الحجّة الزهرانڭ ايكنجى مقامى
﴿بِسْمِ اللّٰهِ الرَّحْمٰنِ الرَّحٖيمِ﴾
﴿وَبِهٖ نَسْتَعٖينُ﴾
فاتحهنڭ آخرنده، أهلِ هدايت و إستقامت و أهلِ ضلالت و طغيانڭ موازنهسنه إشارت ايدن و رسالۀِ نورڭ بتون موازنهلرينڭ منبعى اولان آيتڭ بر حقيقتنى سورۀِ نوردن
﴿اَللّٰهُ نُورُ السَّمٰوَاتِ وَالْاَرْضِ مَثَلُ نُورِهٖ كَمِشْكٰوةٍ فٖيهَا مِصْبَاحٌ اَلْمِصْبَاحُ فٖى زُجَاجَةٍ اَلزُّجَاجَةُ كَاَنَّهَا كَوْكَبٌ دُرِّىٌّ يُوقَدُ مِنْ شَجَرَةٍ مُبَارَكَةٍ ... الخ﴾
آيتى و آرقهسنده
﴿اَوْ كَظُلُمَاتٍ فٖى بَحْرٍ لُجِّىٍّ يَغْشٰيهُ مَوْجٌ مِنْ فَوْقِهٖ مَوْجٌ ... الخ﴾
آيتيله برابر پك عجيب بر طرزده او موازنهيى معجزانه إفاده ايدرلر.
برنجى آيتِ نور (برنجى شعاعده إثبات ايديلمش كه) اون إشارتله رسالۀِ نوره باقييور، معجزانه قرآنڭ او تفسيرندن غيبى خبر ويرييور. و رسالۀِ نوره نور نامى ويريلمسنه أڭ برنجى سبب اولماسندن، يگرمى طوقوزنجى مكتوبڭ بر قسمنده بر سياحتِ خياليه تمثيلنده، بو عجيب آيتڭ «نور» كلمهسنده «نُونِ نَعْبُدُ» معجزهسى گبى بر معنوى معجزهسنڭ بياننه بناءً، آيت الكبرا رسالهسنده دنيا سيّاحى، خالقنى آرامق، بولمق، طانيمق ايچون بتون كائناتدن و أنواعِ موجوداتندن صورديغى و اوتوز اوچ يول ايله و قطعى برهانلرله خالقنى علم اليقين و عين اليقين بيلديگى گبى؛ او عين سيّاح عصرلرده و أرض و سماوات طبقهلرنده عقليله، قلبيله، خياليله گزن يورولماز، طوق اولماز، بتون دنيايى بر شهر گبى گوروب، تفتيش ايدهرك، كاه قرآن حكمتنه، كاه فلسفه حكمتنه عقلنى بينديروب گنيش خيال دوربينيله أڭ اوزاق طبقهلره باقهرق، حقيقتلرى واقعده اولديغى گبى گورمش، بزلره آيت الكبراده قسمًا خبر ويرمش.
ايشته شيمدى بز، او عينِ حقيقت و بر تمثيل معناسنده اولان سياحتِ خياليهسيله گيرديگى پك چوق عالملر و طبقهلردن نمونه ايچون يالڭز اوچ طبقهسنى، فاتحه آخرندهكى موازنهنڭ يالڭز قوّۀِ عقليه جهتنده بر مثالنى، غايت مختصر بيان ايدهجگز. سائر مشهوداتنى و موازنهلرينى، رسالۀِ نورڭ موازنهلرينه حواله ايدرز.
