اون بش دليلدن برنجيسى:
(فَالْاِنْتِظَامَاتُ الْمَوْزُونَةُ) در. يعنى: بتون مخلوقاتده مشاهده ايديلن ئولچولى دوزگونلك، ميزانلى إنتظام؛ إحاطهلى بر علمه شهادت ايدر. أوت منتظم بر سراى گبى كائناتدن و منظومۀِ شمسيهدن و كلمهلر و سسلرڭ نشرنده ذرّهلرى مدارِ حيرت بر إنتظام گوسترن هوا صحيفهسندن و اوچ يوز بيڭ آيرى آيرى نوعلرى هر بهارده بر إنتظامِ أكمل ايچنده يتيشديرن زمين يوزندن طوت، تا هر بر ذىحياتڭ وجودندهكى أعضا و جهازات و حجيرات و ذرّهلره قدر درين، إحاطهلى، شاشيرماز بر علمڭ أثرى اولان ميزانى دوزگونلك و تام إنتظام بولونماسى؛ غايت ظاهر و قطعى بر صورتده إحاطهلى بر علمه دلالت و شهادت ايدر ديمكدر.
ايكنجى دليل:
(وَالْاِتِّزَانَاتُ الْمَنْظُومَةُ) در. يعنى: بتون كائناتدهكى مصنوعاتده (جزئى، كلّى) سيّاراتدن تا قاندهكى كريواتِ حمراء و بيضايه قدر هر شيده غايت دوزگون بر ئولچو، متناسب بر ميزان بولونماسى؛ بداهتله محيط بر علمه دلالت و قطعى شهادت ايدر. أوت، گورويورز كه: مثلا بر سينگڭ، بر إنسانڭ أعضالرى و جهازاتى، حتّى جسدينڭ حجيراتى و قانندهكى قيرمزى و بياض كرهجكلرى او درجه حسّاس بر ميزان و اينجه بر ئولچو ايله يرلشديريلمش و او درجه بربرينه مناسب و اويغون و جسدڭ سائر أعضالرنده اويله منتظم بر تناسب وار كه؛ نهايتسز بر علمه مالك اولميان، او وضعيتى اونلره ويرمهسى هيچ بر جهتده إمكانى يوق.
ايشته عينًا بتون ذىحيات و أنواعِ مخلوقات، ذرّاتدن تا منظومۀِ شمسيهدهكى سيّاراته قدر؛ اويله تام بر موازنه و ذرّه قدر شاشيرماز بر دوزگون ئولچو حكم ايتمهسى، إحاطهلى بر علمه قطعى دلالت و پارلاق شهادت ايدر. ديمك علمڭ هر دليلى، ذاتِ عليمڭ موجوديتنه دخى دليلدر. صفت موصوفسز اولماسى محال و إمكانسز اولماسندن، بتون حجّتلرى عليمِ أزلينڭ وجوبِ وجودينه قوّتلى و غايت قطعى بر حجّتِ كبرادر.
اوچنجى دليل:
(وَالْحِكَمُ الْقَصْدِيَّةُ الْعَامَّةُ) در. يعنى: بتون كائناتدهكى خلاّقيت و فعاليتده و تبدّلات و إحيا و توظيفات و ترخيصاتده بتون مصنوعاتڭ هر برى و هر بر طائفهنڭ تصادف إمكانى اولميان اويله قصدى و بيلهرك طاقيلان حكمتلرى و فائدهلرى و وظيفهلرى وار و گورويورز كه؛ إحاطهلى بر علمى بولونميان، هيچ بر جهتده، هيچ بريسنه ايجاد نقطهسنده صاحب چيقاماز. مثلا: حدسز ذىحياتدن بر إنسانڭ يوز جهازاتندن بر تك جهازى اولان لسانى؛ بر أت پارچهسى ايكن، ايكى بيوك وظيفهسيله يوزر حكمتلره، نتيجهلره، ميوهلره، فائدهلره آلَت اولويور. طعاملرڭ ذوقندهكى وظيفهسى، آيرى آيرى بتون طاتلرى بيلهرك جسده، معدهيه خبر ويرمك و رحمتِ إلٰهيهنڭ مطبخلرينه دقّتلى بر مفتّش اولمق و كلمهلر وظيفهسنده قلبه و روحه و دماغه تام بر ترجمان و سانترال اولمق؛ ألبته غايت پارلاق و قطعى بر صورتده إحاطهلى علمه دلالت و شهادت ايدر. بر تك ديل، حكمتلرى و ميوهلريله بويله دلالت ايتسه؛ حدسز لسانلر و حدسز ذىحياتلر، نهايتسز مصنوعات، گونش ظهورنده و گوندوز قطعيتنده نهايتسز بر علمه دلالت و شهادت و علاّم الغيوبڭ دائرۀِ علمندن و حكمتندن و مشيئتندن خارج هيچ بر شى يوقدر دييه إعلان ايدرلر.
