و أقطابلرڭ إلتفاتنه مظهريتنڭ سرّى و حكمتى، مصيبتڭ عظمتى و دهشتيدر كه، هيچ بر أثرڭ مظهر اولماديغى بر قدسى تقدير و تحسين آلمش. ديمك أهمّيت اونڭ فوق العاده بيوكلگنده دگل، بلكه مصيبتڭ فوق العاده دهشتنه و تخريباتنه قارشى مجاهدهسى آز اولديغى حالده غايت بيوك بر أهمّيت كسب ايتمش كه بو ايكى آيتده إشارت و بشارتِ قرآنيهده إفاده ايدر كه، رسالۀِ نور دائرهسنه گيرنلر تهلكهده اولان ايمانلرينى قورتارييورلر و ايمانله قبره گيرييورلر و جنّته گيدهجكلر دييه مژده ويرييور. أوت بعض وقت اولور كه، بر نفر گورديگى خدمت ايچون بر مشيرڭ فوقنه چيقار، بيڭلر درجه قيمت آلير.
* * *
اون طوقوزنجى سوزڭ آخرنده بيان ايديلن قرآندهكى تكرارڭ أكثر حكمتلرى، رسالۀ نورده دخى جريان ايدييور. بِالخاصّه ايكنجى حكمتى تام تامنه واردر. او حكمت شودر كه:
هركس هر وقت قرآنه محتاجدر. فقط هركس، هر وقت بتون قرآنى اوقومغه مقتدر اولاماز. فقط بر سورهيه غالبًا مقتدر اولور. اونڭ ايچون أڭ مهمّ مقاصدِ قرآنيه أكثر اوزون سورهلرده درج ايديلهرك؛ هر بر سوره بر كوچك قرآن حكمنه گچمش. ديمك هيچ كيمسهيى محروم ايتمهمك ايچون حشر و توحيد و قصّۀِ موسى گبى بعض مقصدلر تكرار ايديلمش. عين أهمّيتلى حكمت ايچوندر كه، بعض دفعه خبرم اولمادن، إختيارم و رضام اولماديغى حالده، بعض اينجه حقائقِ ايمانيه و قوّتلى حجّتلرى متعدّد رسالهلرده تكرار ايديلمش. بن چوق حيرت ايدردم. نهدن اونلر بڭا اونوتديرلمش؟ صوڭره قطعى بر صورتده بيلدم كه: هركس