برنجى باصامق اولان:
﴿بِسِرِّ مُشَاهَدَةِ غَايَةِ كَمَالِ الْاِنْتِظَامِ الْاِتِّزَانِ الْاِمْتِيَازِ الْاِتْقَانِ
الْمُطْلَقَاتِ مَعَ السُّهُولَةِ الْمُطْلَقَةِ فِى الْكَثْرَةِ وَالسُّرْعَةِ وَالْخِلْطَةِ﴾
مئالى، بو مذكور حقيقتدر.
ايكنجى باصامق:
﴿وَبِسِرِّ النُّورَانِيَّةِ وَالشَّفَّافِيَّةِ وَالْمُقَابَلَةِ وَالْمُوَازَنَةِ وَالْاِنْتِظَامِ وَالْاِمْتِثَالِ﴾ در.
بونڭ ايضاح و تفصيلاتنى، اوننجى سوزڭ آخرينه و يگرمى طوقوزنجى سوزه و يگرمنجى مكتوبه حواله ايدوب قيصهجه بر إشارت ايدرز. أوت ناصلكه نورانيت جهتيله گونشڭ ضياسى و عكسى، قدرتِ ربّانيه ايله دڭز يوزينه و بتون قبارجقلرينه گيرمهسى، بر تك جام پارچهسنه گيرمهسى گبى قولايدر، ايكيسى مساويدر. اويله ده ذاتِ نور الأنوارڭ نورانى قدرتى دخى گوكلرى، ييلديزلرى ياراتماسى، دونديرمسى؛ سينكلرڭ، ذرّهلرڭ ايجادى و دونديرمسى گبى اوڭا قولايدر، آغير گلمز.
هم ناصلكه شفّافيت خاصّهسيله بر تك آيينهجكده و بر گوز ببگنده گونشڭ مثالى صورتى قدرتِ إلٰهيه ايله بولونور، عين قولايلقله بتون پارلاق شيلره و قطرهلره و شفّاف ذرّهجكلره و دڭز يوزلرينه او عكسى و ايشيغى أمرِ إلٰهى ايله ويريلير. عينًا اويله ده؛ مصنوعاتڭ ملكوتيت و ماهيت يوزلرى شفّاف و پارلاق اولماسندن، قدرتِ مطلقهنڭ جلوهسى، تأثيرى بر تك نفسڭ ايجادنده بولونماسى قولايلغى درجهسنده بتون حيواناتى ياراتير. آز چوق، بيوك كوچك، فرق يوق.
هم ناصلكه طاغلرى طارتهجق درجهده غايت بيوك و تام حسّاس بر ترازىيه ايكى مساوى جويز قونولسه، بر كوچك چكردك بر جويزه علاوه ايديلسه، ترازينڭ بر گوزى طاغ باشنه، بر گوزى ده درين درهيه اينديرمهسى قولايلغى درجهسنده، او ايكى جويز يرينه ايكى مساوى طاغ ميزانڭ ايكى گوزينه قونولسه بريسنه بر جويز علاوهسيله بر طاغى گوكلره قالديرر، بر طاغى درهلره اينديرر. عينًا اويله ده؛ علمِ كلامڭ تعبيرنجه «إمكان، مساوى الطرفَيْن»در. يعنى، واجب و ممتنع اولميان، بلكه ممكن و محتمل اولان شيلرڭ وجود و عدملرى، بر سبب بولونمازسه مساويدر، فرقلرى يوقدر. بو إمكان و مساواتده آز چوق، بيوك كوچك بردرلر. ايشته مخلوقات ممكندرلر و إمكان دائرهسنده وجود و عدملرى مساوى اولماسندن، واجب الوجودڭ حدسز قدرتِ أزليهسى بر تك ممكنه وجود ويرمهسى قولايلغنده بتون ممكناتڭ وجودى، عدمڭ موازنهسنى بوزار، هر شيئه لايق بر وجودى گيديرر. و وظيفهسى بيتمش ايسه، ظاهرى وجود لباسنى چيقارييور، صورتا عدمه، بلكه دائرۀِ علمدهكى معنوى وجوده گوندرر. ديمك أشيا، قديرِ مطلقه ويريلسه؛ بهار بر چيچك قدر، بتون إنسانلرڭ حشرده إحيالرى بر نفس قدر قولاى اولور. أگر أسبابه إسناد ايديلسه، بر چيچك بر بهار قدر و بر سينك بتون حيوانات قدر مشكلاتلى اولور.
