فقط گيزلى منافقلر ناصلكه بر قسم خواجهلرى بتون بتون معناسز و حقسز بر طرزده، أهلِ مدرسهنڭ و خواجهلرڭ حقيقى مالى اولان رسالۀِ نور عليهنده إستعمال ايتدكلرى گبى؛ بعض فلسفهجيلرڭ أنانيتِ علميهلرينى تحريك ايدوب، نورلر عليهنده إستعمال ايتمك إحتمالنه بناءً، بو حقيقت عصاىِ موسى و ذو الفقار مجموعهلرى باشنده يازيلسه مناسب اولور.
سعيد النورسى
* * *
﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق قارداشلرم!
أوّلا: رسالۀِ نورڭ ماكينه ايله و شيمدى عمومى بر إنتباهله و مركزدهكى أهلِ وقوفڭ تقديريله دائرهسى تام گنيشلنمهسندن ألبته هر نوع أهلِ علم دقّتله باقهجقلر. اونلرڭ ايچنده بدعهلر طرفدارى و أنانيتلى و مشكلپسند و تنقيدجى قسملرى إعتراضه چاليشهجقلر. شيمدى سزلر اوچ أساسى اونلره قارشى بر جواب ياپارسڭز:
برنجى أساس:
شيمدى إنسانلرده كيم وار كه، قصورى بولونماسين. مادام حسنات أگر سيّئاته راجح گلسه عفو ايديلير. ألبته بو قدر آغير شرائط آلتنده گوز اوڭنده بو فوق العاده خدمتِ ايمانيه ايله يوز بيڭلر بيچارهلرى شبههلردن قورتارمق، اويله بر حسنهدر كه بيڭلر قصوراتى عفو ايتديرر.