برنجى نمونه شويله:
او، دنيايه صِرف خالقنى طانيمق، بولمق ايچون گلن سيّاح، عقلنه ديدى: «بز، هر شيدن خالقمزى صوردق، گوزل، تام جواب آلدق. شيمدى «گونشى گونشدن صورمق لازم» ضربِ مَثلى گبى، بز دخى خالقمزى، «علم» و «إراده» و «قدرت» گبى قدسى صفتلرينڭ تجلّيلريله و مشهود أثرلريله و إسملرينڭ جلوهلريله طانيمق، بولمق ايچون بر سياحت داها ياپاجغز.» دييه دنيايه گيردى. و ايكنجى بر جريان اولان أهلِ ضلالت گبى بردن كُرۀِ أرض سفينهسنه بيندى. حكمتِ قرآنيهيه تابع اولميان فن و فلسفه گوزلگنى طاقدى. و قرآن اوقوميان جغرافيا فنّنڭ پروغراميله باقدى، گوردى كه: نهايتسز بر بوشلقده، بر سنهده يگرمى درت بيڭ سنهلك بر دائرهده، طوپ گلّهسندن يتمش دفعه سرعتلى بر حركتله گزر. يوز بيڭلر نوع بيچاره، عاجز ذىحياتلرى ايچنه آلمش. أگر بر دقيقه يولنى شاشيرسه ويا بر سرسرى ييلديزه چارپسه، پارچهلانهرق حدسز فضاده سقوط ايله، بتون او بيچاره ذىحياتلرى عدمه، هيچلگه بوشالتهجق، دوكهجك دييه آڭلادى. (غَيْرِ الْمَغْضُوبِ عَلَيْهِمْ وَلَا الضَّٓالّٖينَ) جرياننڭ دهشتلى معنوى مصيبتنى، (اَوْ كَظُلُمَاتٍ فٖى بَحْرٍ لُجِّىٍّ) ڭ بوغوجى قراڭلغنى حسّ ايدهرك «أيواه! نه ياپدق؟ بو دهشتلى گمىيه نهدن بيندك؟ بوندن قورتولمق چارهسى نهدر؟» دييه او كور فلسفهنڭ گوزلگنى قيردى، (اَلَّذٖينَ اَنْعَمْتَ عَلَيْهِمْ) جرياننه گيردى. بردن حكمتِ قرآنيه إمدادينه گلدى، تام حقيقتنى گوسترن بر دوربين عقلنه ويردى، «شيمدى باق» ديدى. باقدى، گوردى كه: (رَبُّ السَّمٰوَاتِ وَالْاَرْضِ) إسمى، (هُوَ الَّذٖى جَعَلَ لَكُمُ الْاَرْضَ ذَلُولًا فَامْشُوا فٖى مَنَاكِبِهَا وَكُلُوا مِنْ رِزْقِهٖ) برجنده بر گونش گبى طلوع ايتدى. زمينى غايت منتظم و سلامتلى بر گمى و ذىحياتلرى رزقلريله برابر ايچنه طولديرمش، كائنات دڭزنده چوق حكمتلر و منفعتلر ايچون سياحتله گونش أطرافنده گزديروب موسملرڭ محصولاتنى أرزاق ايستهينلره گتيرر و «ثَوْر» و «حوت» ناملرنده ايكى مَلگى او سفينهيه قپودان ياپمش، غايت گوزل و محتشم مملكتِ ربّانيهده خالقِ ذو الجلالڭ مخلوقات و مسافرلرينى كيفلنديرمك ايچون گزديرييور. و اونڭ ايله، (اَللّٰهُ نُورُ السَّمٰوَاتِ وَالْاَرْضِ) حقيقتنى گوسترر، خالقنى بو إسمڭ جلوهسيله طانيتديرر دييه آڭلادى. بتون روح و جانيله (اَلْحَمْدُ لِلّٰهِ رَبِّ الْعَالَمٖينَ) ديدى، (اَلَّذٖينَ اَنْعَمْتَ عَلَيْهِمْ) طائفهسنه گيردى.
او سيّاحڭ عالملردهكى سياحتنده گورديگى نمونهلردن ايكنجى نمونهسى:
او سيّاح، كُرۀِ أرض گميسندن چيقوب حيوانات و إنسانلر عالمنه گيردى. ديندن روح آلميان حكمتِ طبيعيه گوزلگى ايله او عالمه باقدى، گوردى كه: او حدسز ذىحياتلرڭ حدسز إحتياجلرى و اونلرى إنجيتن و خيرپالايان حدسز مضر دشمنلرى و مرحمتسز حادثهلرى وار ايكن، او إحتياجلره قارشى سرمايهلرى بيڭدن، بلكه يوز بيڭدن آنجق بر اولابيلير. و او مضر شيلره مقابل إقتدارلرى، ميليوندن آنجق بردر. بو چوق دهشتلى و آجينهجق وضعيتده، رقّتِ جنسيه و شفقتِ نوعيه و عقل علاقهدارلغى ايله اونلرڭ حالنه او درجه آجيدى و محزون و مأيوس و جهنّم عذابى گبى ألملر آليركن و او پريشان عالمه گيرديگنه بيڭ پشيمان اولوركن، بردن حكمتِ قرآنيه إمدادينه يتيشدى، (اَلَّذٖينَ اَنْعَمْتَ عَلَيْهِمْ) دوربيننى ويردى. «باق» ديدى. باقدى، گوردى كه: (اَللّٰهُ نُورُ السَّمٰوَاتِ وَالْاَرْضِ) تجلّيسيله رحمٰن، رحيم، رزّاق، منعم، كريم، حفيظ گبى چوق أسماءِ إلٰهيهنڭ هر برى، برر گونش گبى
﴿مَا مِنْ دَٓابَّةٍ اِلَّا هُوَ اٰخِذٌ بِنَاصِيَتِهَا ۞ وَكَاَيِّنْ مِنْ دَٓابَّةٍ لَا تَحْمِلُ رِزْقَهَا اَللّٰهُ يَرْزُقُهَا وَاِيَّاكُمْ ۞ وَلَقَدْ كَرَّمْنَا بَنٖٓى اٰدَمَ ۞ اِنَّ الْاَبْرَارَ لَفٖى نَعٖيمٍ﴾
گبى آيتلرڭ برجلرنده طلوع ايتديلر. او إنسان و حيوان دنياسنى رحمتله، إحسانله طولديروب بر نوع موقّت جنّته چويرديلر. و بو شايانِ تماشا، گوزل عبرتلى مسافرخانهنڭ مهماندارِ كريمنى تام بيلديردكلرينى بيلدى. بيڭ كرّه (اَلْحَمْدُ لِلّٰهِ رَبِّ الْعَالَمٖينَ) ديدى.