دردنجى دليل:
(وَالْعِنَايَاتُ الْمَخْصُوصَةُ الشَّامِلَةُ) در. يعنى: بتون ذىحيات، ذىشعور عالمنده، هر نوعه و هر فرده، خصوصى و اوڭا مناسب و عمومه شامل عنايتلر، شفقتلر، حمايتلر؛ بداهت درجهسنده إحاطهلى بر علمه دلالت و او عنايتلره مظهر اولانلرى و إحتياجلرينى بيلن بر عليمِ عنايتكارڭ وجوبِ وجودينه حدسز شهادتلر ايدر، ديمكدر.
إخطار:
رسالۀِ نورڭ خلاصة الخلاصهسنڭ زبدهسى اولان عربى فقرهدهكى كلمهلرڭ ايضاحى ايسه؛ قرآندن ترشّح ايدن رسالۀِ نورڭ آياتِ قرآنيهنڭ لمعاتندن آلديغى حقيقتلره، خصوصًا «علم» و «إراده»يه و «قدرت»ه دائر دليللره و حجّتلره إشارتدر كه؛ بو عربى كلمهلرڭ إشارت ايتدكلرى او علمى دليللر، أهمّيتله تفسير ايديلييور. ديمك هر برى، چوق آياتڭ برر إشارت و برر نكتهسنى بيان ايتمكدر. يوقسه او عربى كلمهلرڭ تفسيرى و بيانى و ترجمهسى دگلدر.
صدده دونويورز. أوت گوزيمزله گورويورز كه؛ بزلرى و بتون ذىروحلرى بيلير و بيلهرك شفقتله حمايه ايدر و إحتياجنى و هر دردينى بيلير و بيلهرك عنايتيله إمدادينه يتيشير بر عليمِ رحيم وار. حدسز مثاللرندن بريسى: إنسانڭ رزق و علاج و محتاج اولديغى معدنلر جهتنده گلن خصوصى و عمومى عنايتلر، پك ظاهر بر صورتده بر علمِ محيطى گوسترر و بر رحمٰنِ رحيمه رزق، علاج، معدنلرڭ عددنجه شهادتلر ايدرلر. أوت إنسانڭ خصوصًا عاجزلرڭ و ياورولرڭ إعاشهلرى و بِالخاصّه معده مطبخندن جسدڭ رزق ايستهين أعضالرينه، حتّى حجيرهلرينه هر برينه مناسب رزقنى يتيشديرمهلرى و طاغلر بر أجزاخانه و إنسانه لازم بتون معدنلرڭ بر آنبارى اولمالرى گبى حكيمانه ايشلر، غايت إحاطهلى بر علم ايله اولابيلير. سرسرى تصادف، كور قوّت، صاغير طبيعت، جامد، شعورسز أسباب، بسيط، إستيلاجى عنصرلر؛ هيچ بر جهتده بو عليمانه، بصيرانه، حكيمانه، مرحمتكارانه، عنايتپرورانه اولان إعاشه و إداره و حمايت و تدبيره قاريشهمازلر. يالڭز او ظاهرى أسباب؛ عليمِ مطلقڭ أمريله، إذنيله، علم و حكمتى دائرهسنده بر پردۀِ عزّتِ قدرتِ إلٰهيه اولارق إستعمال و إستخدام ايديلمهلرى وار.
بشنجى و آلتنجى دليل:
(وَالْاَقْضِيَّةُ الْمُنْتَظَمَةُ وَالْاَقْدَارُ الْمُثْمِرَةُ) در. يعنى: هر شيئڭ، خصوصًا نباتات و أشجار و حيوانات و إنسانلرڭ شكللرى و مقدارلرى، علمِ أزلينڭ ايكى نوعى اولان قضا و قدرڭ دستورلريله صنعتكارانه بيچيلمش و هر برينڭ قامتنه گوره تام مناسب ديكيلمش، مكمّل گيديرلمش، غايت منتظم برر حكمتلى شكل ويريلمش. اونلر، هر برى و برابر، بر نهايتسز علمه دلالت و بر صانعِ عليمه عددلرنجه شهادت ايدرلر ديمكدر.
أوت مثلا نمونه اولارق حدسز مثاللرندن يالڭز تك بر آغاج و بر فردِ إنسانه باقييورز، گورويورز كه: بو ميوهلى آغاج، او چوق جهازاتلى إنسان؛ هيچ بر رسّام تام تقليدينى ياپاميهجق درجهده ظاهرى و باطنى، طيش و ايچى اويله بر غيبى پرگارله و اينجه بر علمڭ قلميله حدودلرى چيزيلمش و تام إنتظامله هر أعضاسنه مناسب صورت ويريلمش كه، ميوه و نتيجهلرينه و وظيفۀِ فطرتلرينه يتيشسين. بو ايسه نهايتسز بر علم ايله اولابيلمهسى جهتيله هر شيئڭ هر شيله مناسبتنى بيلوب و نظره آلان و بو آغاج و بو إنسانڭ بتون أمثاللرينى و نوعلرينى علمِ أزليسنڭ قضا و قدر پرگار و قلميله طيش و ايچ مقدارلرينى و صورتلرينى حكيمانه ياپيلماسنى بيلهرك ايشلهين بر صانعِ مصوّر، بر عليمِ مقدّرڭ حدسز علمنه و وجوبِ وجودينه نباتات و حيوانات عددنجه شهادت ايدرلر ديمكدر.