هم ناصلكه إنتظام سرّيله، بر قوجه سفينه ويا طيّارهيى بر پارمغى دوگمهسنه طوقونمق ايله حركته گتيرمهسى، بر ساعتڭ زنبرگنه آناختارله پارمق طوقونمسيله حركته گيرمهسى درجهسنده قولاى و راحتدر. عينًا اويله ده؛ علمِ أزلينڭ دستورلريله و حكمتِ سرمديهنڭ قانونلريله و إرادۀِ ربّانيهنڭ كلّى جلوهلرى و معيّن اصوللريله هر شيئه كلّى و جزئى، بيوك كوچك، آز چوق بر معنوى قالب، بر خصوصى مقدار، بر خاص حدود ويريلديگندن، تام إنتظامِ علمى و إراده قانونى ايچندهدرلر. ألبته قديرِ مطلق حدسز قدرتيله منظومۀِ شمسيهيى چويرمهسى و أرض سفينهسنى مدارِ سنويسنده گزديرمهسى، بر جسدده قانى و قاندهكى كريواتِ حمرا و بيضايى و او كرهجكلردهكى ذرّهلرى نظاملى، حكمتلى چويرمهسى درجهسنده سهولتلى و قولايدر كه؛ بر إنسانى كائنات سيستمنده خارقه جهازلريله بر قطره صودن بردن زحمتسز ياراتير. ديمك او أزلى و حدسز قدرته إسناد ايديلسه؛ بو كائناتڭ ايجادى، بر إنسانڭ ايجادى قدر سهولت پيدا ايدر، قولاى اولور. أگر اوڭا ويريلمزسه؛ بر تك إنسانى، عجيب جهازلرى و طويغولريله ياراتمق، كائنات قدر مشكلاتلى اولور.
هم ناصلكه إطاعت و إمتثال و أمر ديڭلهمك سرّيله؛ بر قوماندان بر «آرش» أمريله بر نفرى هجومه سَوق ايتديگى گبى.. عين أمرله قوجه بر مطيع اوردويى دخى قولايجه هجومه تحريك ايدر. عينًا اويله ده: إرادۀِ إلٰهى قانونلرينه كمالِ إطاعتده و تكوينى أمرِ ربّانينڭ إشارتنه أمربر نفر و أمر قولى مِثللو فطرى مَيل و شوق ايچنده و علمِ أزلى و حكمتڭ تعيين ايتدكلرى خطِّ حركت دستورلرى دائرهسنده و اوردو نفرلرندن بيڭ درجه زياده إطاعتلى و أمر ديڭلر و أمر قولى حكمنده اولان مصنوعات، خصوصًا ذىحياتلردن بر تك فردى، «عدمدن هايدى وجوده چيق، وظيفه باشنه گير!» دييه أمرِ ربّانى ايله و علمڭ تعيين ايتديگى طرزده و إرادهنڭ تخصيص أيلديگى صورتده قدرت اوڭا مخصوص بر وجود گيديروب، ألنى طوتوب، ميدانه چيقارمق قولايلغنده بهاردهكى ذىحياتڭ اوردوسنى عين قوّت و قدرتله ايجاد ايدر، وظيفهلر ويرر. ديمك هر شى او قدرته إسناد ايديلسه؛ بتون ذرّات اوردوسنڭ و ييلديزلر فرقهلرينڭ ايجادى، بر ذرّه بر تك ييلديز قدر قولاى و سهولتلى اولور. أگر أسبابه إسناد ايديلسه بر ذىحياتڭ گوز ببگنده و دماغندهكى ذرّهنڭ عجيب وظيفهلرينى يرينه گتيرهجك بر قابليتله ياراديلماسى، حيوانات اوردوسى قدر مشكلاتلى و زحمتلى اولور.