سياحتندهكى يوزر مشاهداتندن اوچنجى نمونهسى:
خالقنى، إسملرينڭ و صفتلرينڭ تجلّى و جلوهلريله طانيمق ايستهين او دنيا سيّاحى، عقل و خيالنه ديدى كه: «هايدى! روحلر و مَلكلر گبى بز دخى جسديمزى يرده بيراقوب گوكلره چيقهجغز. خالقمزى سماواتدهكيلردن صوراجغز. روح خياله و عقل فكره بينديلر، سمايه چيقديلر. قوزموغرافيا فنّنى كنديلرينه رهبر ايتديلر. دينى ديڭلهمهين بر فلسفه نظريله، (مَغْضُوبْ ضَالِّينْ) جريانلريله باقديلر. گوردى كه:
كُرۀِ أرضدن بيڭ دفعه بيوك، طوپ گلّهسندن يوز دفعه چابوق حركت ايدنلر ايچلرنده بولونان بيڭلر كتلهلر، آتش صاچان ييلديزلر، شعورسز، جامد، سرسرى گبى بربرى ايچنده سرعتله گزرلر. بر دقيقه بر تصادفله برى يولنى شاشيرسه؛ او بوش و حدودسز و حدسز، نهايتسز عالمده بر شعورسز كره ايله چارپمق صورتنده قيامت گبى بر هرج و مرجه سبب اولور.
او سيّاح، هانگى طرفه باقدى ايسه؛ دهشت و وحشت و حيرت و قورقمق آلدى، گوگه چيقديغنه بيڭ پشيمان اولدى. عقل و خيال بتون بتون بوزولديلر. «بزم وظيفهمز گوزل حقيقتلرى گورمك و گوسترمك ايكن، بويله جهنّم گبى چركين و عذابلى معنالرى بيلمك، مشاهده ايتمك وظيفهسندن إستعفا ايدييورز و ايستهمييورز» ديركن، بردن (اَللّٰهُ نُورُ السَّمٰوَاتِ وَالْاَرْضِ) تجلّيسى ايله، (خَالِقُ السَّمٰوَاتِ وَالْاَرْضِ) و (مُسَخِّرُ الشَّمْسِ وَالْقَمَرِ) و (رَبُّ الْعَالَمٖين) گبى چوق إسملر، هر برى برر گونش گبى (وَلَقَدْ زَيَّنَّا السَّمَٓاءَ الدُّنْيَا بِمَصَابٖيحَ) و (اَفَلَمْ يَنْظُرُٓوا اِلَى السَّمَٓاءِ فَوْقَهُمْ كَيْفَ بَنَيْنَاهَا وَزَيَّنَّاهَا) و (ثُمَّ اسْتَوٰٓى اِلَى السَّمَٓاءِ فَسَوّٰيهُنَّ سَبْعَ سَمٰوَاتٍ) گبى آيتلرڭ برجلرنده طلوع ايتديلر. بتون سماواتى نورله، مَلكلرله طولديرديلر، بر بيوك جامعه و مسجده و اوردوگاهه چويرديلر. او سيّاح (اَلَّذٖينَ اَنْعَمْتَ عَلَيْهِمْ) جرياننه گيردى. ضالّيندن، (اَوْ كَظُلُمَاتٍ فٖى بَحْرٍ لُجِّىٍّ) دن قورتولدى. بردن جنّت گبى منتظم، گوزل، محتشم بر مملكت گوردى. هر طرفده خالقِ ذو الجلالى بيلديرييورلر بر وضعيتى مشاهدهسيله، عقل و خيالڭ قيمتلرى و وظيفهلرى بيڭ درجه ترقّى ايتدى.
