اولديغنى و قادينلرى سفالتدن قورتارديغنى، رسالۀِ نور قطعى إثبات ايتديگى گبى، سبيل الرّشادڭ يوز اون بشنجى صاييسندهكى: «أهلِ ايمان آخرت همشيرهلريمه» عنوانى اولان بر مقالهم إثبات ايدر.