طوقونويور. فقط رسالۀِ نورڭ خارقه فتوحاتى و شاكردلرينڭ أهلِ حقيقت نظرنده و روحانى و ملائكهلر ياننده حرمت و مرحمتله قارشيلانمالرى، بنم شخصمه گلن إهانت و حقارتلرڭ سيورىسينك قنادى قدر أهمّيتى قالماز. او بدبخت أهلِ إهانت، ديندارلق جهتيله، أهلِ دين و أهلِ علومِ دينيهنڭ حرمتنى قيرمق دينه بر إهانت اولديغى جهتنده، روحانى و ملائكهلرڭ و أهلِ ايمان و أهلِ حقيقتڭ نظرنده ملعون اولديغى گبى؛ بيڭدن آنجق بر ايكى سرسرينڭ ويا زنديغڭ آفريننى قزانيرلر. او بدبختلر بڭا حقارت ايتمكله، گويا رسالۀِ نورڭ نفوذينى قيرييور؛ شخصمى منبع ظن ايدوب بنى چوروتمكله، رسالۀِ نور سقوط ايدهجك گبى أحمقانه بر ظن ايله شخصمه تجاوز اولويور.
بن ده ديرم: أى بڭا دينسزلك حسابنه إهانت و حقارت ايدن بدبختلر! قطعيًا سزه خبر ويرييورم؛ ياقينده (توبه ايتمهمك شرطيله) هيچ چارۀِ خلاص يوق كه، أجل جلاّديله سن، إعدامِ أبدى ايله ئولوم دار آغاجى ايله آصيلاجقسڭ! شرارتلى روحڭ دخى أبدى بر حپسِ منفردده محكوم اولمقله برابر، أهلِ ايمان و روحانيلرڭ نفرت و لعنتنى قزانهجقسڭ! (توبه ايتمهمك شرطيله) بنم إنتقامم، سندن، پك مضاعف بر صورتده آلينييور بيلديگمدن، حدّت دگل حتّى سڭا آجييورم!
امّا رسالۀِ نورڭ، سنڭ گبى سينكلر قدر أهمّيتى اولميانلرڭ پرده چكمهسى، ذرّه قدر نفوذينى قيراماز. يوز بيڭلر آدم اونڭله ايمانلرينى قورتاردقلرى ايچون، روح و جانله حرمت و پرستش ايدرلر. امّا شخصمڭ تأثّرى ايسه قطعيًا سزه خبر ويرييورم كه؛ بر ايكى دقيقه عصبيتلى بر تأثّراتمه مقابل، بردن اويله بر تسلّى بولويورم كه، بيڭ درجه سزلرڭ حقارت و إهانتى زيادهلشسه او تسلّىيى قيراماز. چونكه رسالۀِ نورڭ كشفِ قطعيسيله، دينسزلك حسابنه بزه هجوم ايدنلر، أبدى عذابلر و حپسِ منفردده إعدامِ أبدى ايله إهانتنى گوردكلرى گبى؛ رسالۀ نورله ايماننى قورتاران