اوچنجى باصامق:
(وَبِسِرِّ اِمْدَادِ الْوَاحِدِيَّةِ وَيُسْرِ الْوَحْدَةِ وَتَجَلِّى الْاَحَدِيَّةِ) در. قيصهجق إشارتلرله مئالنه باقهجغز. يعنى، ناصلكه بر پادشاه و قوماندانِ أعظم، حاكميتنڭ واحديتى و بتون رعيتى يالڭز اونڭ أمرلرينه گوره حركتى جهتيله؛ او حاكمِ أعظم، قوجه مملكتى و بيوك ملّتى إداره ايتمهسى، بر كوى أهلنى إداره ايتمك قدر قولاى اولور. چونكه حكمده واحديت إعتباريله؛ أفرادِ ملّت عينًا عسكر نفراتى گبى تسهيلاته وسيله اولوب، قولايجه أمرلر، قانونلر تطبيق ايديلير. أگر مختلف حاكملره بيراقيلسه؛ چوق كشماكشه دوشمهسيله برابر، بر تك كويڭ بلكه بر خانهنڭ او مملكت قدر إدارهسى مشكل اولور. هم او إطاعتلى ملّت، بر تك قوماندانه باغلانماسى حيثيتيله؛ هر بر فردِ نفر گبى، او قوماندانڭ قوّتنه و جهازات دپولرينه و اوردوسنه طايانديغى بر قوّت ايله بر شاهى أسير ايدهبيلير، بيڭ درجه شخصى قوّتندن زياده ايش گورهبيلير. اونڭ او پادشاهه إنتسابى حدسز بر قوّتى و إقتدارى اولوب پك بيوك ايشلر ياپار. أگر او إنتساب كسيلسه؛ او بيوك قوّت گيدر، كندى بيلگندهكى جزئى قوّتيله و بلندهكى آز جبخانه و فشنكلرى مقدارنجه ايش گورهبيلير. يوقسه إنتساب قوّتنه طايانان مذكور عسكرڭ گورديگى بتون ايشلر اوندن ايستهنيلسه، بيلگنده بر اوردو قوّتى و بلنده پادشاهڭ جبخانهلر آنبارى بولونمق گركدر.
عينًا اويله ده: سلطانِ أزل و أبد، صانعِ قدير، واحديتِ سلطنت و حاكميتِ مطلقه جهتيله، كائناتى بر شهر قولايلغنده و بر بهارى بر باغچه سهولتنده و حشرده بتون ئولمشلرى إحيا ايتمك، او باغچه آغاجلرينڭ ياپراق، چيچك، ميوهلرينى گلن بهارده ياراتمق قولايلغنده ياپار. و قولايجه بر سينگى، قوجه قارتال قوشى سيستمنده ياراتير. و سهولتله بر إنسانى بر كوچك كائنات حكمنه گتيرر. أگر أسبابه ويريلسه؛ بر ميقروب بيڭ گرگدان، بر ميوه بر بيوك آغاج قدر مشكلاتلى اولور. و بلكه ذىحياتڭ بدننده عجيب وظيفهلرى گورن هر بر ذرّهيه هر شيئى گورهجك بر گوز و هر شيئى بيلهجك بر علم ويريلمك لازمدر كه، او اينجه و مكمّل وظيفۀِ حياتيهيى ياپابيلسين.
هم وحدتده يُسر و سهولت و قولايلق او درجهيه گلير. ناصلكه بر اوردو تجهيزاتى بر تك ألدن، بر تك فابريقهدن گلمهسيله، بر تك نفرڭ تجهيزاتِ عسكريهسى گبى قولايلاشير، أگر آيرى آيرى أللر قاريشسه و مختلف جهازات هر برى باشقه فابريقهدن آلينسه، او وقت بر تك نفر تجهيزاتى، كميت نقطهسنده بيڭ مشكلاتله تدارك ايديلهبيلير، متعدّد آمر و ضابطلر قاريشديغى جهتيله بيڭ نفر قدر صعوبت پيدا ايدر. هم بيڭ نفرڭ إدارهسى و قوماندانلغى بر تك ضابطه ويريلسه، بر جهتده بر نفر قدر قولاى اولور، أگر اون ضابطه ويا نفرلره بيراقيلسه، پك قاريشق و مشكل دوشر. عينًا اويله ده؛ هر شى واحدِ أحده ويريلسه، بر تك شى گبى قولاى اولور. أگر أسبابه إسناد ايديلسه، بر تك ذىحيات، زمين قدر مشكل، بلكه إمكانسز اولور. ديمك وحدتده قولايلق، وجوب و لزوم درجهسنه گلير. و كثرتلى أللر قاريشمقده صعوبت، إمكانسزلق درجهسنه دوشر.
رسالۀِ نور مكتوباتنده دينيلديگى گبى، أگر گيجه - گوندوزدهكى تبدّلاتى و ييلديزلرڭ حركاتى و سنهدهكى گوز، قيش، بهار، ياز گبى موسملرڭ تحوّلاتى بر تك مدبّره و آمره بيراقيلسه؛ او قوماندانِ أعظم، بر نفرى اولان كُرۀِ أرضه أمر ايدر كه: «قالق، دون، گز!» او ده، او إلتفات و أمرڭ نشئه و سَوينجندن مجذوب مولوى گبى ايكى حركتيله يومى و سنوى تحوّلاته و ييلديزلرڭ ظاهرى و خيالى حركتلرينه غايت قولايجه بر وسيله اولوب وحدتدهكى تام سهولت و غايت قولايلغى گوسترر. أگر او تك آمره دگل، بلكه أسبابه و ييلديزلرڭ كيفلرينه بيراقيلسه و أرضه «سن طور، گزمه» دينيلسه؛ او حالده، أرضدن بيڭلر درجه بيوك، بيڭلر ييلديزلر و گونشلر، هر گيجه و هر سنه ميليونلر و ميليارلر سنهلك مسافهلرى كسمك و گزمكله موسملر و گيجه گوندوز گبى او وضعيتِ أرضيه و سماويه حصول بولابيلير. و إمكانسزلق و محاليت درجهسنده مشكل و صعوبتلى دوشر.