ايشته او سيّاحڭ كائناتدهكى سياحتنڭ يوزر نمونهسندن بو مذكور اوچ نمونهيه قياسًا سائر مشاهداتنى و إسملرڭ جلوهلريله واجب الوجودڭ معرفتنى رسالۀِ نوره حواله ايدوب بو پك قيصه إشارته إكتفاءً، بو پك اوزون قصّهيى قيصه كسهرك خالقمزى بيلديرن قدسى صفتلردن و صفاتِ سبعهسندن يالڭز «علم» و «إراده» و «قدرت» گبى اوچ مهمّ صفتلرڭ أثرلريله، تجلّيلريله و تحقّقلرينڭ حجّتلريله كائنات خالقنى طانيمغه او دنيا سيّاحى گبى غايت قيصه إشارتلرله چاليشهجغز. تفصيلاتنى رسالۀِ نوره حواله ايدرز.
ايشته عربى حزبِ نورىنڭ خلاصة الخلاصهسندن دائمى، تفكّرى بر وردم و (اَللهُ اَكْبَرُ) جملهسنڭ اوتوز اوچ مرتبهسندن اوچ مرتبهيى بيان ايدن بو گلن عربى فقرهنڭ بر نوع ترجمهسى ايچنده قيصه إشارتلرله علماءِ علمِ كلامى و عقيده علماسنى پك چوق مشغول ايدن علم و إراده و قدرتِ إلٰهيهنڭ كائناتدهكى جلوهلريله، اونلرى عين اليقين ايمان ايله تصديق و اونلرله واجب الوجودڭ بداهتله موجوديتنه و وحدانيتنه علم اليقين تصديق ايله تام ايمان ايتمگه يول آچان بو عربى فقرهدر:
﴿بِسْمِ اللّٰهِ الرَّحْمٰنِ الرَّحٖيمِ﴾
﴿وَقُلِ الْحَمْدُ لِلّٰهِ الَّذٖى لَمْ يَتَّخِذْ وَلَدًا وَلَمْ يَكُنْ لَهُ شَرٖيكٌ فِى الْمُلْكِ وَلَمْ يَكُنْ لَهُ وَلِىٌّ مِنَ الذُّلِّ وَكَبِّرْهُ تَكْبٖيرًا ٠
اَللّٰهُ اَكْبَرُ مِنْ كُلِّ شَىْءٍ قُدْرَةً وَعِلْمًا اِذْ هُوَ الْعَلٖيمُ بِكُلِّ شَىْءٍ بِعِلْمٍ مُحٖيطٍ لَازِمٍ ذَاتِىٍّ (*)3 لِلذَّاتِ يَلْزُمُ الْاَشْيَاءَ لَا يُمْكِنُ اَنْ يَنْفَكَّ عَنْهُ شَىْءٌ بِسِرِّ الْحُضُورِ وَالشُّهُودِ وَالْاِحَاطَةِ النُّورَانِيَّةِ وَبِسِرِّ اِسْتِلْزَامِ الْوُجُودِ لِلْمَعْلُومِيَّةِ وَاِحَاطَةِ نُورِ الْعِلْمِ بِعَالَمِ الْوُجُودِ ٠
نَعَمْ فَالْاِنْتِظَامَاتُ الْمَوْزُونَةُ وَالْاِتِّزَانَاتُ الْمَنْظُومَةُ وَالْحِكَمُ الْقَصْدِيَّةُ الْعَامَّةُ وَالْعِنَايَاتُ الْمَخْصُوصَةُ الشَّامِلَةُ وَالْاَقْضِيَّةُ الْمُنْتَظَمَةُ وَالْاَقْدَارُ الْمُثْمِرَةُ وَالْاٰجَالُ الْمُعَيَّنَةُ وَالْاَرْزَاقُ الْمُقَنَّنَةُ وَالْاِتْقَانَاتُ الْمُفَنَّنَةُ وَالْاِهْتِمَامَاتُ الْمُزَيَّنَةُ وَغَايَةُ كَمَالِ الْاِنْتِظَامِ الْاِنْسِجَامِ الْاِتِّسَاقِ الْاِتْقَانِ الْاِتِّزَانِ الْاِمْتِيَازِ الْمُطْلَقَاتِ فٖى كَمَالِ السُّهُولَةِ الْمُطْلَقَةِ دَالَّاتٌ عَلٰى اِحَاطَةِ عِلْمِ عَلَّامِ الْغُيُوبِ بِكُلِّ شَىْءٍ ٠ اَلَا يَعْلَمُ مَنْ خَلَقَ وَهُوَ اللَّطٖيفُ الْخَبٖيرُ ٠ فَنِسْبَةُ دَلَالَةِ حُسْنِ صَنْعَةِ الْاِنْسَانِ عَلٰى شُعُورِ الْاِنْسَانِ اِلٰى نِسْبَةِ دَلَالَةِ حُسْنِ خِلْقَةِ الْاِنْسَانِ عَلٰى عِلْمِ خَالِقِ الْاِنْسَانِ كَنِسْبَةِ لُمَيْعَةِ زُجَيْجَةِ الذُّبَيْبَةِ فِى اللَّيْلَةِ الدَّهْمَاءِ اِلٰى شَعْشَعَةِ الشَّمْسِ فٖى رَابِعَةِ النَّهَارِ ٠﴾
