﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق قارداشلرم!
مادام رسالۀِ نور، ماكينه ايله تعمّم ايتمگه باشلامش و مادام فلسفه و حكمتِ جديدهيى اوقويان مكتبليلر و معلّملر چوقلقله رسالۀِ نوره ياپيشييورلر. ألبته بر حقيقت بيان ايتمك لازم گلييور. شويله كه:
رسالۀِ نورڭ شدّتله طوقات وورديغى و هجوم ايتديگى فلسفه ايسه مطلق دگلدر، بلكه مضر قسمنهدر. چونكه فلسفهنڭ حياتِ إجتماعيۀِ بشريهيه و أخلاق و كمالاتِ إنسانيهيه و صنعتڭ ترقّياتنه خدمت ايدن فلسفه و حكمت قسمى ايسه، قرآن ايله باريشيقدر. بلكه قرآنڭ حكمتنه خادمدر، معارضه ايدهمز. بو قسمه رسالۀ نور ايليشمييور.
ايكنجى قسم فلسفه، ضلالته و إلحاده و طبيعت باتاقلغنه دوشورمگه وسيله اولديغى گبى سفاهته و لهويات ايله غفلت و ضلالتى نتيجه ويرديگندن و سحر گبى خارقهلريله قرآنڭ معجزهكار حقيقتلريله معارضه ايتديگى ايچون، رسالۀِ نور أكثر أجزالرنده ميزانلرله و قوّتلى و برهانلى موازنهلرله فلسفهنڭ يولدن چيقمش بو قسمنه ايليشييور، طوقاتلايور؛ مستقيم، منفعتدار فلسفهيه ايليشمييور. اونڭ ايچون مكتبليلر، رسالۀ نوره إعتراضسز چكينميهرك گيرييورلر و گيرمليدرلر.