اوچنجى باصامقدهكى (وَتَجَلِّى الْاَحَدِيَّةِ) كلمهسى، پك بيوك و چوق اينجه و درين و غايت گنيش بر حقيقته إشارت ايدر. اونڭ ايضاح و إثباتنى رسالۀِ نوره حواله ايدوب، غايت قيصه بر تمثيل ايله بر تك نكتهسنى بيان ايدهجگز.
أوت ناصلكه گونش، ضياسيله عموم زمينى ايشيقلانديروب واحديته بر مثال اولديغى گبى، آيينه گبى مقابلندهكى هر شفّاف شيده تمثالى و عكسى و يدى رنكلى ضياسيله و ذاتنڭ صورتيله بولونوب أحديته دخى بر مثال تشكيل ايدر. أگر گونشڭ علمى و قدرتى و إختيارى اولسه ايدى و جام پارچهلرينڭ و ايچنده گونشجكلر گورونن قطرهلرڭ و قبارجقلرڭ قابليتلرى بولونسه ايدى؛ إرادۀِ إلٰهيهنڭ قانونيله هر بريسنده و ياننده تمثاليله و صفتلريله تام بر گونش بولونوب، سائر يرلرده بولونماسى اونڭ تصرّفاتنه هيچ نقصان ويرميهرك قدرتِ ربّانيهنڭ أمريله، تأثيريله، حكميله پك بيوك ظهوراته سبب اولارق، أحديتدهكى فوق العاده قولايلق و سهولتى گوسترر.
عينًا اويله ده؛ صانعِ ذو الجلال، واحديت إعتباريله بتون أشيايى إحاطه ايدن علم و إرادهسى و قدرتيله باقار و حاضر و ناظر اولديغى گبى، أحديت جهتيله و تجلّيسيله هر شيئڭ، خصوصًا ذىحياتڭ ياننده إسملرى و صفتلريله بولونور كه؛ قولايجه، بر آنده سينگى قارتال سيستمنده، بر إنسانى كوچك بر كائنات سيستمنده ايجاد ايدر. و ذىحياتى اويله معجزاتلى بر شكلده ياراتير كه؛ أگر بتون أسباب طوپلانسه، بر بلبلى، بر سينگى ياپامازلر. و بر بلبلى يارادان، بتون قوشلرى يارادان اولابيلير و بر إنسانى خلق ايدن، آنجق كائناتى ايجاد ايدن ذاتدر.
دردنجى و بشنجى باصامق:
﴿وَبِسِرِّ الْوُجُوبِ وَالتَّجَرُّدِ وَمُبَايَنَةِ الْمَاهِيَّةِ
وَبِسِرِّ عَدَمِ التَّقَيُّدِ وَعَدَمِ التَّحَيُّزِ وَعَدَمِ التَّجَزّٖى﴾
بو ايكى باصامغڭ حقيقتنى عمومه إفاده ايتمك چوق مشكل اولماسندن، يالڭز قيصهجق بر ايكى نكتهسى و مختصر مئالى بيان ايديلهجك. يعنى، وجود مرتبهلرينڭ أڭ قوّتلى و صارصيلماز اولان وجوب مرتبهسنده و أزلى و أبدى درجهسنده بر وجود صاحبى و مادّياتدن منزّه و مجرّد و بتون ماهيتلره مباين بر ماهيتِ مقدّسهيى طاشييان بر قديرِ مطلقڭ قدرتنه نسبةً، ييلديزلر ذرّهلر گبى و حشر بر بهار مِثللو و حشرده بتون إنسانلرى ديريلتمهسى بر نفسڭ إحياسى درجهسنده قولايدر. چونكه وجود طبقهلرندن قوّتلى بر نوعڭ بر طيرناغى، خفيف بر طبقهنڭ بر طاغنى ألنه آلير، چويرر. مثلا؛ قوّتلى وجودِ خارجيدن بر آيينه و قوّۀِ حافظه، ضعيف و خفيف اولان وجودِ مثالى و معنويدن يوز طاغى و بيڭ كتابى ايچنه آليرلر و چويرهبيليرلر. ايشته وجودِ مثالى نه درجه قوّتجه وجودِ خارجيدن آشاغى ايسه، ممكناتڭ حادث و عارضى وجودلرى دخى أزلى، سرمدى، واجب بر وجوددن بيڭلر درجه داها آشاغى و خفيفدر كه، او مقدّس وجود، بر ذرّه تجلّيسيله، ممكناتڭ بر عالمنى چويرر. مع التأسّف شيمديلك سملى خستهلق گبى اوچ أهمّيتلى سبب مساعده ايتمدكلرندن، بو پك اوزون حقيقتى و نكتهلرينى رسالۀِ نوره و باشقه زمانه حواله ايدرز.
