﴿بِاسْمِهٖ سُبْحَانَهُ﴾
رسالۀِ نور حقّنده يازيلان بو حقيقتلى و اوزون مكتوبى يازان مرحوم حسن فيضى قارداشمز، عينًا شهيد مرحوم حافظ على مِثللو، بر مكتوبنده ديديگى گبى: «دخى نذرم بو كه، جانم سڭا قربان اولاجق!» ديديگنى تصديقًا استادينه بدل شهيد اولوب، شهيد قارداشى بيوك حافظ علىنڭ ياننه گيتمش. بو ذاتِ ذو الجناحيْن، أهلِ قلب و غايت يوكسك بر أهلِ علم و حقيقت، اوتوز سنه معلّملك پردهسى آلتنده ايمانه خدمت ايتمش و اون سنهدن بَرى رسالۀِ نورى ألده ايدوب، گيزلى پرده آلتنده چاليشمش. صوڭره ده ايكى سنه ظرفنده طوغريدن طوغرىيه رسالۀِ نورڭ يوكسك حقيقتلرينى و كمالاتنى چكينميهرك روح و جانيله هركسه إعلان ايتمشدر. جنابِ حق، رسالۀِ نورڭ هر بر حرفنه مقابل اونڭ روحنه و عالمِ برزخدهكى نورجى آرقداشلرينڭ روحلرينه بيڭلر رحمت أيلهسين. آمين، آمين، آمين.
سعيد النورسى
(مكتب فنوننده و علومِ إسلاميهده غايت مدقّق و قِدَملى معلّملردن حسن فيضىنڭ أهمّيتلى و چوق اوزون بر مكتوبيدر. فقط بر قسمى طىّ ايديلدى، نشرينه لزوم گورولمدى.)