بو زمانده رسالۀِ نوره محتاجدر. فقط عمومنى ألده ايدهمز. ألده ايتسه ده تمام اوقوياماز. فقط كوچك بر رسالۀِ نور حكمنه گچمش بر رسالۀِ جامعهيى ألده ايدهبيلير. و أكثر وقتلرده محتاج اولديغى مسئلهلرى اوندن اوقويهبيلير و غدا گبى هر زمان إحتياج تكرّر ايتديگى گبى، او ده مطالعهسنى تكرار ايدر.
سعيد النورسى
* * *
﴿بِاسْمِهٖ سُبْحَانَهُ﴾
شفقتِ إنسانيه، مرحمتِ ربّانيهنڭ بر جلوهسى اولديغندن؛ ألبته رحمتڭ درجهسندن آشمامق و رحمةً لِلعالمين ذاتڭ مرتبۀِ شفقتندن طاشمامق گركدر. أگر آشسه و طاشسه او شفقت، ألبته مرحمت و شفقت دگلدر؛ بلكه ضلالته و إلحاده سرايت ايدن بر مرضِ روحى و بر سقمِ قلبيدر.
مثلا: كافر و منافقلرڭ جهنّمده يانمالرينى و عذاب و جهاد گبى حادثهلرى كندى شفقتنه صيغيشديرمامق و تأويله صاپمق؛ قرآنڭ و أديانِ سماويهنڭ بر قسمِ عظيمنى إنكار و تكذيب اولديغى گبى، بر ظلمِ عظيم و غايت درجهده بر مرحمتسزلكدر. چونكه معصوم حيوانلرى پارچهلايان جاناوارلره حمايتكارانه شفقت ايتمك، او بيچاره حيوانلره شديد بر غدر و وحشى بر وجدانسزلقدر. و بيڭلر مسلمانلرڭ حياتِ أبديهلرينى محو ايدن و يوزر أهلِ ايمانى سوءِ عاقبته و مدهش گناهلره سَوق ايدن آدملره شفقتكارانه طرفدار اولمق و مرحمتكارانه جزادن قورتولمالرينه دعا ايتمك، ألبته او مظلوم أهلِ ايمانه دهشتلى بر مرحمتسزلكدر و شنيع بر غدردر.