تهلكهسنه معروض قالديغمز بر دورهيه راستلار. بو دوره، بيڭ سنهدر قرآنه بايراقدارلق ياپمش، إسلاميته عصرلرجه خدمت ايتمش قهرمان بر ملّت ايچون دقّتله اينجهلنمهسى لازم گلن بر دورهدر.
استاد، رسالۀِ نورى تأليف ايدركن، قرآنڭ إعجازى لمعهلرى اولان بو أثرلرڭ هر طائفۀِ إنسانيهده إنكشاف ايدهجگنى، دينسزلگڭ مملكتمزى إستيلاسنه مانع اولاجغنى، مملكت و ملّت ايچون بر سدِّ قرآنى وظيفهسنى گورهجگڭى، رسالۀِ نور خدمتنڭ عموميت كسب ايدوب تورك ملّتنڭ ينه إسلاميتڭ قهرمان بر اوردوسى و فداكارى اولاجغنى، رسالۀِ نورڭ نشرى و ايلريده رسمًا إنتشارى ملّتجه بنمسهنمسى و معارف دائرهسنڭ حقيقتِ قرآنيهيه ياپيشمهسى نتيجهسى مادّةً و معنًا ملّتڭ ترقّى ايدهجگنى، إسلاميتڭ بيوك قوّت بولاجغنى ذكر ايتمشدر.
رسالۀِ نور بر عَلَمْدر، عنواندر. بو زمانده ظهور ايدن قرآنى حقيقتلر منظومهسيدر. نجيب ملّتمزڭ، إنسانيتِ كبرا اولان إسلاميته صاريلماسى، يَپْيڭى بر روح و تازه بر ايمان عشقى و هيجانى ايچنده اويانماسنڭ إفادهسيدر. ايچنده بولونديغمز عصرڭ دگيشديرديگى حيات شرطلرى و يڭى بر دنيا نظامى و گوروشى قارشيسنده ايمانڭ تحكيم و تقويهسى ايله فوران ايدن حميتِ إسلاميهنڭ معناسيدر. مُتَنَبِّهْ، قلبلرى ايمان و محبّتِ نبوى ايله جوشقون و جهاندگر شرفِ إنتسابيله سَرَفْراز فداكارلرڭ يتيشمهسى و بو ملّتڭ ماضيسنه متناسب قهرمانلغى، يوكسك ايمان و أخلاقى إظهار ايتمهسى إشارتيدر.
بديع الزمان، رسالۀِ نورى هيچ بر مقام و مشربڭ تأثيرى آلتنده قالمادن، مادّى معنوى هيچ بر منفعت و حسّيات قاريشمادن، طوغريدن طوغرىيه قرآنِ حكيمڭ عمومڭ إستفاده ايدهبيلهجگى و عمومه خطاب ايدن حقيقتلرينى تفسير ايتمش، بو حقيقتلرڭ ترجمانلغنى ياپمشدر. تأليف ايتديگى آثارندن هركس إستفاده