پدرلرم و والدهلرم و بتون نسلى و نسبى و معنوى أقربالرم، باقئِ حقيقينڭ بقاسى و وارلغيله محودن و عدمدن و إعدامِ أبديدن و حدسز ألملردن قورتولوب او حدسز رحمتنه مظهريتلرينى شعورِ ايمانيله حسّ ايتدم. و مدارِ غم و ألم اولان جزئى و تأثيرسز شفقتمه بدل، نهايتسز بر رحمت، اونلره نظارت و حمايت ايتديگنى طويدم، حسّ ايتدم. بر والده ولدينڭ لذّتيله، ذوقيله، راحتيله ذوقلنمسى گبى؛ بن ده او بتون شفقت ايتديگم ذاتلرڭ، او رحمتڭ حمايتى آلتندهكى نجاتلريله و إستراحتلريله ذوقلندم و فرحلاندم و چوق درين شكر ايتدم.
هم او شعورِ ايمانيله، نتيجۀِ حياتم و سببِ سعادتم و وظيفۀِ فطرتم اولان رسائل النور دخى ضياعدن، محودن، فائدهسز قالماسندن و معنًا قوروماسندن قورتولمالرينى و ميوهدار باقى قالمالرينى او إنتسابِ ايمانى ايله بيلدم، حسّ ايتدم، قناعت گتيردم. كندى بقامڭ لذّتندن چوق زياده بر معنوى لذّت طويدم، تام حسّ ايتدم. چونكه ايمان ايتدم كه: باقئِ ذو الكمالڭ بقاسى و وارلغيله رسائل النور يالڭز إنسانلرڭ حافظهلرنده و قلبلرنده نقش اولمايور؛ بلكه حدسز ذىشعور مخلوقاتڭ و روحانيلرڭ بر مطالعهگاهلرى اولمقله برابر رضاءِ إلٰهىيه مظهر ايسه لوحِ محفوظده و ألواحِ محفوظهده إرتسام ايدهرك ثواب ميوهلريله تزيّن ايدر. و بِالخاصّه قرآنه منسوبيتى و قبولِ نبوى و إن شاء اللّٰه مرضئِ إلٰهى جهتيله بر آنده وجودى و نظرِ ربّانىيه مظهريتى، عموم أهلِ دنيانڭ تقديرندن داها زياده قيمتدار بيلدم.
ايشته حياتمى و بقامى او رسائلڭ حقائقِ ايمانيهيى إثبات ايدن هر بر رسالهنڭ بقاسنه، دوامنه، إفادهسنه، مقبوليتنه فدا ايتمگه هر وقت حاضر اولديغمى و سعادتمى اونلرڭ قرآنه خدمت ايتمهلرنده بيلدم. و او حالده بقاءِ إلٰهى ايله يوز درجه إنسانلرڭ تحسينلرندن داها زياده بر تقديره مظهريتلرينى او إنتسابِ ايمانى ايله آڭلادم. بتون قوّتمله (حَسْبُنَا اللّٰهُ وَنِعْمَ الْوَكٖيلُ) ديدم.