غايت قيصه بر نوع ترجمهسى ايچنده علمِ إلٰهىيه، بو پك أهمّيتلى حقيقتِ ايمانيهيه قيصهجق إشارتلر ايدوب تفصيلاتنى رسالۀِ نوره حواله ايله ديرز: (حاشيه)4
أوت ناصلكه رحمت، رزقِ عجائبيله گونش گبى كندينى گوستروب پردۀِ غيبده بر رحمٰنِ رحيمى قطعيتله إثبات ايدييور؛ اويله ده يوزر آياتِ قرآنيهده موقع آلان و قدسى يدى صفتدن بر جهتده أڭ برنجيسى اولان «علم» دخى، نظام و ميزانڭ حكمتلرى و ميوهلريله گونش ضياسى مِثللو كندينى گوسترديگى گبى؛ بر عليمِ كلِّ شيئڭ موجوديتنى قطعيتله بيلديرر. أوت إنسانڭ شعورينه، علمنه دلالت ايدن دوزگون، ئولچولى صنعتى ايله؛ إنسانڭ خالقنڭ علمنه، حكمتنه دلالت ايدن حسنِ خلقتِ إنسان موازنهسى؛ عينًا ييلديز بوجگنڭ گيجهدهكى ايشيغنڭ لمعهجغنڭ، گوندوزده گونشڭ إحاطهلى ضياسنه نسبتى گبيدر.
شيمدى علمِ إلٰهينڭ دليللرينى بيان ايتمهدن أوّل، او قدسى صفتڭ كائناتڭ أنواعندهكى تجلّيلريله ذاتِ أقدسى پك ظاهر بر طرزده گوسترمسنه دلالت و شهادت ايدن معراجِ محمّدى (عصم) گيجهسنده حضور و خطابِ إلٰهىيه مظهر اولديغى زمان، بردن (اَلتَّحِيَّاتُ اَلْمُبَارَكَاتُ اَلصَّلَوَاتُ اَلطَّيِّبَاتُ لِلّٰهِ) دييهرك، بتون ذىحيات و أنواعِ مخلوقات نامنه بر مبعوث و ألچى اولماسندن، بتون اونلرڭ صفتِ علمڭ جلوهلريله ربلرينى بيلديردكلرى طرزده، سلام يرنده عموم ذىشعور بدلنه، خالقنه عموم ذىحياتڭ هديهلرينى تقديم ايدر. يعنى
﴿اَلتَّحِيَّاتُ اَلْمُبَارَكَاتُ اَلصَّلَوَاتُ اَلطَّيِّبَاتُ﴾
درت كلمهلر ايله عموم ذىحياتڭ درت طائفهسنڭ أزلى، أبدى علمڭ جلوهلريله علاّم الغيوبه قارشى تحيّهلرينى، تبريكلرينى، عبوديتلرينى، گوزل معرفتلرينى گوسترديگندن، بو قدسى مكالمۀِ معراجيهيى گنيش معناسيله اوقومق، تشهّدده عموم إسلامڭ فرض بر وظيفهسى اولمش. او قدسى مكالمهنڭ ايضاحاتنى رسالۀِ نوره حواله ايدوب، غايت قيصه درت إشارتله بر معناسنى بيان ايدهجگز:
برنجيسى:
(اَلتَّحِيَّاتُ لِلّٰهِ) در. قيصهجق مئالى شودر: ناصل بر اوسته، پك خارقه بر ماكينهيى درين علمى و معجزهكار ذكاسيله ياپسه، او عجيب ماكينهيى گورن هركس، او اوستهيى تقديركارانه تبريك ايدوب آلقيشلار و تحسينكارانه مدحلرله و إحسانلرله اوڭا مادّى، معنوى هديهلر، تحيّهلر ويرر؛ او ماكينه دخى، او اوستهنڭ ايستديگى طرزده تام تامنه، غايت مكمّل اولارق آرزولرينى و خارقه اينجه صنعتنى و مهارتِ علميهسنى گوسترمهسيله، كندى اوستهسنى لسانِ حال ايله آلقيشلار، تبريك ايدر، معنوى تحيّهلر، هديهلر ويرر.