يدنجى، سكزنجى دليل:
(وَالْاٰجَالُ الْمُعَيَّنَةُ وَالْاَرْزَاقُ الْمُقَنَّنَةُ) در. يعنى: أهمّيتلى بر حكمت ايچون، ظاهر نظرده مبهم و غيرِ معيّن توهّم ايديلن أجللر و رزقلر، إبهام پردهسى آلتنده قضا و قدرِ أزلينڭ دفترنده مقدّراتِ حياتيه صحيفهسنده هر ذىحياتڭ أجلى مقدّر و معيّندر؛ تقدّم، تأخّر ايتمز. و هر ذىروحڭ رزقى تعيين و تخصيص ايديلوب قضا و قدر لوحهسنده يازيلديغنه حدسز دليللر وار.
مثلا: قوجه بر آغاجڭ ئولمسى، اونڭ بر نوع روحى اولان چكردگنى اونڭ يرنده وظيفه گورمك ايچون بيراقماسى، بر عليمِ حفيظڭ حكمتلى قانونيله اولماسى و بر ياورونڭ رزقى اولان سوت ممهلردن گلمهسى و قان و فيشقى ايچندن چيقوب هيچ بولاشمادن صافى، تميز اولارق آغزينه آقماسى، تصادف إحتمالنى قطعى بر صورتده ردّ و بر رزّاقِ عليمِ رحيمڭ شفقتلى دستوريله اولديغنى غايت قطعى گوسترييور. بو ايكى جزئى مثاله بتون ذىحيات، ذىروح قياس ايديلسين.
ديمك حقيقتده هم أجل معيّن و مقدّردر، هم رزق هركسه گوره بر تعيّن ايچنده مقدّرات دفترنده قيد ايديلمشدر. فقط غايت مهمّ بر حكمت ايچون هم أجل، هم رزق پردۀِ غيبده و مبهم و غيرِ معيّن و ظاهرًا تصادفه باغلى گبى گورونويور.
أگر أجل گونشڭ غروبى گبى معيّن اولسه ايدى؛ يارى عمر غفلتِ مطلقهده و آخرته چاليشمامقده ضايع اولوب، يارى عمردن صوڭره هر گون ئولوم دار آغاجى طرفنه بر آياق آتمق گبى دهشتلى بر قورقو آلوب أجلدهكى مصيبت يوز درجه زيادهلشمهسى سرّيله، باشه گلن مصيبتلر و حتّى دنيانڭ أجلى اولان قيامت پردۀِ غيبده مرحمةً بيراقيلمش.
رزق ايسه؛ حياتدن صوڭره نعمتلرڭ أڭ بيوك بر خزينهسى و شكر و حمدڭ أڭ زنگين بر منبعى و عبوديت و دعا و رجالرڭ أڭ جمعيتلى بر معدنى اولماسندن، صورتِ ظاهرهده مبهم و تصادفه باغلى گبى گوستريلمش. تا هر وقت رزّاقِ كريمڭ درگاهنه إلتجا و رجا و يالوارمق و حمد و شكر شفاعتيله رزق ايستهمك قپوسى قپانماسين. يوقسه معيّن اولسه ايدى، ماهيتى بتون بتون دگيشهجكدى. شاكرانه، منّتدارانه رجالر، دعالر، بلكه متذلّلانه عبوديت قپولرى قپانيردى.
طوقوزنجى، اوننجى دليل:
(وَالْاِتْقَانَاتُ الْمُفَنَّنَةُ وَالْاِهْتِمَامَاتُ الْمُزَيَّنَةُ) يعنى: هر مصنوعده، خصوصًا بهار موسمنده زمين يوزنده سرمدى بر حسن و جمالڭ جلوهلرينى گوسترن بتون گوزل مخلوقلر، أزجمله چيچكلر، ميوهلر و قوشجقلر و سينكلر و بِالخاصّه يالديزلى و ييلديزلى قوشجقلرڭ خلقتلرنده و صورتلرنده و جهازاتلرنده اويله معجزانه بر مهارت و دقّت و خارقه بر صنعت، بر إتقان، بر مكمّليت و صنعتكارلرينڭ معجزاتلى هنرلرينى گوسترن آيرى آيرى، چشيد چشيد طرزلرده شكللر، ماكينهجكلر، غايت إحاطهلى بر علمه و (تعبيرده خطا اولماسين) غايت مهارتلى و فنونلى بر مَلكۀِ علميهيه قطعى دلالت و سرسرى تصادفڭ و شعورسز و مشوّش أسبابڭ مداخله ايتمهسنڭ إمكانسز اولديغنه شهادت ايتدكلرى گبى؛ (وَالْاِهْتِمَامَاتُ الْمُزَيَّنَةُ) إفادهسيله او گوزل مصنوعلرده او درجه بر شيرين سوسلهمك و طاتلى بر زينت و جاذبهدار بر جمالِ صنعت وار كه، نهايتسز بر علم ايله ايش گورور و هر شيئڭ أڭ گوزل طرزينى بيلير و صنعتكارلغڭ جمالِ كمالنى و كمالِ جمالنى ذىشعورلره گوسترمك ايستر كه؛ أڭ جزئى بر چيچگى و كوچك بر سينگى إهتمامكارانه، ماهرانه، صنعتپرورانه أهمّيتله تصوير و ايجاد ايدر. بو إهتمامكارانه تزيين و تحسين، بداهتله حدسز و هر شيئه محيط بر علمه دلالت و او گوزللرڭ عددنجه بر صانعِ عليمِ ذو الجمالڭ وجوبِ وجودينه شهادتلر ايدرلر ديمكدر.