آلتنجى باصامق:
﴿وَبِسِرِّ اِنْقِلَابِ الْعَوَائِقِ وَالْمَوَانِعِ اِلٰى حُكْمِ الْوَسَائِلِ الْمُسَهِّلَاتِ﴾
يعنى: ناصلكه فنّڭ تعبيرنجه عقدۀِ حياتيه نامنده بر جلوۀِ إرادۀِ إلٰهيهنڭ و أمرِ تكوينىنڭ بر قانونى ايله و او أمر و إرادهنڭ توجّهلريله قوجه بر آغاجڭ شعورسز دال و سرت بوداقلرى، ميوهلرينه و ياپراق و چيچكلرينه زنبرگى و معدهسى حكمندهكى او عقدۀِ حياتيهدن اونلره گيدهجك لزوملى مادّهلر و أرزاقلره عوائق و موانع و سد اولمازلر، بلكه تسهيلاته وسيله اولويورلر؛ عينًا اويله ده: كائنات و بتون مخلوقاتڭ ايجادنده بتون مانعلر بر جلوۀِ إراده و توجّهِ أمرِ ربّانىيه قارشى ممانعتى بيراقوب قولايلغه آلَت اولماسندن، قدرتِ سرمديه او تك آغاجى ايجاد قولايلغنده، كائناتى و زميندهكى أنواعِ مخلوقاتى ايجاد ايدر، هيچ بر شى اوڭا آغير گلمز.
أگر بتون ايجادلر او قدرته ويريلمزسه؛ او وقت او تك آغاجڭ إنشا و إدارهسى، بتون آغاجلر، بلكه زمينڭ ايجادى و إدارهسى قدر مشكل اولاجق. چونكه او زمان هر شى مانع و سد اولور. او حالده بتون أسباب طوپلانسه؛ بر آغاجڭ أمردن، إرادهدن گلن عقدۀِ حياتيه معدهسندن، زنبرگندن إنتظام ايله ميوه، ياپراق، دال و بوداقلره لازم أرزاق و جهازاتى گوندرهمزلر. إلاّ كه، آغاجڭ هر بر جزئنه، حتّى هر بر ذرّهسنه بتون آغاجى و أجزاسنى و ذرّاتنى گورهجك و بيلهجك و يارديم ايدهجك بر گوز، بر إحاطهلى علم، بر خارقه قدرت و فوق العاده معاونت ويريلسين.
ايشته بو بش عدد باصامقلردن چيق، باق. كفر و شركده نه درجه مشكلات، بلكه محالات بولونديغنى و نه قدر عقلدن، منطقدن اوزاق و ممتنع اولديغنى؛ و ايمانده و قرآن يولنده نه قدر سهولت و وجوب درجهسنده قولايلق و نه قدر معقول و مقبول و لزوم درجهسنده قطعى و راحت بر حق و حقيقت بولونديغنى گور، بيل. «اَلْحَمْدُ لِلّٰهِ عَلٰى نِعْمَةِ الْاٖيمَانِ» دى.
(راحتسزلق و صيقنتيلر، بو أهمّيتلى باصامغڭ باقى قسمنى تأخيره سبب اولديلر.)
يدنجى باصامق:
﴿وَبِسِرِّ اَنَّ الذَّرَّةَ وَالْجُزْءَ وَالْجُزْئِىَّ وَالنُّوَاةَ وَالْاِنْسَانَ لَيْسَتْ
بِاَقَلَّ صَنْعَةً وَجَزَالَةً مِنَ النَّجْمِ وَالْكُلِّ وَالْكُلِّىِّ وَالشَّجَرِ وَالْعَالَمِ﴾
بر إخطار:
بو طوقوز باصامقلرڭ حقيقتلرينڭ أساسى و معدنى و گونشى، سورۀِ إخلاصدن (قُلْ هُوَ اللهُ اَحَدٌ ۞ اَللهُ الصَّمَدُ) آيتلريدر. سرِّ أحديت و صمديت جلوهسندن گلن لمعهلره قيصه إشارتلردر.
