غايت گوزل اولان و رسالۀِ نورڭ «لاحقه مكتوبلرى» إسمنى آلان بو مكتوبلر، نور طلبهلرينڭ روحى بر چوق إحتياجلرينى تطمين ايتمشدر. هم رسالۀِ نور طلبهلرينه، قرآن و ايمان خدمتنده برر رهبر حكمنه گچمش؛ هم إسلاميت دشمنلرينڭ بتون بتون يالان و اويدورما پروپاغندهلرينه آلدانمامق و إنتباه ويرمك خصوصنده اويانديريجى بر تأثير حصوله گتيرمشدر. و بو صورتله ده، دينسزلگڭ او موقّت شعشعهلى سلطنتى دورنده (چوق كيمسهلرڭ اميدسزلگه و عطالته دوشورلديگى او قراڭلق گونلرده) قلبلره إنشراح و سُرور ويرمش و ايمان خدمتى ايچون فعاليت عشقنى يرلشديرمشدر. و بويلهجه مؤمنلرى يأسدن قورتاروب، إسلاميتڭ، رسالۀِ نورله إستقبالدهكى پارلاق ظفرلرينه إشارتلر ايدوب مژدهلر ويرمشدر.
أوت او نورانى لاحقه مكتوبلرى كه؛ روحلرى، قلبلرى جذب و فتح ايدن، عقللرى تسخير ايدن حقيقتلرله طولودر. بو لاحقه مكتوبلرندن بعضلرى ايلريده يرى گلدكجه درج ايديلهجكدر. حضرتِ استادڭ قسطمونيدهكى حياتنه دائر معلوماتى، قسطمونيدن يازديغى مكتوبلرڭ بر قسمندن بعض پارچهلر آلمقله و اورادهكى خالص و صادق نور طلبهلرينڭ مكتوبلرندن بر قاچ مكتوبى بو تاريخچهيه إدخال ايتمك صورتيله تقديم ايدييورز. آشاغيده يازيلان مكتوبلر بش يوز صحيفهدن زياده اولان قسطمونى لاحقهسندن، استادڭ قسطمونيدن إسپارطهدهكى طلبهلرينه گوندرديگى مكتوبلرندن بش اون مكتوبدر. بو مكتوبلرده حضرتِ استاد، طلبهلرينه، أل يازيسيله رسالهلرى يازمالرينڭ، نشر ايتمهلرينڭ أهمّيتنى؛ رسالۀِ نور طلبهلرينڭ شيمديلك جزئى گبى گورونن خدمتلرينڭ، حقيقتده كائناتده أڭ معظّم مسئله اولديغنى و بر گون بو مملكتده رسالۀِ نورڭ نوريله گنيش چاپده فتوحات اولاجغنى مژدهلهمكده، رسالۀ نورڭ دائرهسنڭ و نشرياتنڭ تمللرينى، أساسلرينى وضع و تحكيم ايتمكدهدر.
* * *