بش كلّى دليل و حجّتلرى إحتوا ايدن اون برنجى دليل:
﴿وَغَايَةُ كَمَالِ الْاِنْتِظَامِ الْاِتِّزَانِ الْاِمْتِيَازِ الْمُطْلَقَاتِ فِى السُّهُولَةِ الْمُطْلَقَةِ وَخَلْقُ الْاَشْيَاءِ فِى الْكَثْرَةِ الْمُطْلَقَةِ مَعَ الْاِتْقَانِ الْمُطْلَقِ وَفِى السُّرْعَةِ الْمُطْلَقَةِ مَعَ الْاِتِّزَانِ الْمُطْلَقِ وَفِى الْوُسْعَةِ الْمُطْلَقَةِ مَعَ كَمَالِ حُسْنِ الصَّنْعَةِ وَفِى الْبُعْدَةِ الْمُطْلَقَةِ مَعَ الْاِتِّفَاقِ الْمُطْلَقِ وَفِى الْخِلْطَةِ الْمُطْلَقَةِ مَعَ الْاِمْتِيَازِ الْمُطْلَقِ﴾
بو دليل، سابقًا ذكر ايديلن عربى فقرهنڭ آخرنده يازيلان دليلڭ باشقه و داها گوزل بر طرزيدر. شدّتلى خستهلق سببيله، غايت قيصه بر إشارتله بوندهكى بش آلتى گنيش دليللرى بياندر.
أوّلا: بتون زمينده گورويورز؛ تام بيلمكدن و مهارتدن گلن غايت سهولت و قولايلقله عجيب ذىحيات ماكينهلر، دفعةً و بر قسمى بر دقيقهده دوزگون، ئولچولى، أمثالندن فارقهلى ياپيلمالرى، نهايتسز بر علمه دلالت و صنعتدهكى مهارتِ علميهدن گلن سهولت و قولايلق درجهسنده او علمڭ كمالنه شهادت ايدر.
ثانيًا: غايت كثرت و چوقلق ايچنده شاشيرمادن غايت درجهده صنعتلى، مكمّل ايجادلر، نهايتسز بر قدرت ايچنده حدسز بر علمه دلالت و عليم و قديرِ مطلقه حدسز شهادت ايدر.
ثالثًا: سرعتِ مطلقه و غايت چابوق ياپيلمقله برابر، غايت درجه ميزانلى، ئولچولى ايجادلرى؛ حدسز بر علمه دلالت و عددلرنجه بر عليمِ مطلق و قديرِ مطلقه شهادت ايدرلر.
رابعًا: غايت گنيش بتون زمين يوزنده حدسز ذىحياتلرڭ وسعتِ مطلقه ايله برابر غايت صنعتكارانه، سوسلى، كمالِ حسنِ صنعت ايله ياپيلمالرى هيچ شاشيرمايان، هر شيئى برابر گورن، بر شيئى بر شيئه مانع اولميان بر إحاطهلى علمه دلالت و بر عليمِ كلِّ شى و قديرِ مطلقڭ مصنوعلرى اولدقلرينه هر برى و برابر شهادت ايدرلر.
خامسًا: بُعْدِ مطلق و بربرندن غايت اوزاق بر نوعڭ أفرادى؛ برى شرقده، برى غربده، برى شمالده، برى جنوبده، عين زمانده، عين طرزده بربرينڭ مِثلى و بربرندن تشخّصجه إمتيازلى بر صورتده وجوده گلمهلرى آنجق بر عليمِ مطلق و قديرِ مطلقڭ كائناتى إداره ايدن حدسز قدرتى و بتون موجوداتى أحواليله إحاطه ايدن نهايتسز علميله اولابيلمهسى جهتيله، محيط بر علمه دلالت و بر علاّم الغيوبه حدسز شهادت ايدرلر.
