دفعه ده بنى زهيرلمهيه چاليشمشلر. أڭ صوڭ دهشتلى پلانلرى، سابق داخليه وكيلنى و آفيونڭ سابق واليسنى و أميرطاغنڭ سابق قائمِمقام وكيلنى عليهمه سوق ايتمهلريله، رسمى حكومتڭ نفوذينى بتون شدّتيله عليهمده إستعمال ايتمهلريدر. بنم گبى ضعيف، إختيار، مَرْدُمْگِريز، فقير، غريب، خدمته چوق محتاج بر بيچارهيه او اوچ رسمى مأمورلر، عليهمده اويله بر پروپاغنده ياپمش و هركسدهكى قورقو او درجهيه وارمش كه؛ بر مأمور بڭا سلام ايتسه، خبر آلدقلرى وقت دگيشديردكلرى ايچون، جاسوسلقدن باشقه هيچ بر مأمور بڭا اوغرامديغنى و قومشولريمڭ ده بعضلرى قورقولرندن هيچ سلام ايتمدكلرينى گورديگم حالده؛ عنايت و حفظِ إلٰهى بڭا بر صبر و تحمّل ويردى. أمثالسز بو إشكنجه و بو تضييق، بنى اونلره دخالته مجبور ايتمدى.
....
اوچنجيسى: ايكى سنه، ايكى محكمه، أللرنده تدقيق ايديلن بتون رسالۀ نور أجزالرنده قانونجه بر وسيله بولامايوب (حاشيه) بزى و رسالۀِ نورى برائت ايتديردكدن صوڭره؛ زندقه قوميتهسى، منافق بعض مأمورلرى وسيله ايدهرك، مركزِ حكومتده رسمى بر پلان چويروب، بتون بتون خلافِ قانون اولارق بتون دوستلرمدن و طلبهلرمدن تجريد و صحّت و حياتم نقطهسنده أڭ فنا بر يرده، بنى
___
(حاشيه): يا هيچ بر جهتله هيچ بر قانون، حتّى اونلرڭ بعض كيفى قانونلرى بزه و رسالۀِ نوره ايليشمييورلر وياخود شيمديكى بعض قانونلر ايليشديگى حالده؛ قوجه عدليهلر و اوچ بيوك محكمهلر، إستقبالده گلهجك شدّتلى نفرت و لعنتدن چكينمك ايچون نورڭ و بزم محكوميتمزه جسارت ايدهميوب إتّفاقله عموممزڭ برائتنه و بتون رسالۀِ نورڭ إعادهسنه قرار ويرديلر. طاغ گبى قوّتلى عدليهلر چكينديگى حالده، موقّت بر مقامده اولان غدّار شخصيتلرڭ بو ظلمى ياپمهلرى، ألبته سماواتى و أرضى قيزديرييور، داها حدّتمه لزوم قالمييور.