مسلمانز، دين يالڭز سعيدڭ مسلگنه مخصوص دگل» دييوب، بزه قارشى پرده آلتنده جبهه آلان زنديقلره و آنارشيلك حسابنه او صافدل أهلِ ديانت و خواجهلرى آلَت ايدوب إستعمال ايدييورلر. إن شاء اللّٰه بونلرڭ بو پلانلرى ده عقيم قالاجق. بويله حريفلره ديرسڭز:
«بز، رسالۀِ نورڭ شاكردلرىيز. سعيد ده، بزم گبى بر شاكرددر. رسالۀِ نورڭ منبعى، معدنى، أساسى ده قرآندر. يگرمى سنهدر أمثالسز تدقيقات و تعقيباتله برابر، قيمتنى و غلبهسنى أڭ معنّد دشمنه ده إثبات ايتمشدر. اونڭ ترجمانى و بر خدمتكارى اولان سعيد نه حالده اولورسه اولسون، حتّى سعيد ده (اَلْعِيَاذُ بِاللّٰه) رسالۀِ نورڭ عليهنه دونسه، بزم صداقتمز و علاقهمزى إن شاء اللّٰه صارصميهجق.» دييوب، او قپويى قپارسڭز. فقط ممكن اولديغى قدر رسالۀِ نورله مشغول اولمق، ألندن گليرسه يازمق و مبالغهلى پروپاغندهلره هيچ أهمّيت ويرمهمك و أسكيسى گبى تام إحتياط ايتمك گركدر.
عموم قارداشلريمزه برر برر سلام و دعا ايدييورز.
سعيد النورسى
* * *
بو وطندهكى ملّتڭ أڭ بيوك قوّتى اولان عالمِ إسلامڭ توجّهنى و حميتنى و اخوّتنى قيرمق و نفرت ويرديرمك ايچون، سياستى دينسزلگه آلَت ايدهرك، پرده آلتنده كفرِ مطلقى يرلشديرمك ايستهينلر، حكومتى إغفال و عدليهيى ايكى دفعهدر شاشيرتوب دير: «رسالۀِ نور شاكردلرى، دينى سياسته آلَت ايدر؛ أمنيته ضرر ويرمك إحتمالى وار.» حالبوكه، بو مملكته مادّى و معنوى بركتى و فوق العاده خدمتى و عموم عالمِ إسلامه تعلّق ايدهجك حقائقى جامع اولديغى، اوتوز اوچ آياتِ قرآنيهنڭ إشارتيله و إمامِ علىنڭ (رض) اوچ كرامتِ غيبيهسيله و غوثِ