سادسًا: إختلاطِ مطلقله برابر هيچ شاشيرمادن و قاريشديرمادن هر بريسنى تام بر إمتياز و علامتِ فارقه ايله او قاريشق أمثالنده و قراڭلق يرلرده، مثلا طوپراق آلتندهكى تخملر گبى شاشيران وضعيتلرده او چوق غلبهلكلى ذىحيات ماكينهلرڭ هر بريسنڭ هيچ بر جهازاتنى نقصان بيراقميهرق معجزاتلى بر صورتده ياراديلمالرى، گونش گبى علمِ أزلىيه دلالت و گوندوز گبى قديرِ مطلق و عليمِ مطلقڭ خلاّقيتنه، ربوبيتنه شهادت ايدرلر. رسالۀِ نوردهكى تفصيلاته حواله ايدوب بو پك اوزون قصّهيى قيصه كسييورز.
شيمدى خلاصة الخلاصهدهكى «إراده» مسئلهسنه باشلايورز:
﴿اَللّٰهُ اَكْبَرُ مِنْ كُلِّ شَىْءٍ قُدْرَةً وَعِلْمًا اِذْ هُوَ الْمُرٖيدُ لِكُلِّ شَىْءٍ مَاشَاءَ اللّٰهُ كَانَ وَمَا لَمْ يَشَاْ لَمْ يَكُنْ اِذْ تَنْظٖيمُ اٖيجَادِ الْمَصْنُوعَاتِ ذَاتًا وَصِفَةً وَمَاهِيَّةً وَهُوِيَّةً مِنْ بَيْنِ الْاِمْكَانَاتِ الْغَيْرِ الْمَحْدُودَةِ وَالطُّرُقِ الْعَقٖيمَةِ وَالْاِحْتِمَالَاتِ الْمُشَوَّشَةِ وَسُيُولِ الْعَنَاصِرِ الْمُتَشَاكِسَةِ وَالْاَمْثَالِ الْمُتَشَابِهَةِ بِهٰذَا النِّظَامِ الْاَدَقِّ الْاَرَقِّ وَتَوْزٖينُهَا بِهٰذَا الْمٖيزَانِ الْحَسَّاسِ الْجَسَّاسِ وَتَمْيٖيزُهَا بِهٰذِهِ التَّعَيُّنَاتِ الْمُزَيَّنَةِ الْمُنْتَظَمَةِ وَخَلْقُ الْمُخْتَلِفَاتِ الْمُنْتَظَمَاتِ الْحَيَوِيَّةِ مِنَ الْبَسٖيطِ الْجَامِدِ الْمَيِّتِ كَالْاِنْسَانِ بِجِهَازَاتِهٖ مِنَ النُّطْفَةِ وَالطَّيْرِ بِجَوَارِحِهٖ مِنَ الْبَيْضَةِ وَالشَّجَرَةِ بِاَعْضَائِهَا مِنَ النُّوَاةِ وَالْحَبَّةِ تَدُلُّ عَلٰى اَنَّ كُلَّ شَىْءٍ بِاِرَادَتِهٖ تَعَالٰى وَاِخْتِيَارِهٖ وَقَصْدِهٖ وَمَشٖيئَتِهٖ سُبْحَانَهُ كَمَا اَنَّ تَوَافُقَ الْاَشْيَاءِ فٖى اَسَاسَاتِ الْاَعْضَاءِ النَّوْعِيَّةِ وَالْجِنْسِيَّةِ يَدُلُّ عَلٰى اَنَّ صَانِعَ تِلْكَ الْاَفْرَادِ وَاحِدٌ اَحَدٌ كَذٰلِكَ اَنَّ تَمَايُزَهَا بِالتَّشَخُّصَاتِ الْمُتَمَايِزَاتِ وَالتَّعَيُّنَاتِ الْمُنْتَظَمَةِ يَدُلُّ عَلٰى اَنَّ ذٰلِكَ الصَّانِعَ الْوَاحِدَ الْاَحَدَ فَاعِلٌ مُخْتَارٌ يَفْعَلُ مَا يَشَاءُ وَيَحْكُمُ مَا يُرٖيدُ﴾
بو فقره، إرادۀِ إلٰهيهنڭ دليللرندن پك چوق كلّى حجّتلرى إحتوا ايدن بر تك كلّى و اوزون دليلدر. مئالنڭ قيصه بر ترجمهسى ايچنده إراده و إختيار و مشيئتِ إلٰهيهيى غايت قطعى إثبات ايدن بر دليلى بيان ايدرز. هم علمِ إلٰهينڭ بتون مذكور دليللرى، عينًا إرادهنڭ دخى دليليدر. چونكه هر مصنوعده علم و إرادهنڭ برابر جلوهلرى، أثرلرى گورونويور.
