أزجمله: بن حرّيتدن أوّل إستانبوله گليركن يولده (بر ايكى مهمّ) علمِ كلامه عائد كتابلر أليمه گچدى. دقّتله مطالعه ايتدم. إستانبوله گلدكدن صوڭره، سببسز اولارق هم علمايى، هم مكتب معلّملرينى مناظرهيه «كيم نه ايسترسه بندن صورسون» دييه إعلان ايتدم. مدارِ حيرتدر كه؛ مناظرهيه گلنلرڭ بتون صوردقلرى سؤاللر، يولده مطالعه ايتديگم و حافظهمده قالديغى مسئلهلردى. هم فيلسوفلرڭ صوردقلرى سؤاللر، حافظهمده بولونان مسئلهلردى. شيمدى آڭلاشيلدى كه؛ او فوق العاده موفّقيت و بنم ده حدّمدن چوق زياده او خودفروشلق و معناسز إظهارِ فضيلت ايسه، ايلريده رسالۀِ نورڭ إستانبولجه و علماجه مقبوليتنه و أهمّيتنه زمين حاضر ايتمك ايمش.
ايكنجيسى: حتّى بن، فقير و محتاج اولديغم و زاهد و صوفى و رياضتجى اولماديغم و بيوك بر شرف و حيثيت و خانَدانلق حيثيتندن، شان و شرفندن حصّهدار اولماديغم حالده، (تاريخچۀِ حياتمده يازيلديغى گبى) كوچكدن بَرى خلقلرڭ ماللرينى، هديهلرينى قبول ايدهمييوردم؛ إحتياجمى إظهاره تنزّل ايدهمييوردم. بنى بيلنلر گبى، بن ده چوق حيرت ايدردم. شيمدى خاصّةً بر قاچ سنه ظرفنده آڭلاشيلدى كه؛ رسالۀِ نورڭ دهشتلى بر مجاهدهسنده، طمع و مال يوزندن مغلوب اولمامق و إعتراض گلمهمك ايچون او حالتِ روحيه بزه إحسان ايديلمشدى. يوقسه دشمنلرم، او جهتدن بيوك بر ضربه اينديرهجكديلر.
هم أزجمله: أسكى سعيد سياستده چوق ايلرى گيتديگى حالده، يڭى سعيد ده طرفدار بولمق ايچون چوق محتاج اولديغى زمانده بتون إنسانلرى مشغول ايدن بو بش آلتى سنهدهكى بشر طوفانلرى، سياست فورطنهلرى ايچنده قطعا و أصلا بنى مشغول ايتمدى و مراقله مغلوب ايتمدى و بش سنه، بيلمگى مراق ايتمدم.