ناصلكه حكومتِ جمهوريه «دينى دنيادن تفريق ايدوب بىطرفانه قالمق» پرنسبنى قبول ايتمش؛ دينسزلره، دينسزلكلرى ايچون ايليشمديگى گبى؛ ديندارلره ده، ديندارلقلرى ايچون ايليشمهمسى او پرنسبڭ ايجاباتندندر. اويله ده؛ بن دخى بىطرف و حرّيتپرور اولماسى لازم گلن حكومتِ جمهوريهنڭ، دينسزلگه طرفدار و أنتريقهلرى چويرن و حكومتڭ مأمورلرينى إغفال ايدن گيزلى منفى قوميتهلردن تفريق ايديلوب، حكومتڭ اونلردن اوزاق اولماسنى ايستهيورم؛ او أنتريقهجيلرله مبارزه ايدييورم. او قوميتهلردن، تصادفله حكومتڭ مأموريتنه گيرنلر، جدّى ديندارلره طاقمق ايچون ايكى قولپ ألنده طوتمش، غرض ايتدكلرى ديندارلره طاقييورلر و حكومتى إغفاله چاليشييورلر. او ايكى قولپڭ بريسى: او ملحدلرڭ دينسزلگنه تمايل گوسترمهمك معناسيله «إرتجاع» قولپنى طاقييور. ديگرى: حاشا و حاشا دينسزلگى، بو حكومتِ إسلاميهنڭ عينِ سياستى تلقّى ايتمديگمز معناسنده «دينى سياسته آلَت ايتمك» قولپى ايله لكهلهمك ايستهيورلر. (حاشيه)
أوت حكومتِ جمهوريه، او گيزلى مفسدلرڭ وطنه و ملّته مضر أفكارلرينى ألبته ترويج ايتمز و طرفدار اولاماز. منع ايتمك، جمهوريت قانونلرينڭ مقتضاسيدر. و اويله مفسدلره طرفدارلق ايله، جمهوريتڭ أساسلى پرنسبلرينه ضدّى ضدّينه گيدهمز. حكومتِ جمهوريه، بزم ايله او مفسدلر مابيْننده حَكم حكمنى آلسين. هانگيمز ظالم ايسه و تجاوز ايدييورسه؛ او وقت حَكم حكمنى ويرسين و حاكملك نقطهسنده حكمنى إجرا ايتسين.
___
(حاشيه): يعنى «حكومت بر سياست تعقيب ايتمييور، (حاشا ثمّ حاشا) حكومتڭ سياستى دينسزلكدر.» دييه توهّم ايدن او ملحدلرڭ نظرنده، بنم قرآنِ حكيمڭ نصوصِ قطعيهسندن ترشّح ايدن رسالۀِ نور ايله تعقيب ايتديگم حقائقِ ايمانيهيه خدمتمى، مخالف بر سياست ديمكله، دنياده أڭ شنيع بر إفترايى ايدر.