بو يدنجينڭ مئالنه بر ايكى نكته ايله غايت مختصر باقوب، تفصيلنى رسالۀِ نوره حواله ايدرز. يعنى؛ گوز و بيندهكى عجيب وظيفهلرى گورن بر ذرّه، بر ييلديزدن و بر جزء، كلّ مجموعندن.. مثلا؛ دماغ و گوز، إنسانڭ تمامندن و جزئى بر فرد، حسنِ صنعتجه و غرابتِ خلقتجه عموم بر نوعدن و بر إنسان، عجيب جهازلريله كلّى جنس حيواندن و بر فهرسته و پروغرام و قوّۀِ حافظه حكمنده اولان بر چكردك، مكمّل مصنوعيتى و مخزنيتجه قوجه آغاجندن و بر كوچك كائنات اولان بر إنسان، كمالِ خلقتى و جمعيتلى خارقه جهازلرينڭ بيڭلر عجيب وظيفهلرى گورهجك بر طرزده مخلوقيتى كائناتدن آشاغى دگللر.
ديمك ذرّهيى ايجاد ايدن، ييلديزڭ ايجادندن عاجز قالاماز. و لسان گبى بر عضوى خلق ايدن، ألبته إنسانى قولايجه خلق ايدر. و بر تك إنسانى بويله مكمّل يارادان، هر حالده بتون حيواناتى كمالِ سهولتله ياراتهبيلهجك و گوزيمز اوڭنده ياراتييور. و چكردگى بر ليسته، بر فهرسته، بر دفترِ قوانينِ أمريه، بر عقدۀِ حياتيه ماهيتنده يارادان، ألبته بتون آغاجلرڭ خالقى اولابيلير. و عالمڭ بر نوع معنوى چكردگى و جمعيتلى ميوهسى اولان إنسانى خلق ايدوب بتون أسماءِ إلٰهيهيه مظهر و آيينه و بتون كائناتله علاقهدار و زمينڭ خليفهسى ياپان ذاتڭ، ألبته و ألبته اويله بر قدرتى وار كه، قوجه كائناتى إنسان ايجادينڭ قولايلغى و سهولتى درجهسنده خلق ايدوب تنظيم ايدر.
اويله ايسه؛ ذرّهنڭ و جزء و جزئى و چكردك و بر إنسانڭ خالقى، صانعى، ربّى كيم ايسه؛ ألبته بداهتله ييلديزلرڭ و نوعلرڭ و كلّ و كلّياتلرڭ و آغاجلرڭ و بتون كائناتڭ خالقى، صانعى، ربّى عينًا اودر. باشقه اولماسى محال و ممتنعدر.
سكزنجى باصامق:
﴿وَبِسِرِّ اَنَّ الْمُحَاطَ وَالْجُزْئِيَّاتِ كَالْاَمْثِلَةِ الْمَكْتُوبَةِ الْمُصَغَّرَةِ اَوْ كَالنُّقَطِ الْمَحْلُوبَةِ الْمُعَصَّرَةِ فَلَا بُدَّ اَنْ يَكُونَ الْمُحٖيطُ وَالْكُلِّيَّاتُ فٖى قَبْضَةِ خَالِقِ الْمُحَاطِ وَالْجُزْئِيَّاتِ لِيُدْرِجَ مِثَالَهَا فٖيهَا بِمَوَازٖينِ عِلْمِهٖ اَوْ يُعَصِّرَهَا مِنْهَا بِدَسَاتٖيرِ حِكْمَتِهٖ﴾
يعنى: إحاطه ايديلن جزئيات و كلّ و كلّياتڭ ايچنده بولونان فردلر و تخملر و چكردكلرڭ، إحاطه ايدن بيوك كلّياته نسبتلرى؛ گويا كوچوجك نمونه و غايت اينجه يازى ايله چوق كوچك قطعهده يازيلمش عين كلّ و كلّياتڭ مثاللريدر. اويله ايسه، إحاطه ايدن كلّيات، او جزئيات خالقنڭ قبضهسنده و تمامًا تصرّفنده بولونمق لازمدر. تا علمنڭ ميزانلريله و اينجه قلملريله او بيوك محيطڭ كتابنى، او چوق كوچوجك يوزر قطعهلرده، دفترلرده درج ايدهبيلسين.