بو عربى فقرهنڭ قيصهجه مئالى:
يعنى، هر شى اونڭ إراده و مشيئتيله اولور. ايستديگى اولور، ايستهمديگى اولماز. هر نه ايسترسه ياپار. ايستهمزسه، هيچ بر شى اولماز. بر حجّت شودر: گورويورز كه، بو مصنوعاتڭ هر برى معيّن ذاتى، مخصوص صفتى، آيرى خصوصى ماهيتى، ممتاز فارقهلى صورتى، حدسز إمكانات و باشقه طرزلرده اولابيلير، تشويشجى إحتمالات ايچنده، نتيجهسز چوق يوللرده و سيل گبى آقان و قاريشديران و بربرينه ضد عنصرلرڭ مداخلهلرى ايچنده و سهو و إلتباسه سببيت ويرن و بربرينه بڭزهين أمثاللرى ايچنده بو قارمهقاريشيق حاللره قارشى، او هر بر مصنوعى اينجه، تام، دوزگون بر نظام آلتنه آلمق و حسّاس، جسّاس، مكمّل بر ئولچو و ميزانله هر عضوينى و جهازينى طارتمق، طاقمق و يوزينه سوسلى، دوزگون بر سيما، بر تشخّص ويرمك و بربرينه مخالف أعضالرينى بسيط، جامد، ئولو بر مادّهدن ذىحيات اولارق غايت صنعتلى ياراتمق.. مثلا إنسانى آيرى آيرى يوز جهازاتى ايله بر قطره صودن ايجاد ايتمك و قوشى پك چوق آلات و مختلف جهازلريله بر بسيط يمورطهدن إنشا ايدوب معجزاتلى صورت گيديرمك و آغاجى دال، بوداق و متنوّع أعضا و أجزاسيله بسيط، جامد «قاربون، آزوت، مولّد الماء، مولّد الحموضه»دن تركّب ايدن بر كوچك چكردكدن چيقارمق، منتظم، ميوهلى بر شكل گيديرمك، ألبته و ألبته بداهتله، شبههسز قطعيتله وجوب و ضرورت و لزوم درجهسنده إثبات ايدر كه؛ او هر بر مصنوعه بتون ذرّات و أجزاسيله و صورت و ماهيتيله بر قديرِ مطلقڭ إراده و مشيئتيله و إختيار و قصديله او مخصوص، مكمّل وضعيت ويريلييور. و هر شيئه شامل بر إرادهنڭ تحتِ حكمندهدر. و بو تك مصنوعڭ بو شبههسز طرزده إرادۀِ إلٰهيهيه دلالتى گوسترييور كه، بتون مصنوعات حدسز، نهايتسز و گونش و گوندوز گبى ظاهر بر قطعيتده، هر شيئه شامل إرادۀِ إلٰهيهيه، عددلرنجه شهادتلر و بر قديرِ مريدڭ وجوبِ وجودينه حدسز حجّتلردر.
هم علمِ إلٰهينڭ سابقًا مذكور بتون دليللرى، عينًا إرادهنڭ دخى دليللريدر. چونكه، ايكيسى قدرتله برابر ايش گورويورلر. برى بريسز اولماز. هر بر نوعڭ و جنسڭ أفرادى، أعضاءِ نوعيه و جنسيهده توافقلرى ناصل دلالت ايدر كه صانعلرى بردر، واحددر، أحددر.. اويله ده: يوزلرينڭ سيمالرى حكمتلى بر طرزده بربرندن فارقهلى و آيرى اولماسى قطعى دلالت ايدر كه: او صانعِ واحدِ أحد، بر فاعلِ مختاردر. إراده و إختيار و مشيئت و قصد ايله هر شيئى ياراتير.
ايشته إرادهيه دائر تك و كلّى بر دليلى بيان ايدن مذكور عربى فقرهنڭ قيصهجه مئالنڭ ترجمهسى بيتدى. إرادهيه دائر پك چوق مهمّ نكتهلرى، علم مسئلهسى گبى يازمق نيّت ايتمشدم. فقط سملى خستهلق دماغمه تام يورغونلق ويرديگى ايچون باشقه وقته تأخير ايديلدى.