عينًا اويله ده؛ كائناتده بتون ذىحيات طائفهلرى، هر برى و هر بر فردى، هر طرفى معجزهلى برر خارقه ماكينهدر كه؛ اوستهسنڭ هر شيئڭ هر شى ايله مناسبتنى گورن و هر شيئڭ حياتنه لازم بتون شيلرى گوروب تام يرنده اوڭا يتيشديرن إحاطهلى علمنڭ درين و اينجه جلوهلرى ايله كندينى طانيتديران صانعِ ذو الجلالنى حياتلرينڭ لسانِ حاللريله، إنس و جنّ و مَلك اولان ذىشعورلرڭ قال ديللرى گبى تحيّهلرله آلقيشلار و تبريكلرله (اَلتَّحِيَّاتُ لِلّٰهِ) ديرلر. و حياتلرينڭ فيآتنى طوغريدن طوغرىيه بتون مخلوقاتى بتون أحواليله بيلن خالقلرينه عبوديتكارانه تقديم ايدييورلر كه؛ معراج گيجهسنده بتون ذىحيات نامنه محمّد عليه الصلاة والسلام، واجب الوجودڭ حضورنده سلام يرنده (اَلتَّحِيَّاتُ لِلّٰهِ) دييوب بتون ذىحيات طائفهلرينڭ تحيّه و هديه و معنوى سلاملرينى تقديم ايتمش. أوت عادى بر منتظم ماكينه، إنتظام و ميزانلى هيئتيله شكسز بر ماهر و دقّتلى اوستهيى گوسترديگى گبى؛ كائناتى طولديران حدسز ذىحيات ماكينهلر ده، هر بريسى بيڭ بر معجزاتِ علميهيى گوسترييورلر. ألبته ييلديز بوجگنڭ ايشيغنه نسبةً گونشڭ ضياسى درجهسنده علمڭ جلوهلرى ايله او ذىحياتلر، اوسته و سرمدى صنعتكارلرينڭ وجوبِ وجودينه و معبوديتنه پك پارلاق شهادت ايدرلر.
ايكنجى قدسى كلمۀِ معراجيه:
(اَلْمُبَارَكَاتُ) در. مادام حديثجه نماز، مؤمنڭ معراجيدر و معراجِ أكبرڭ جلوهسنه مظهردر. و مادام دنيا سيّاحى، هر عالمده، علم صفتيله علاّم الغيوب خالقنى بولمش؛ بز دخى او سيّاحله برابر، مباركلرڭ و گورنلره بارك اللّٰه ديديرتنلرڭ و (اَلْمُبَارَكَاتُ) نڭ گنيش عالمنه گيروب بتون ذىروحڭ معصوم، مبارك ياورولرينى و بتون ذىحياتڭ مقدّرات و پروغراملرينڭ قوطوجقلرى اولان تخم و چكردكلرى باشده اولارق او مباركات عالمنى تماشا و مطالعه ايله قدسى صفتِ علمڭ معجزاتلى، اينجه جلوهلريله خالقمزى علم اليقين ايله بيلمگه او سيّاح گبى چاليشهجغز:
أوت گوزيمزله گورويورز كه؛ بتون او معصوم ياوروجقلر و او مبارك مخزنجكلر، صندوقجقلر؛ بر عليمِ حكيمڭ علميله هم عمومى، هم هر بر فردى، بردن بر اويانمق و غايۀِ خلقتنه يورومك ايچون بر حركت آليرلر. حقيقت نظريله باقانلره «بيڭ بارك اللّٰه! يوز بيڭ ما شاء اللّٰه!» ديديرتيرلر.
