عزيز، صدّيق قارداشلرم!
رسالۀِ نورڭ ظهورى حسِّ قبل الوقوع ايله كلّى بر صورتده حسّ ايديلمهسى گبى؛ رسالۀِ نورڭ خاص طلبهلرينڭ بر قسمنڭ إعترافيله و بر قسمنڭ طرزِ حياتى رسالۀِ نور گبى بر خدمته نامزدلگنى گوسترديگى جهتله بو تتمّهيى يازييورم:
أوت حسِّ قبل الوقوع هركسده جزئى كلّى واردر، حتّى حيواناتده دخى واردر. حتّى رؤياىِ صادقهنڭ أهمّيتلى بر قسمى، بو حسِّ قبل الوقوعڭ نوعندندر؛ حتّى بعضلرده حسّاسيت جهتيله كرامت درجهسنه چيقار. بنم أعصابمدهكى حسّاسيتله ياغموردن يگرمى درت ساعت أوّلكى رطوبتِ هوائيه ايله ياغمورڭ گلمهسنى حسّ ايتمهم، بر جهتده حسِّ قبل الوقوع صاييلابيلير و بر جهتده صاييلماز.
بن رسالۀِ نوره أهمّيتلى خدمت ايدن قارداشلريمڭ طرزِ حياتلرينه دقّت ايتدم، گوردم كه؛ عين بنم گذرانِ حياتم گبى، رسالۀِ نور گبى بر نتيجهيه گوره تجهيز ايديلوب سوق ايديلمش.
أوت خسرو، فيضى، حافظ على، نظيف گبى چوق قارداشلريمزڭ گچن طرزِ حياتلرى بو خدمتِ نوريهيه گوره بر وضعيت ويريلديگنى اونلر حسّ ايتدكلرى گبى؛ بن ده چوق خاص قارداشلرمده، حتّى بوراده عينًا طرزِ حياتم گبى بويله بر نورانى ميوهيى ويرمك ايچون تنظيم ايديلمش گورويورم. حسّ ايتمهين قسمى، دقّت ايتسهلر حسّ ايدهجكلر. بن كندم، بتون حياتمڭ خارقه قسمنى، أوّلجه غوثِ أعظمڭ بر سلسلۀِ كرامتى تلقّى ايدييوردم؛ شيمدى رسالۀِ نورڭ بر سلسلۀِ كرامتى اولديغى تبيّن ايتدى.