هم إحاطه ايديلن أجزا و جزئياتڭ محيط ايله نسبتلرى، تمثيللرى، گويا سوت گبى محيطلكدن صاغيلمش قطرهلر.. ويا برى او محيطى صيقمش، او نقطهلر اوندن آقمش. مثلا؛ قاوون چكردگى، اونڭ عموم أطرافندن صاغيلمش بر قطره ويا او كتاب تمامًا ايچنده يازيلمش بر نقطهدر كه؛ فهرستهسنى، ليستهسنى، پروغرامنى طاشييور.
مادام بويلهدر، ألبته او جزئيات و قطرهلر و نقطهلر و فردلر صانعنڭ ألنده، او محيط كلّ و كلّيات بولونمق ألزمدر. تا حكمتنڭ حسّاس دستورلريله او فردلرى، قطرهلرى، نقطهلرى اوندن صاغسين.
ديمك بر تك تخمى، بر تك فردى يارادان، ألبته او بيوك كلّ و كلّياتى و اونلرى إحاطه ايدن و اونلردن چوق بيوك اولان ديگر كلّياتلرى و جنسلرى يارادان ينه اودر، باشقه اولاماز. اويله ايسه، بر تك نفسى يارادان، بتون إنسانلرى ياراتهبيلير. و بر تك ئولويى ديريلتن، حشرده بتون جنّ و إنس ئولولرينى ديريلتهبيلير و ديريلتهجك.
ايشته (مَا خَلْقُكُمْ وَلَا بَعْثُكُمْ اِلَّا كَنَفْسٍ وَاحِدَةٍ) آيتنڭ حكمى و دعواسى غايت قطعى و پارلاق بر صورتده حق و عينِ حقيقت اولديغنى گور.
طوقوزنجى باصامق:
﴿وَبِسِرِّ كَمَا اَنَّ قُرْاٰنَ الْعِزَّةِ الْمَكْتُوبَ عَلَى الذَّرَّةِ الْمُسَمَّاةِ بِالْجَوْهَرِ الْفَرْدِ بِذَرَّاتِ الْاَثٖيرِ لَيْسَ بِاَقَلَّ جَزَالَةً وَخَارِقِيَّةَ صَنْعَةٍ مِنْ قُرْاٰنِ الْعَظَمَةِ الْمَكْتُوبِ عَلٰى صَحٖيفَةِ السَّمَاءِ بِمِدَادِ النُّجُومِ وَالشُّمُوسِ كَذٰلِكَ اِنَّ وَرْدَ الزُّهْرَةِ لَيْسَتْ بِاَقَلَّ جَزَالَةً وَصَنْعَةً مِنْ دُرِّىِّ نَجْمِ الزُّهْرَةِ وَلَا النَّمْلَةُ مِنَ الْفٖيلَةِ وَلَا الْمِكْرُوبُ مِنَ الْكَرْكَدَانِ وَلَا النَّحْلَةُ مِنَ النَّخْلَةِ بِالنِّسْبَةِ اِلٰى قُدْرَةِ خَالِقِ الْكَائِنَاتِ فَكَمَا اَنَّ غَايَةَ كَمَالِ السُّرْعَةِ وَالسُّهُولَةِ فٖى اٖيجَادِ الْاَشْيَاءِ اَوْقَعَتْ اَهْلَ الضَّلَالَةِ فٖى اِلْتِبَاسِ التَّشْكٖيلِ بِالتَّشَكُّلِ الْمُسْتَلْزِمِ لِمُحَالَاتٍ غَيْرِ مَحْدُودَةٍ تَمُجُّهَا الْاَوْهَامُ كَذٰلِكَ اَثْبَتَتْ لِاَهْلِ الْهِدَايَةِ تَسَاوِىَ النُّجُومِ مَعَ الذَّرَّاتِ بِالنِّسْبَةِ اِلٰى قُدْرَةِ خَالِقِ الْكَائِنَاتِ جَلَّ جَلَالُهُ وَلَا اِلٰهَ اِلَّا هُوَ اللّٰهُ اَكْبَرُ﴾
(بو صوڭ باصامغڭ اوزون بر بيانله مئالنى سويلهمك ايستردم. فقط مع التأسّف كيفى تحكّم و تضييقلردن گلن شدّتلى صيقنتيلر و تسمّمدن گلن ضعفيت و أليم خستهلقلر مانع اولماسندن، مئالنه يالڭز پك قيصه بر إشارتله إكتفايه مجبور اولدم.)
