عبوديته منافيدر. بزلر، بزلره ظلم ايدنلرى، بزى حمايه ايدن و رسالۀ نورده إستخدام ايدن ربّمزه حواله ايدييورز.
أوت دنيايه عائد خارقه نتيجهلر بعض أورادِ مهمّه گبى، رسالۀِ نورده چوقجه ترتّب ايدييور. فقط اونلر ايستهنيلمز، بلكه ويريلير. علّت اولاماز، بر فائده اولابيلير. أگر ايستهمكله اولسه علّت اولور، إخلاصى قيرار، او عبادتى قسمًا إبطال ايدر.
أوت رسالۀِ نورڭ او قدر دهشتلى معنّدلره قارشى غالبانه مقاومتى، سرِّ إخلاصدن، هيچ بر شيئه آلَت ايديلمهمسندن و طوغريدن طوغرىيه سعادتِ أبديهيه باقماسندن و خدمتِ ايمانيهدن باشقه بر مقصد تعقيب ايتمهمسندن و بعض أهلِ طريقتڭ أهمّيت ويردكلرى كشف و كرامتِ شخصيهيه أهمّيت ويرمهمسندندر. و ولايتِ كبرا أصحابلرى اولان صحابيلر گبى، وراثتِ نبوّت سرّيله، يالڭز ايمان نورلرينى نشر ايتمك و أهلِ ايمانڭ ايمانلرينى قورتارمقدر.
أوت رسالۀ نورڭ بو دهشتلى زمانده قزانديرديغى ايكى نتيجۀ محقّقهسى هر شيئڭ فوقندهدر، باشقه شيلره و مقاملره إحتياج بيراقمييور.
برنجى نتيجهسى: صداقت و قناعتله رسالۀ نور دائرهسنه گيرنلر، ايمانله قبره گيرهجگنه غايت قوّتلى أمارهلر وار.
ايكنجيسى: رسالۀِ نور دائرهسنده، إختياريمز اولمادن تقرّر و تحقّق ايدن شركتِ معنويۀِ اُخرويه جهتيله هر بر حقيقى صادق شاكرد؛ بيڭلر ديللرله، قلبلرله دعا ايتمك، إستغفار ايتمك، عبادت ايتمك و بعض ملائكه گبى قرق بيڭ لسان ايله تسبيح ايتمكدر. و رمضانِ شريفدهكى حقيقتِ ليلۀِ قدر گبى قدسى، علوى حقيقتلرى، يوز بيڭ أل ايله آرامقدر. ايشته بو گبى نتيجه ايچوندر كه؛ رسالۀِ نور شاكردلرى، خدمتِ نوريهيى ولايت مقامنه ترجيح ايدر؛ كشف و كراماتى آراماز؛