- أفنديم، شو تكيهده بولونمق حسبيله، سز ده بنم گبى طلبهسڭز. شو حالده بوراده خواجهلق حقّڭز يوقدر! دييهرك، گوندوز وقتى بيله هركسڭ گوچلكله گچهبيلهجگى جسيم بر اورماندن گيجهلين گچهرك نورشينه گلير.
شرقى آناطوليده مدرسه تشكيلاتندهكى خصوصيتلردن بريسى شودر كه: إجازت آلمش بر عالم، ايستديگى كويده حسبةً ِﷲ بر مدرسه آچار؛ مدرسه طلبهلرينڭ إحتياجى، إقتدارى اولورسه مدرسه صاحبى طرفندن، إقتدارى يوقسه خلق طرفندن تأمين ايديلير. خواجه مجّانًا درس ويرر، طلبهلرڭ إعاشه و لوازماتنى ده خلق درعهده ايدردى. بونلرڭ ايچنده يالڭز ملا سعيد، هيچ بر صورتله زكات آلمايوردى. زكات و باشقهسنڭ أثرِ منّتى اولان بر پارهيى قطعيًا قبول ايتمييوردى. (حاشيه)
نورشينده بر مدّت قالدقدن صوڭره هيزانه دوندى. صوڭره مدرسه حياتنى ترك ايدهرك پدرينڭ ياننه گلدى و بهاره قدر أوده قالدى. او صيرهده شويله بر رؤيا گورور:
قيامت قوپمش، كائنات يڭيدن ديريلمش. ملا سعيد، پيغمبر عليه الصلاة والسلامى ناصل زيارت ايدهبيلهجگنى دوشونور. نهايت صراط كوپريسنڭ باشنه گيدوب طورمق خاطرينه گلير. «هركس اورادن گچر، بن ده اوراده بكلهرم» دير و
___
(حاشيه): زكات و صدقه و مقابلسز هيچ بر شى آلمديغنڭ سبب و حكمتى، رسالۀِ نوردن ايكنجى مكتوب و سائر رسالهلرده بيان ايديلمشدر. أوت ملا سعيدڭ إستقبالده رسالۀِ نورله گورهجگى خدمتِ ايمانيهيى كمالِ إخلاصله ايفاسى و بو خدمتڭ ميدانه گلهبيلمهسى ايچون «اُخروى خدمتڭ مقابلنده هيچ بر شى طلب ايتمهمك» اولان قدسى دستورڭ إجمالى بر فهرستهسى، داها كوچك ياشنده ايكن رحمتِ إلٰهيه طرفندن روحنده يرلشديريلمشدى.