قدرته دائر عربى فقرهسى:
﴿اَللّٰهُ اَكْبَرُ مِنْ كُلِّ شَىْءٍ قُدْرَةً وَعِلْمًا اِذْ هُوَ الْقَدٖيرُ عَلٰى كُلِّ شَىْءٍ بِقُدْرَةٍ مُطْلَقَةٍ مُحٖيطَةٍ ضَرُورِيَّةٍ نَاشِئَةٍ لَازِمَةٍ ذَاتِيَّةٍ لِلذَّاتِ الْاَقْدَسِيَّةِ فَمُحَالٌ تَدَاخُلُ ضِدِّهَا فَلَا مَرَاتِبَ فٖيهَا فَتَتَسَاوٰى بِالنِّسْبَةِ اِلَيْهَا الذَّرَّاتُ وَالنُّجُومُ وَالْجُزْءُ وَالْكُلُّ وَالْجُزْئِىُّ وَالْكُلِّىُّ وَالنُّوَاةُ وَالشَّجَرُ وَالْعَالَمُ وَالْاِنْسَانُ بِسِرِّ مُشَاهَدَةِ غَايَةِ كَمَالِ الْاِنْتِظَامِ الْاِتِّزَانِ الْاِمْتِيَازِ الْاِتْقَانِ الْمُطْلَقَاتِ مَعَ السُّهُولَةِ فِى الْكَثْرَةِ وَالسُّرْعَةِ وَالْخِلْطَةِ الْمُطْلَقَةِ وَبِسِرِّ النُّورَانِيَّةِ وَالشَّفَّافِيَّةِ وَالْمُقَابَلَةِ وَالْمُوَازَنَةِ وَالْاِنْتِظَامِ وَالْاِمْتِثَالِ وَبِسِرِّ اِمْدَادِ الْوَاحِدِيَّةِ وَيُسْرِ الْوَحْدَةِ وَتَجَلِّى الْاَحَدِيَّةِ وَبِسِرِّ الْوُجُوبِ وَالتَّجَرُّدِ وَمُبَايَنَةِ الْمَاهِيَّةِ وَبِسِرِّ عَدَمِ التَّقَيُّدِ وَعَدَمِ التَّحَيُّزِ وَعَدَمِ التَّجَزّٖى وَبِسِرِّ اِنْقِلَابِ الْعَوَائِقِ وَالْمَوَانِعِ اِلٰى حُكْمِ الْوَسَائِلِ الْمُسَهِّلَاتِ وَبِسِرِّ اَنَّ الذَّرَّةَ وَالْجُزْءَ وَالْجُزْئِىَّ وَالنُّوَاةَ وَالْاِنْسَانَ لَيْسَتْ بِاَقَلَّ صَنْعَةً وَجَزَالَةً مِنَ النَّجْمِ وَالْكُلِّ وَالْكُلِّىِّ وَالشَّجَرِ وَالْعَالَمِ فَخَالِقُهَا هُوَ خَالِقُ هٰذِهٖ بِالْحَدْسِ الشُّهُودِىِّ وَبِسِرِّ اَنَّ الْمُحَاطَ وَالْجُزْئِيَّاتِ كَالْاَمْثِلَةِ الْمَكْتُوبَةِ الْمُصَغَّرَةِ اَوْ كَالنُّقَطِ الْمَحْلُوبَةِ الْمُعَصَّرَةِ فَلَا بُدَّ اَنْ يَكُونَ الْمُحٖيطُ وَالْكُلِّيَّاتُ فٖى قَبْضَةِ خَالِقِ الْمُحَاطِ وَالْجُزْئِيَّاتِ لِيُدْرِجَ مِثَالَهَا فٖيهَا بِمَوَازٖينِ عِلْمِهٖ اَوْ يُعَصِّرَهَا مِنْهَا بِدَسَاتٖيرِ حِكْمَتِهٖ وَبِسِرِّ كَمَا اَنَّ قُرْاٰنَ الْعِزَّةَ الْمَكْتُوبَ عَلَى الذَّرَّةِ الْمُسَمَّاةِ بِالْجَوْهَرِ الْفَرْدِ بِذَرَّاتِ الْاَثٖيرِ لَيْسَ بِاَقَلَّ جَزَالَةً وَخَارِقِيَّةَ صَنْعَةٍ مِنْ قُرْاٰنِ الْعَظَمَةِ الْمَكْتُوبِ عَلٰى صَحٖيفَةِ السَّمَاءِ بِمِدَادِ النُّجُومِ وَالشُّمُوسِ كَذٰلِكَ اَنَّ وَرْدَ الزُّهْرَةِ لَيْسَتْ بِاَقَلَّ جَزَالَةً وَصَنْعَةً مِنْ دُرِّىِّ نَجْمِ الزُّهْرَةِ وَلَا النَّمْلَةُ مِنَ الْفٖيلَةِ وَلَا الْمِكْرُوبُ مِنَ الْكَرْكَدَانِ وَلَا النَّحْلَةُ مِنَ النَّخْلَةِ بِالنِّسْبَةِ اِلٰى قُدْرَةِ خَالِقِ الْكَائِنَاتِ فَكَمَا اَنَّ غَايَةَ كَمَالِ السُّرْعَةِ وَالسُّهُولَةِ فٖى اٖيجَادِ الْاَشْيَاءِ اَوْقَعَتْ اَهْلَ الضَّلَالَةِ فٖى اِلْتِبَاسِ التَّشْكٖيلِ بِالتَّشَكُّلِ الْمُسْتَلْزِمِ لِمُحَالَاتٍ غَيْرِ مَحْدُودَةٍ تَمُجُّهَا الْاَوْهَامُ كَذٰلِكَ اَثْبَتَتْ لِاَهْلِ الْهِدَايَةِ تَسَاوِىَ النُّجُومِ مَعَ الذَّرَّاتِ بِالنِّسْبَةِ اِلٰى قُدْرَةِ خَالِقِ الْكَائِنَاتِ جَلَّ جَلَالُهُ وَلَا اِلٰهَ اِلَّا هُوَ اللّٰهُ اَكْبَرُ﴾
بو پك عظيم مسئلۀِ قدرته دائر عربى فقرهنڭ قيصهجه مئالنڭ بر نوع ترجمهسندن أوّل، قلبه إخطار ايديلن بر حقيقتى بيان ايدرز. شويله كه:
قدرتڭ وجودى، كائناتڭ وجودندن داها زياده قطعيدر. بلكه بتون مخلوقات، هر برى هم برابر او قدرتڭ مجسّم كلماتيدر. اونڭ عين اليقين وجودينى گوستررلر. اونڭ موصوفى اولان قديرِ مطلقه عددلرنجه شهادتلر ايدرلر. داها حجّتلرله او قدرتڭ إثباتنه إحتياج يوقدر. بلكه ايمانده أڭ أهمّيتلى بر أساس، حشر و نشرڭ أڭ قوّتلى بر تمل طاشى و چوق مسائلِ ايمانيه و حقائقِ قرآنيهيه أڭ لزوملى بر مدار اولان و (مَا خَلْقُكُمْ وَلَا بَعْثُكُمْ اِلَّا كَنَفْسٍ وَاحِدَةٍ) آيتنڭ دعوا ايتديگى و بتون عقللر اوڭا يول بولامدقلرندن، حيرتده، عجزده، بر قسمى إنكارده قالدقلرى قدرته عائد بر دهشتلى حقيقتڭ إثباتى لازمدر.
