بنى بيلنلر گبى، بن ده بو حاله چوق حيرت ايدردم. حتّى كندى كنديمه دير ايدم: «عجبا بن مى ديوانه اولمشم كه، بتون دنيايى كنديله مشغول ايدن بو حادثاته باقمييورم، أهمّيت ويرمييورم. يوقسه إنسانلر مى ديوانه اولمشلر؟» دييه حيرت ايچنده ايدم. شيمدى هم معنوى إخطارله، هم مذكور حسِّ قبل الوقوع ايله، هم ميداندهكى رسالۀِ نورڭ غلبه و سربستيتى ايله تحقّق ايتدى كه: رسالۀِ نوردهكى حقيقتِ إخلاص، رضاىِ إلٰهيدن باشقه هيچ بر شيئه آلَت و تابع اولاماز و قرآندن باشقه هيچ بر نقطۀِ إستنادى اولماديغنى إثبات ايتمك ايچون او عجيب حالتِ روحيه ويريلمش.
سعيد النورسى
* * *
عزيز، صدّيق قارداشلرم!
ميوهنڭ دردنجى مسئلهسندهكى بر حقيقتڭ ايضاحنى أسكى سعيدڭ آفاقه باقمق طماريله و بڭا خدمت ايدن كاتبڭ رمضان باشلرنده بايرام علامتنى شرقده بر حادثهنڭ تأثيريله هيجانله ديمسى و بو رمضانِ شريفدهكى قيمتدار وقتلرى راديونڭ مالايعنياتيله ضايع ايتمهمسى ايچون معنًا قلبمه قاچ دفعه إخطار ايديلدى كه؛ او گنيش و قاريشق فورطنهلى حقيقتڭ قيصهجه ضررلرينى بيان أيله. بن ده غايت مختصر بعض إشارتلر نوعنده، رسالۀِ نور شاكردلرينڭ مراقلرينى تعديل ايتمك نيّتيله بيان ايدييورم. فقط هم مسئله چوق گنيش، وقتم ده طار، حالم ده پريشان اولماسندن، آڭلاماسنده زحمت چكهجكسڭز، ذكاوتڭزه گووهنييورم.
ميوهنڭ او دردنجى مسئلهسنده دينيلمش كه:
«دنيا سياستنه قاريشماديغمڭ سببى: او گنيش و بيوك دائرهده وظيفه آز و كوچك اولمقله برابر، جاذبهدارلق جهتيله