أوت مثلا: نطفهلر، يمورطهلر، تخملر، چكردكلر هر برى بردن علمدن گلن بر اينجه نظام و او نظام، مهارتدن گلن تام بر ميزان ايچنده؛ او ميزان، يڭى بر تنظيم؛ او ايسه، تازه بر ئولچو و توزين ايچنده؛ او دخى، بر تمييز و تربيه و متشابه أمثالندن قصدى فارقه علامتلرى ايچنده؛ او ده، صنعتلى بر تزيين و سوسلهمك ايچنده؛ بو دخى حكيمانه، لايق، مكمّل جهازات و تصوير ايچنده؛ بو ايسه كريمانه، رزق ايستهينلرڭ ذوقلرينى ممنون ايتمك ايچون، او مخلوقلرڭ و ميوهلرڭ أتلرى و يهنيلن قسملرى إختلاف ايچنده؛ بو ايسه، عالمانه، معجزانه، آيرى آيرى نقشلر، زينتلر ايچنده؛ بو ده، آيرى آيرى گوزل، خوش قوقولر و لذّتلى طاتلر ايچنده كه؛ كمالِ إنتظام ايچنده، بربرندن متمايز، آيرى ايكن كثرت و سرعت و وسعتِ مطلقه ايچنده سهوسز خطاسز، بتون اونلرڭ صورتلرينڭ إنكشافلرى و هر موسمده او خارقه حالڭ دوامى ايچنده بتون او مباركلرڭ هر برى و برابر، بو مذكور اون بش ديل ايله اوستهلرينڭ خارقه مهارتنى و معجزاتلى علمنى گوزه گوستروب علاّم الغيوب، واجب الوجود صانعلرينى گونش گبى بيلديرييورلر. ايشته بو پك گنيش و پارلاق شهادتلرى و صانعنى تبريكلرى ايچوندر كه، معراج گيجهسنده بتون مخلوقات حسابنه قونوشان ذاتِ محمّديه (عصم) (اَلْمُبَارَكَاتُ) كلمهسنى سلام يرنده ديمش.
اوچنجى كلمه:
(اَلصَّلَوَاتُ) در كه؛ هم عمومى معراجِ أكبرِ محمّديده (عصم) هم هر مؤمنڭ خصوصى معراجى اولان نماز تشهّدنده، هر گون هيچ اولمازسه اون دفعه، يوز ميليونلر أهلِ ايمان، او قدسى كلمهيى، پيغمبرڭ (عصم) تبعيتيله درگاهِ إلٰهىيه تقديم ايدوب كائناتده إعلان ايدرلر. معراجه دائر اوتوز برنجى سوز، معراجڭ بتون حقيقتلرينى (بر مخاطب إتّخاذ ايتديگى معنّد، ملحد، منكِرلره قارشى دخى) غايت قطعى و قوّتلى بر صورتده إثبات ايتديگنه بناءً، تفصيلاتنى و حجّتلرينى اوڭا حواله ايدهرك غايت مختصر بر إشارتله بو اوچنجى كلمۀِ معراجيهنڭ گنيش معناسنى گوسترن ذىروح، ذىشعور طائفهلرينڭ عجيب عالمنه باقوب، علمِ أزلينڭ جلوهلريله خالقمزڭ وحدت و موجوديتى ايچنده كمالِ رحمانيتنى و رحيميتنى و عظمتِ قدرت و شمولِ إرادتنى بيلمگه چاليشهجغز:
أوت، بو عالمده گورويورز كه: بو ذىروحلر، شعورًا و عقلًا اولماسه ده حسًّا، فطرةً حسّ ايدييورلر كه؛ هر برى، حدسز بر عجز و ضعف ايچنده، حدسز دشمنلرى و اينجيتنلرى وار و حدسز بر فقر و إحتياج ايچنده، حدسز حاجاتى و مطلوبلرى وار. إقتدارى و سرمايهسى بيڭدن برينه كافى گلمديگندن، بتون قوّتيله باغيرر و آغلار؛ معنًا، فطرةً يالوارير؛ كندينه مخصوص سسيله، لسانيله دعالر، نيازلر، بر نوع نمازلر، صلواتلر ايله بر عليمِ قدير درگاهنه إلتجا ايدركن بردن گورويورز كه؛ او باغيرانلرڭ هر ايشنى، هر إحتياجنى بيلن و هر دردينى و ضررينى آڭلايوب يالوارماسنى، فطرى دعاسنى ايشيدن عليمِ مطلق بر قديرِ حكيم، إمدادلرينه يتيشير، بتون ايستدكلرينى ياپار. آغلامالرينى گولمگه، باغيرمالرينى تشكّرلره چويرر. بو حكيمانه، عليمانه، رحيمانه يارديم، پك پارلاق بر طرزده علم و رحمتڭ جلوهلريله بر مجيبِ مغيث، بر رحيمِ كريمى بيلديروب او ذىروح عالمنڭ بتون صلوات و عبوديتلرينى اوڭا تقديم و تخصيص ايدر معناسيله، معراجِ أكبرده محمّد (عليه الصلاة والسلام) و معراجِ أصغر اولان نمازلرده اونڭ اُمّتى (اَلصَّلَوَاتُ اَلطَّيِّبَاتُ لِلّٰهِ) دير.
