يولده بيله مبارك وقتنى وظيفه ايله گچيررلردى. أوت بز إعتراف ايدييورز كه، استاديمزڭ نطقندهكى لطافت و اُلفتندهكى حلاوت او درجه فيض بخش ايدردى كه؛ إنسان، صباحدن آقشامه قدر او وضعيتده درس آلسه، يول يوروسه، أصلا صيقيلمق إحتمالى يوقدى.
هم استاديمز، رسالۀِ نور خدمتنى هر شيئه ترجيح ايدرلر و بيوررلردى كه: «يگرمى سنهدر قرآنِ حكيمدن و رسالۀِ نوردن باشقه بر كتابى نه مطالعه ايتمشم و نه ده يانمده بولونديرمشم؛ رسالۀِ نور كافى گلييور.» أوت فيّاضِ مطلق طرفندن بتون حقائقِ قرآنيه قلبِ منوّرينه إلهام و إلقاءِ كلّى ايله إفاضه اولونور ده، قرآنِ معجز البياندن باشقه نهيه محتاج اولور؟ بوندن شبههسى اولانلر، رسالۀِ نوره دقّت ايتسينلر. جنابِ حق استاديمزه رسالۀِ نورڭ تأليفنده اويله بر إقتدارِ بديع إحسان ايتمشدر كه، بو هركسه نصيب اولاجق خصلتلردن دگلدر. او خارقه نور رسالهلرى، هر برى غربتده، خستهلق ايچنده، طاغده، باغده، كاتبسز، تحمّلى مشكل غايت آغير شرائط داخلنده، ظاهرى نيجه مشكلاتلرله ميدانه گلمش و مؤمنلرڭ إمدادينه يتيشمشدر. فقط جنابِ حقّه شكر اولسون كه، عنايتِ إلٰهيه، خارقه بر طرزده استاديمزه فوق العاده موفّقيت إحسان ايتمشدر. ايشته بو سردندر كه جنابِ حق، اوڭا كائناتى بر كتابِ سماوى و أرضى بر صحيفه گبى كشف و شهودله بِحقّ اليقين اوقويهجق بر إقتدار ويرمش؛ محضِ عنايتله بويله قدسى بر أثره صاحب قيلمشدر. أوت آياتِ تشريعيهيى حاوى قرآنِ معجز البيانڭ حقائق و معارفنى و آياتِ كونيهيى شامل كتابِ كبيرِ كائناتڭ وظائف و معانيسنى بيان ايدوب، معرفت اللّٰهڭ أڭ يوكسك درجاتنه عروجه نوعِ بشرى تشويق ايدن و بوگونكى گونده، ئولمگه يوز طوتان قلبلرى بيله إذنِ إلٰهى ايله إهتزازه گتيرهجك قدر خارقه بر أثرِ بديعه، بر سريانِ سريعه اولان رسالۀِ نور ايله نشرِ حقائق ايدن بو وجودِ مسعود ايله بشريت إفتخار ايتمك لازم گليركن؛ چوق غريبدر كه، أهلِ شقاوت