مكتوبلر وار. بونلرى، اوقويوجيلرڭ نورلردن إستفادهلرينه بر علامت اولديغى جهتله، رسالۀِ نور حسابنه قبول ايتمش. (حقيقتده) سعيد نورسىنڭ بو ملّتدن، گنجلكدن ايستديگى: ايمانله، دنيوى و اُخروى سعادتى قزانمالريدر. بونڭ ايچون قرآنڭ بو زمانه عائد درسى اولان رسالۀِ نورى أساس طوتوب؛ هر يرده، هر دائرهده نشرينى، ايمان حقيقتلرينڭ اوگرنيلمهسنى ايستهمكدهدر. كنديسى دفعهلرجه، بو ملّت و مملكت عليهندهكى جريانلره قارشى يگانه چارهنڭ رسالۀ نور اولديغنى إخطار ايتمكده و مژدهلهمكدهدر.
استادڭ رضاىِ إلٰهىيه معطوف خدمت، حركت و فعاليتلرينى باشقه مقصد و غايهلره يوروملامق ايستهينلر، آنجق بصيرتسزلكلرينى إعلان ايدييورلر.
إنسانڭ يوكسك ماهيت و روحنڭ ايستديگى حقيقى سعادت، آنجق قرآنڭ گوسترديگى يولده و رضاىِ إلٰهينڭ پاريلداديغى اُفقدهدر. بديع الزمان، رسالۀِ نورله إنسانلغه بو يولى و بو اُفقى گوسترمكده، صراطِ مستقيم أصحابنڭ نورلى قافلهسنه إلتحاق ايتمهنڭ إنسان ايچون ألزم اولديغنى طويورمقده و إثبات ايتمكدهدر.
ايشته بز، عاجزانه حاضرلاديغمز بو أثرله بو حقيقته بر نبذه خدمت ايتمك ايستدك. إستقبالڭ منوّر بختيارلرينه بر مأخذ اولارق بو أثرى نشر ايدييورز. داها درين و گنيش بر تاريخچه حاضرلانمهسى ديلگمزدر.
﴿وَمِنَ اللّٰه التَّوْفٖيقُ﴾
حاضرلايانلر
* * *