دردنجى كلمۀِ قدسيه:
(اَلطَّيِّبَاتُ لِلّٰهِ) در. رسالۀِ نورڭ چوق حقيقتلرى نماز تسبيحاتنده إخطار ايديلمسى حكمتيله؛ هم فاتحهنڭ، هم تشهّدڭ كلمهلرينڭ حقيقتلرينى قيصه إشارتلرله بيان ايتمگه عادتا إختيارسز سَوق ايديلدم.
ايشته معراجِ محمّديده (عصم) دينيلن (اَلطَّيِّبَاتُ لِلّٰهِ) كلمۀِ قدسيهسى؛ أهلِ معرفت و ايمان و كلّى شعور صاحبى اولان إنس و جنّ و مَلك و روحانيلرڭ، كائناتى گوزل طيّبهلرى و حسنهلرى و عبوديتلريله گوزللشديرن و گوزللرڭ عالمنه باقان و سرمدى جميلِ مطلقڭ حدسز جمال و گوزللكلرينى و كائناتى سوسلنديرن إسملرينڭ دائمى گوزللكلرينى تام بيلن و عشق و شوقله كلّى عبوديتلر ايله مقابله ايدن و پارلاق ايمان و گنيش معرفتلر و مدح و ثنالرڭ روائحِ طيّبه و خوش قوقولريله خالقلرينه قارشى او حدسز طيّباتلر معناسيله معراجده سويلنمش سرّيله؛ تشهّدده بتون اُمّت، هر گون اوصانمهدن او قدسى كلمۀِ طيّبهيى تكرار ايدرلر.
أوت بو كائنات، نهايتسز بر حسن و جمالِ سرمدينڭ آيينهسى و جلوهلرى و كائناتدهكى بتون جمال و كمال و گوزللكلر، او سرمدى حُسندن گلير و اوڭا إنتسابله گوزللشير، قيمتى يوكسلير. يوقسه قارمهقاريشيق بر ويرانه، بر حزنگاه اولور. و او إنتساب ايسه، سلطنتِ الوهيتڭ دلاّللرى و إعلانجيلرى اولان إنس و مَلك و روحانيلرڭ معرفت و تصديقلريله آڭلاشيلير. حتّى او دلاّللرڭ گوزل و طاتلى حمدلرينى و ثنالرينى و معبودينه مدحلرينى و اونلرڭ كلمهلرينى هر طرفه نشر و عرشِ أعظمڭ جانبنه سَوق ايتمك ايچون هوا عنصرينڭ ذرّهلرى أمربر نفرلر، كوچوجك ديللر و قولاقلر گبى او گوزل كلمهلرى درگاهِ الوهيته تقديم ايتمك ايچون او پك خارقه وضعيتِ عجيبه هوايه ويريلديگنه قوّتلى بر إحتمال وار دييه قلبمه گلدى.
ايشته إنس و مَلك، ناصلكه ايمانلرى و عبوديتلريله معبودِ ذو الجلالى بيلديرييورلر؛ اويله ده: او حكيمِ ذو الجلال دخى او إعلانجيلره ويرديگى چوق جامع إستعدادلرله، پك خارقه جهازلرله و دقائقِ علميهلريله هر بريسنى بتون كائناتله علاقهدار بر كوچك كائنات حكمنه گتيرمكله كندينى پك پارلاق بر طرزده بيلديرييور. مثلا: إنسانڭ كوچوجك قفاسنده جويز قدر بر يرده قوّۀِ حافظه، قوّۀِ خياليه، قوّۀِ مفكّره گبى متعدّد، عجيب ماكينهلرى ياراتمق و قوّۀِ حافظهيى بر بيوك كتبخانه حكمنه گتيرمكله علمِ أزلينڭ جلوهسيله گونش گبى كندينى گوسترييور. (*)5
شيمدى سابقًا ذكر ايديلن و علمِ محيطڭ كلّى حجّتلرينه إشارت ايدن و بر گنيش حجّت اولارق حدسز برهانلرى إحتوا ايدن و اون بش دليل ايله علمِ محيطى گوسترن عربى پارچهنڭ غايت قيصه بر مئالنه و بر نوع ترجمهسنه إشارت ايدرز.