يعنى: ناصلكه فرضا قابلِ إنقسام اولميان و علمِ كلام و فلسفهده جوهرِ فرد نامنى آلان بر ذرّهده، اوندن داها كوچوجك اولان مادّۀِ أثيريه ذرّهلريله بر قرآنِ عظيم الشان يازيلسه و سماوات صحيفهلرنده دخى ييلديزلر و گونشلرله ديگر بر قرآنِ كبير يازيلسه، ايكيسى موازنه ايديلسه؛ ألبته جوهرِ فرد ذرّهسندن يازيلان خردهبينى قرآن، گوكلر يوزلرينى يالديزلايان قرآنِ عظيم و كبيردن عجائبجه و صنعتڭ إعجازنده گرى دگل، بلكه بر جهتده ايلرى اولديغى گبى؛ عينًا اويله ده: خالقِ كائناتڭ قدرتنه نسبةً مصنوعيتندهكى غرابت و جزالت نقطهسنده زهره چيچگى، زهره ييلديزندن گرى دگل و قارينجه، فيلدن آشاغى اولماز و ميقروب، گرگداندن خلقتجه داها عجيب و آرى سينگى، خرما آغاجندن فطرتِ عجيبهسيله داها ايلريدر.
ديمك بر آرىيى يارادان، بتون حيوانلرى ياراتهبيلير. بر نفسى ديريلتن، حشرده بتون إنسانلرى إحيا ايدوب حشر ميداننده طوپلايهبيلير و طوپلايهجق. هيچ بر شى اوڭا آغير گلمز كه؛ گوزيمز اوڭنده غايت چابوق و قولايلقله هر بهارده حشرڭ يوز بيڭ نمونهلرينى ياراتييور.
صوڭ جملۀِ عربيهنڭ غايت قيصهجق مئالى شودر: يعنى؛ أهلِ ضلالت، مذكور باصامقلرڭ صارصيلماز حقيقتلرينى بيلمدكلرندن و غايت چابوق و غايت قولايلقله بردن مخلوقات وجوده گلدكلرندن، تشكيلى و بر صانعڭ حدسز قدرتيله ايجادى، تشكّل و كندى كنديلرينه وجود بولمق توهّم ايدوب؛ هيچ بر ذهن، حتّى وهم دخى قبول ايتمديگى و هر جهتله محال و إمكانسز خرافهلرڭ قپوسنى كنديلرينه آچمشلر. مثلا؛ او حالده ذىحياتڭ هر بر ذرّهسنه حدسز بر قدرت، بر علم، هر شيئى گورهجك بر گوز و هر صنعتى ياپابيلهجك بر إقتدار ويرمك لازم گلير. بر تك إلٰهى قبول ايتمهمكله، ذرّهلر عددنجه إلٰههلرى مذهبلرنجه قبول ايتمگه مجبور اولارق جهنّمڭ أسفلِ سافليننه گيرمگه مستحق دوشرلر.
امّا أهلِ هدايت ايسه، گچن باصامقلردهكى قوّتلى حقيقتلر و صارصيلماز حجّتلر، سليم قلبلرينه و مستقيم عقللرينه غايت قطعى قناعت و قوّتلى ايمان و عين اليقين بر تصديق ويرمش كه، شبههسز و وسوسهسز إطمئنانِ قلب ايله إعتقاد ايدرلر كه؛ ييلديزلر، ذرّهلر، أڭ كوچك، أڭ بيوك؛ قدرتِ إلٰهىيه نسبةً فرقلرى يوقدر كه، گوزيمز اوڭنده بو عجائبلر اولويور. و هر بر عجيبۀِ صنعت (مَا خَلْقُكُمْ وَلَا بَعْثُكُمْ اِلَّا كَنَفْسٍ وَاحِدَةٍ) آيتنڭ دعواسنى تصديق و حكمى عينِ حق و حقيقت اولديغنه شهادت ايدرلر، لسانِ حال ايله (اَللهُ اَكْبَرُ) ديرلر. بز دخى اونلرڭ عددنجه (اَللهُ اَكْبَرُ) ديرز. و شو آيتڭ دعواسنى بتون قوّت و قناعتمزله تصديق و حكمى عينِ حق و نفسِ حقيقت اولديغنه حدسز حجّتلرله شهادت ايدرز.
﴿سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ﴾
(اَللّٰهُمَّ صَلِّ وَسَلِّمْ عَلٰى مَنْ اَرْسَلْتَهُ رَحْمَةً لِلْعَالَمٖينَ
وَالْحَمْدُ لِلّٰهِ رَبِّ الْعَالَمٖينَ)
* * *