بن دنيانڭ حالنى بيلمييورم، فقط آوروپاده إستيلاكارانه حكم ايدن و أديانِ سماويهيه طايانميان بو دهشتلى جريانڭ إستيلاسنه قارشى رسالۀِ نور حقيقتلرى بر قلعه اولديغى گبى؛ عالمِ إسلامڭ و آسيا قطعهسنڭ حالِ حاضردهكى إعتراض و إتهامنى إزاله و أسكيدهكى محبّت و اخوّتنى إعاده ايتمگه وسيله اولان بر معجزۀِ قرآنيهدر. بو وطنڭ، بو ملّتڭ وطنپرور سياسيلرى سرعتله رسالۀِ نورى طبع ايتديرهرك رسمى نشر ايتمهلرى لازمدر كه، بو ايكى بلايه قارشى سپر اولسونلر. (حاشيه)
سعيد النورسى
* * *
بردن إخطار ايديلدى، قلمه آلمغه مجبور اولدم
﴿بِاسْمِهٖ سُبْحَانَهُ﴾
قارداشلرم!
شيمدى تام تحقّق ايتدى كه؛ رسمًا بڭا إهانت و حقارت ايتمك، اونڭله توجّهِ عامّهيى حقّمده قيرمق ايچون گيزلى بر تدبير قورولمش. بنم بتون دوستلريمى (پرده آلتنده) صوغوتمق و اوركوتمگه چاليشييورلر. حالبوكه سكّۀِ تصديقِ غيبى اونلرڭ بتون پروپاغندهلرينى زير و زبر ايدييور. گرچه بويله دينسزلك حسابنه بڭا اولان حقارت، بر درجه بنى صيقييور؛ أسكى سعيددن قالمه بعض طمارلريمه
___
(حاشيه): بو، دنيا چاپندهكى بيوك شرفه و أڭ معظّم إسلامى خدمته، آنجق يڭى حكومت مظهر اولابيلمش؛ و بيوك بر آڭلاييش گوسترهرك، رسالۀِ نورڭ مطبعهلرده ١٩٥٦ سنهسنده باصيلماسنه سبب اولمقله، ملّتِ إسلاميهنڭ بيوك بر توجّهنى قزانمقله، قوّتنى چوق فضله آرتديرمق موفّقيتنى ألده ايتمشدر.