﴿بِاسْمِهٖ سُبْحَانَهُ﴾
عزيز، صدّيق قارداشلرم!
رسالۀِ نورڭ خدمتندهكى أكثر شاكردلرى برر نوع كرامت و إكرامِ إلٰهى حسّ ايتدكلرى گبى؛ بو عاجز قارداشڭز چوق محتاج اولديغى ايچون، چوق نوعلرينى و چشيدلرينى حسّ ايدييور. و بو صيرهلرده بو حواليدهكى شاكردلر، يمينله إعتراف ايدييورلر كه: بز نورڭ خدمتنده چاليشدقجه هم معيشتجه، هم إستراحتِ قلبجه بر گنيشلك، بر فرح ظاهر بر صورتده حسّ ايدييورز. بن كندمجه او قدر حسّ ايدييورم كه، نفس و شيطانم، او بداهته قارشى حيرت ايدهرك صوصديلر.
سعيد النورسى
* * *
﴿بِاسْمِهٖ سُبْحَانَهُ﴾
آخرت قارداشلريمه مهمّ بر إخطار
«ايكى مادّه»در:
برنجيسى:
رسالۀِ نوره إنتساب ايدن كيمسهنڭ أڭ أهمّيتلى وظيفهسى، اونى يازمق و يازديرمقدر و إنتشارينه يارديم ايتمكدر. اونى يازان و يازديران و اوقويان، رسالۀِ نور طلبهسى عنواننى آلير. و او عنوان آلتنده، هر يگرمى درت ساعتده بنم لسانمله بلكه يوز دفعه، بعضًا داها زياده خيرلى دعالرمده و معنوى قزانجلرمده حصّهدار اولمقله برابر؛ بنم گبى دعا ايدن قيمتدار بيڭلر قارداشلرم و رسالۀ نور طلبهلرينڭ دعالرينه و قزانجلرينه دخى حصّهدار اولور.