ايشته او أساس، او تمل، او مدار، او دعوا، او حقيقت ايسه مذكور آيتڭ مئاليدر. يعنى: «أى جنّ و إنس! بتون سزلرڭ ياراديلماڭز، ايجاديڭز و حشرده إحياڭز، ديريلتيلمهڭز؛ بر تك نفسڭ ايجادى گبى قدرتمه قولايدر.» بر بهارى، تك بر چيچك مِثللو سهولتله ايجاد ايدر. جزئى، كلّى، كوچك، بيوك، آز، چوق؛ او قدرته نسبةً فرقلرى يوقدر. سيّارهلرى، ذرّهلر گبى قولاى دونديرر.
ايشته مذكور عربى فقره، يالڭز بو دهشتلى مسئلهيه «طوقوز باصامق» ايله پك قطعى و قوّتلى بر حجّتى بيان ايدر. غايت قيصه بر مئالى شودر: باصامغڭ أساسنه إشارت ايدن:
﴿اِذْ هُوَ الْقَدٖيرُ عَلٰى كُلِّ شَىْءٍ بِقُدْرَةٍ مُطْلَقَةٍ مُحٖيطَةٍ ضَرُورِيَّةٍ نَاشِئَةٍ لَازِمَةٍ ذَاتِيَّةٍ لِلذَّاتِ الْاَقْدَسِيَّةِ فَمُحَالٌ تَدَاخُلُ ضِدِّهَا فَلَا مَرَاتِبَ فٖيهَا فَتَتَسَاوٰى بِالنِّسْبَةِ اِلَيْهَا الذَّرَّاتُ وَالنُّجُومُ وَالْجُزْءُ وَالْكُلُّ وَالْجُزْئِىُّ وَالْكُلِّىُّ وَالنُّوَاةُ وَالشَّجَرُ وَالْعَالَمُ وَالْاِنْسَانُ﴾
يعنى: هر شيئه قدير اويله بر قدرتى وار كه؛ بتون أشيايى إحاطه ايتمش و ذاتِ واجب الوجوده لزومِ ذاتى ايله و فنِّ منطق تعبيرنجه ضروريتِ ناشئه ايله لازمدر، واجبدر، إنفكاكى محالدر، إمكانى يوقدر. مادام بويله بر لزومله بويله بر قدرت ذاتِ أقدسدهدر، ألبته اونڭ ضدّى اولان عجز هيچ بر جهتله ايچنه گيرهمز، ذاتِ قديره عارض اولاماز. مادام بر شيده مرتبهلرڭ بولونماسى، اونڭ ضدّى ايچنه گيرمهسى ايلهدر. مثلا؛ حرارتڭ درجه و مرتبهلرى صوغوغڭ گيرمهسى و گوزللگڭ ايسه چركينلگڭ مداخلهسى ايله اولماسى و بو ذاتى قدرته ضد اولان عجز، اوڭا ياناشماسى هيچ بر جهتله إمكانى يوق. ألبته او قدرتِ مطلقهده مرتبهلر بولونماز. مادام مرتبهلر اونده بولونماز؛ ألبته او قدرته نسبةً ييلديزلر، ذرّهلر مساوى و جزء و كلّ و بر فرد و بتون نوع او قدرته قارشى فرقلرى يوقدر. و بر چكردك و قوجه آغاجى و كائنات و إنسان و بر نفسى ديريلتمهسى و حشرده بتون ذىروحلرڭ إحياسى، او قدرته نسبةً مساويدرلر و قولايدر. بيوك كوچك، آز چوق؛ فرقى يوقدر. بو حقيقته قطعى شاهد، خلقتِ أشياده گورديگمز كمالِ صنعت، نظام، ميزان، تمييز، كثرت، سرعتِ مطلقهده سهولتِ مطلقه و تام قولايلقدر.